1 Kura gə́ dara gə́ njekɔm’g mi lé im to̰to̰ ndá m’oo kérèmé gə́ ḭ dara oso naŋg. D’aree nékɔr tarəw gə́ wɔji dɔ bwa-wəl gə́ ɔr duu keḭ-keḭ ar suna godo 2 ndá yeḛ ɔr ta bwa-wəl neelé. Sa uba keneŋ ŋgɔg-ŋgɔg asəna gə sa pər mbo-boo bèe ndá sa gə́ ḭ bwa-wəl’g neelé udu kəm kàr rəd-rəd ar loondul ndiŋ-ndiŋ . 3 Beedéje teḛ kəm sa’g neelé digi-digi ndá d’aw dɔ naŋg nee dèm-dèm. D’ar dee siŋga dee asəna gə ka̰ siŋga mbai-yḭje gə́ naŋg nee bèe . 4 D’ula beedéje neelé mba kar dee ra majel gə muje el ləm, əsé gə pudu néje el ləma, əsé gə kagje kara el ləm tɔ nɛ dəwje gə́ tɔs né ŋgono̰ dee’g gə nétorji Ala el lé ɓa d’a ra dee meeyèr ya. 5 D’un ndu dee mba kar beedéje d’ula kəm dee ndòo gə́ kula as naḭ mi nɛ tɔl ɓa d’a tɔl darɔ dee el. Nékəmndoo gə́ d’a kula ne kəm dee ndòo lé a to asəna gə kəmndoo mbai-yḭ gə́ aw unda dəw lé. 6 Mee ndəaje’g neelé dəwje d’a saŋg yoo nɛ d’a kiŋga el, d’a ndəi rɔ dee kar yoo gə mba karee tɔl dee nɛ yoo lé a kaḭ dee kunda rəa ŋgərəŋ .
7 Beedéje neelé to tana gə kunda-kaw-rɔje bèe. Dɔgugu gə́ asəna gə larlɔr to dɔ dee’g ləm, kəm dee to tana gə kəm dəwje ləm tɔ . 8 Yiŋga dɔ dee ɔm pɔ-pɔ asəna gə yiŋga dɔ denéje bèe ləm, ŋgaŋ dee to asəna gə ŋgaŋ toboḭje bèe ləm tɔ . 9 Kubu-rɔ gə́ ŋgira kiŋ-kiŋ asəna gə lar to rɔ dee’g ləm, gir bag dee ɓar bir-bir asəna gə gɔl pusu-rɔje gə́ kundaje bula ndɔr dee d’aḭ ne ŋgwɔd gə́ loo-rɔ’g bèe ləm tɔ . 10 Ɓoŋ dee to asəna gə ka̰ mbai-yḭje gə́ kun dee to keneŋ bèe ləm, ɓoŋ dee ɓa to siŋgamoŋ to keneŋ mba ra ne dəwje meeyèr asəna gə naḭ mi ləm tɔ. 11 Mbai dɔ dee to kura gə́ njebwa-wəl gə́ suna godo gə́ d’unda ria gə́ ta Ǝbrə pana: Abadon tɔɓəi d’unda ria gə ta Grek pana: Apolyo̰.
12 Némeeko̰ gə́ dɔtar dəs mba̰. Aa ooje, némeeko̰ gə́ raŋg nai joo ɓəi d’a ree korè gée.
13 Kura gə́ dara gə́ njekɔm dee’g misa̰ im to̰to̰ ɓa m’oo ndu dəw ɓar gə́ par gə́ gaji gə́ to loo sɔ kum loo-nékinjaməs larlɔr gə́ to no̰ Ala’g . 14 Ndu neelé ula kura gə́ dara gə́ njekɔm dee’g misa̰ lé pana: Tudu kuraje gə́ dara sɔ gə́ tɔ dee dɔ baa-boo’d gə́ ɓaree Epratə lé. 15 Kuraje gə́ dara sɔ neelé gə́ d’wa dɔ gɔl rɔ dee ŋgina ne kàree ləm, gə ndəa ləm, gə naḭyee ləma, gə ləbee ləm tɔ lé deḛ tudu dee mba kar dee tɔl dəb dəwje gə́ loo kára, nɛ dəb dee nai loo joo. 16 Njékṵda-kaw-rɔje gə́ m’oo dee lé tura deḛ ndá dɔ dee a kwa mèŋgèŋgḛ̀ dum tura. 17 Togə́bè ɓa m’oo kunda-kaw-rɔje lé gə́ némḭdi, m’oo njékuba gir deeje tɔ. Njékṵdaje neelé kubu-lar gə́ ŋgira kiŋ-kiŋ gə́ to rɔ dee’g lé kas asəna gə pər bèe ləm, gə ndul asəna gə jər gə́ ɓaree hyasintə ləma, gə kas asəna gə kṵji pər bèe ləm tɔ. Dɔ kundaje lé to asəna gə dɔ toboḭje. Pər teḛ ta dee’g gə sia ləm, gə kṵjee ləm tɔ. 18 Dəb dəwje gə́ ɓee kára d’wəi yoo-boo-oŋg wɔji dɔ pər ləm, gə sia ləma, gə kṵjee gə́ uba ta kundaje’g ŋgɔg-ŋgɔg ləm tɔ. 19 Mbata kundaje neelé ta dee gə ɓoŋ dee ɓa gə́ siŋgamoŋ dee. Ɓoŋ kundaje lé to asəna gə ka̰ lije gə́ dɔ dee to keneŋ, yee ɓa deḛ ra ne dəwje meeyèr.
20 Dəb dəwje gə́ loo-joo gə́ nai gə́ d’wəi yoo-boo-oŋg gə́ kudu munda nee el lé d’ya̰ goo néra dee gə́ deḛ ra gə ji dee el. Deḛ d’əw rɔ dee kwa ndilje gə́ majel meḛ dee’g el ləm, d’əw rɔ dee kunda barmba no̰ magəje gə́ deḛ ra gə larlɔr gə larnda gə larkas gə mbal el ləm tɔ nɛ magəje neelé d’askəm koo loo gə kəm dee el ləm, d’askəm koo ta gə mbi dee el ləma, loo njaa lə dee kara godo ləm tɔ . 21 Dəb dəwje gə́ loo-joo lé d’əw rɔ dee tɔl mar deeje el ləm, əsé gə su kəm mar deeje su-su el ləma, mɔdkaiya lə dee gə ɓogo lə dee kara d’əw el ləm tɔ.
© Ngambai Bible © Alliance Biblique du Tchad 1989, 2015.
