Tuji oso dɔ Babilɔn’g
1 Gée gə́ gogo ma m’oo kura gə́ dara gə́ raŋg ḭ dara ree naŋg nee ndá yeḛ to njesiŋgamoŋ gə́ tɔgmbaŋ. Rɔnduba ləa ndogó wər-wər naŋg nee. 2 Yeḛ pata gə ndia gə́ boi wəl pana: Babilɔn, ɓee-boo lé tuji oso dəa’g aree tuji pugudu ya. Yee nja tel to loo-si ndilje gə́ majel ləm, gə ndilje gə́ mina̰ jɔmri-jɔmri gə́ rara kara ləma, yelje gə́ rara gə́ to ramielje gə́ to kḛji kara deḛ ra ɓee keneŋ ləm tɔ . 3 Mbata ginkoji dəwje gə raŋg lai d’ai oŋg-boo, yee ɓa gə́ mɔdkaiya ləa gə́ mbaije gə́ dɔ naŋg nee ra səa lé tɔ. Njételkəmlarje kara nébaoje lə dee ur dɔ maree’g gə́ kédé-kédé gə goo nébao lə kaiya-dené gə́ turu dɔ loo lé .
4 M’oo ndu dəw gə́ raŋg ɓar dara pana: Koso-dəwje ləm, ḭje rəa’g teḛje raga mba ra səa kaiya lé na̰’d el ləm, mba kar boo-tujije gə́ wɔji dəa lé teḛ dɔ sí’g el ləm tɔ . 5 Mbata kaiyaje ləa lé rɔd dɔ na̰ neg-neg saar teḛ dara ndá mee Ala olé dɔ néra majelje’g ləa . 6 Raje səa né godə maree gə́ yeḛ nja ra sə sí-seḭ ləm, telje gə maree as gɔl joo ɓa areeje gə goo kula reaje ləm tɔ. Nékaiya gə́ yeḛ nja ndusu mee ŋgo-kai-né’g lé telje ndusuje maree as gɔl joo lé mee ŋgo-kai-né’g ləa-yeḛ lé tɔ . 7 Kɔs gə́ yeḛ ɔs gaji rəa ɓa uru ne dan némajije gə́ d’al dɔ loo sula ɓəi lé areeje uga gə néurti gə kəmndooyoo togə́bè tɔ. Mbata yeḛ ə̰ji ta mée’g pana: N’isi n’to mbai gə́ dené ləm, neḛ n’to gə́ dené nduba el ləm, kəmndooyoo a teḛ dɔ neḛ’g el ŋga ləm tɔ . 8 Gelee gə́ nee ɓa tuji-booje d’a koso ne dəa’g mee ndɔ gə́ kára ba’g ya as bèe: yoo ləm, gə kəmndooyoo ləma, gə yoo-ɓoo ləm tɔ ndá pər ɓa d’a rée ne. Mbata Mbaidɔmbaije Ala gə́ njesiŋgamoŋ lé gaŋg rəwta dəa’g ya.
9 Mbaije gə́ dɔ naŋg nee lai gə́ ndal səa mɔdkaiya ləm, d’uru səa na̰’d dan némajije gə́ d’al dɔ loo sula ləm tɔ lé d’a no̰ gə mán-no̰ kəm dee’g sii ne mbigi-mbigi mbata ləa loo gə́ d’a koo sa pər gə́ rée lé . 10 D’a kunda rɔ dee ŋgərəŋ mbata d’a ɓəl néurti gə́ rəa lé ndá d’a pana: Nékɔb gə́ ban ɓa to ɓəl bèe wa! Nékɔb gə́ ban ɓa to ɓəl bèe wa! Babilɔn, ɓee-boo gə́ njesiŋgamoŋ lé nja! Mee kàree gə́ kára ba ya nétuji gə́ wɔji dɔi teḛ dɔi’g ya.
11 Dəwje gə́ njételkəmlarje gə́ dɔ naŋg neelé deḛ no̰ d’isi ne gə kəmndooyoo mbata dəw kára kara ndogo néje lə dee el ŋga. 12 Larlɔr ləm, gə larnda ləm, gə mərkwɔjije gə́ tila kas gə́ dum ndogo ləma, gə mərmbaije ləm tɔ, kubu gə́ d’ṵji gə kúla palégal ləm, gə kubu gə́ ndul piro-piro ləm, gə kubu gə́ bḭ-maji ləm, gə kubu gə́ kas njir-njir ləm, gə kagje gə́ gə ria-ria gə́ ə̰də sululu ləm, gə néje gə́ gə ria-ria gə́ deḛ tɔl gə ŋgaŋ kərje ləm, gə néje gə́ gə ria-ria gə́ deḛ tɔl gə́ kagje gə́ gad dee to yaa̰ ləm, gə néje gə́ deḛ léḛ gə́ larkas gə larndul ləma, gə tɔl gə kɔri mbal gə́ tila kas ləm tɔ , 13 gə gobo ləm, gə kandə kamnaḭ gə́ ə̰də lel ləm, gə né gə́ ə̰də sululu ləm, gə timbá ləm, gə no̰ kag gə́ ə̰də sululu ləm, gə mán-nduú ləm, gə ubu ləm, gə nduji gə́ ndá léréré ləm, gə koje ləm, gə bɔ maŋgje ləm, gə badje ləm, gə kundaje ləm, gə pusuje ləma, gə ɓərje gə dəwje bura ləm tɔ. 14 Néje gə́ malee rai lé d’unda rɔ dee ŋgərəŋ. Néje lai gə́ maji d’al dɔ loo sula ləm, gə́ to boo-nébaoje ləm tɔ lé d’igi rɔi’g pa ndá i a kiŋga dee gogo el ŋga. 15 Njételkəmlarje gə́ ndogo néje neelé tel ne baoje ndá d’a kunda rɔ dee ŋgərəŋ mbata d’a ɓəl néurti gə́ rəa lé. D’a no̰ ləm, d’a sí gə kəmndooyoo ləm tɔ 16 ndá d’a pana: Nékɔb gə́ ban ɓa to ɓəl bèe wa! Nékɔb gə́ ban ɓa to ɓəl bèe wa! Ɓee-boo gə́ garee godo gə́ d’ula kubu gə́ d’ṵji gə kúla palégal gə kubu gə́ ndul piro-piro gə kubu gə́ kas njir-njir rəa’g ləm, gə́ ɗɔi rəa gə́ larlɔr ləm, gə jərje gə́ gad dee to yaa̰ ləma, gə mərkwɔji ləm tɔ. Mee kàree gə́ kára ba ya nébaoje gə́ tur dɔ loo lé tuji keneŋ pugudu.
17 Njékwa ŋgaw-batoje lai ləm, gə deḛ lai gə́ d’aw gə rəw gə́ mán gə́ par gə́ nee, gə njébatoje ləma, gə deḛ gə́ saŋg nékiŋgaje dan baa-boo-kad’g neelé ləm tɔ lé deḛ d’unda rɔ dee ŋgərəŋ , 18 ndá loo gə́ deḛ d’oo sa pər gə́ rée ne ndá deḛ no̰ u-u-u pana: Ɓee-boo lé see garee gə́ tana səa to ra wa . 19 Deḛ sa babur d’ɔm dɔ dee’g ləm, deḛ no̰ gə mán-no̰ kəm dee’g ləm, d’wa ndòo-yoo ləma, deḛ no̰ pana: Nékɔb gə́ ban ɓa to ɓəl bèe wa! Nékɔb gə́ ban ɓa to ɓəl bèe wa! Ɓee-boo gə́ garee godo gə́ njébatoje lai d’iŋga ne boo-nébaoje lə dee keneŋ lé mee kàree gə́ kára ba ya tuji teḛ dəa’g .
20 Seḭ gə́ dara lé raje rɔlel dəa’g! Seḭ gə́ njémeendaje gə njékaḭkulaje gə njéteggintaje lé alje rɔ sí to! Mbata Ala ila ta dəa’g ra ne ta lə sí gə goo rəbee mba̰ .
21 Yen ŋga kura gə́ dara gə́ to njesiŋgamoŋ lé un kɔr mbal gə́ to asəna gə mbal gə́ d’usu ne kó bèe ndá yeḛ unda piriŋ ila dan baa-boo-kad’g pana: Togə́bè ya ɓa, d’a kun ne Babilɔn, ɓee-boo gə́ garee godo neelé kila ne mán poŋgm bèe ya tɔ. D’a kiŋgá gogo el ŋga . 22 D’a koo ndu kṵdu-ko̰déje gə ndu njépaje gə ndu tébéje gə ndu to̰to̰ lé mee ɓee’g ləi gogo el ŋga ləm, d’a kiŋga njégosokulaje gə́ rara kara ɓee ləi gogo el ŋga ləma, gir mbal kusu kó kara a ɓar ɓee ləi el ŋga ləm tɔ . 23 Pərndɔ a ndogó ɓee ləi el ŋga ləm, ndu njédené sigije gə denéje lə dee a ɓar ɓee’g ləi gogo el ŋga ləm tɔ, mbata njételkəmlarje ləi to dəwje gə́ boo dɔ naŋg nee ləm, mbata nésukəmlooje ləi lé i su ne kəm ginkoji dəwje gə raŋg lai su-su ləma, 24 mbata d’iŋga məs deḛ gə́ to gə kəmee gə ka̰ njéteggintaje gə ka̰ deḛ gə́ i goré gwɔs dee dɔ naŋg neelé lé mee ɓee’g ləi ləm tɔ .
© Ngambai Bible © Alliance Biblique du Tchad 1989, 2015.
