J’isi gin bagee’g
1 Yeḛ gə́ loo-siée to ndil Njekurdɔloo’g lé
Ndil Bao-siŋgamoŋ ɓa yeḛ wa rəa keneŋ.
2 M’ula Njesigənea̰ m’pana:
Yeḛ nja gə́ njo̰loo-kula-dɔm keneŋ ləm,
Yeḛ nja gə́ kəi-kaar-kɔgərɔ gə́ m’ula rɔm keneŋ ləma,
Yeḛ nja gə́ Ala ləm gə́ m’ɔm məəm dəa’g ləm tɔ.
3 Mbata yeḛ nja ɔri ta jam’g lə njékwayelje ləm,
Yoo-ndag gə́ guri naŋg lé
Yeḛ ɔri ta’g ləm tɔ.
4 Yeḛ a kɔm bèlee dɔi’g ndá
I a kiŋga ne loo-kula-dɔi gin bagee’g.
Meenda londoŋ ləa ɓa to dər ləi gə kubu-rɔ kula kaari’g ya.
5 I a ɓəl néɓəl-booje gə́ a teḛ dɔi’g loondul’g el ləm,
Kandə ɓandaŋgje gə́ teḛ pir-pir dan kàrá lé
I a ɓəl dee el ləm,
6 Yoo-ndag gə́ ŋgəḭ loondul’g lé
I a ɓəlee el ləma,
Yoo-koso gə́ tɔl dəwje dan kàrá rib-rib kara
I a ɓəlee el ləm tɔ.
7 Ɓó lé dəwje tɔl-dɔg (1.000) d’wəi mbɔri’g pər ləm,
Tɔl-dɔg-loo-dɔg (10.000) d’wəi dɔ jikɔli’g ləm tɔ kara
Né neelé a tibi mbɔri el ya.
8 Kəmi ɓa i a kaa dee ne,
I a koo bo̰ néra njémeeyèrje gə́ ɔs ta dee’g bɔsɔrɔ.
9 Mbata Njesigənea̰ lé to njo̰loo-kula-dɔ ləi,
I ar Njekurdɔloo’g lé to loo-sii ya.
10 Bèe ɓa nékəmndoo kára kara a teḛ dɔi’g el ləm,
Yoo-koso kára kara a tibi mbɔr kəi-kubu ləi el ləm tɔ.
11 Mbata yeḛ a kun ndia kar kuraje ləa gə́ dara kwɔji ne dɔi
Gə mba kar dee tɔs kəm dee dɔi’g loo-kabije’g lai ya .
12 D’a kuni gə ji dee
Nà banelə i a tuga gɔli dɔ kɔr mbal’g .
13 I a tuba toboḭ naŋg puduru-puduru ləm,
I a rəd li-meewai naŋg ləma,
Ŋgon toboḭ əsé da-kɔb kara
I a tuba dee naŋg gə gɔli mbə̰ji-mbə̰ji ləm tɔ .
14 Mbata yeḛ undam dan kəmee’g
Bèe ɓa m’a karee ɔr dəa kúla’g,
M’a kaḭ bada dəa’g
Mbata yeḛ gər rim tɔ.
15 Yeḛ a ɓar rim ndá m’a kilá keneŋ ləm,
M’a nai səa dan néurti’g ləm,
M’a karee ɔr dəa kúla’g ləma,
M’a kula rɔnduba dəa’g ləm tɔ.
16 M’a kar dəa ai səgərə kar mée ndá ne kaḭ ləm,
M’a karee oo kaji ləm gə kəmee nda̰-nda̰ ya ləm tɔ.
© Ngambai Bible © Alliance Biblique du Tchad 1989, 2015.
