J’ɔr dɔ sí gin godndu’g gə mba kɔm na̰’d gə Kristi ya
1 Ŋgakɔmje, see lée igi sí wa. Mbata ma m’pata gə dəwje gə́ gər gin godndu ya. Godndu lé dəw gə́ si kəmba ya wɔji dəa. 2 Togə́bè ɓa dené gə́ rara ɓa gə́ ŋgabeeje si kəmba ɓəi ndá godndu lé tɔ dee na̰’d nəji ɓəi, nɛ ɓó lé ŋgabeeje wəi ndá godndu gə́ teá gə ŋgabee na̰’d lé ɔr dəa’g ŋga. 3 Bèe ndá dené gə́ ŋgabeeje si kəmba ɓəi ɓa yeḛ taa diŋgam gə́ raŋg ndá d’a ɓaree kaiya-dené. Nɛ ɓó lé ŋgabeeje wəi ɓa yeḛ taa ŋgaw gə́ raŋg ndá ta kaiya wa dəa el mbata kwəi lə ŋgabeeje lé ar ta godndu ɔr ne dəa’g ləm tɔ. 4 Togə́bè, ŋgakɔmje, kwəi gə́ seḭ wəije gə Kristi na̰’d lé ta godndu ɔr dɔ sí’g mba kar sí sije ne kəmba mbata lə dəw gə́ raŋg, yeḛ gə́ teḛ dan njé gə́ d’wəi’g, ɓó gə mba kar sí j’andə ne gə kandə sí gə́ maji mbata lə Ala ya. 5 Tɔgərɔ ya, loo gə́ jeḛ nai gin darɔ’g ɓəi lé ndá mal ra kaiya gə́ godndu kila gel dee lé taa rɔ sí yéŋgé-yéŋgé ar sí j’andə ne gə kandə sí gə́ ka̰ yoo ya tɔ. 6 Ɓasinè, jeḛ gə́ j’oo rɔ sí gə́ yoo-dəwje gin godndu gə́ ila sí kag lé ndá j’ɔr dɔ sí keneŋ gə mba ra né gə goo rəw gə́ sigi gə́ to ka̰ ndil lé ɓó gə goo rəw gə́ ləw gə́ ka̰ maktub gə́ ŋgisi lé ɓa el.
Godndu lé as kɔr ta kaiya el
7 See j’a pa ban tɔɓəi wa. See godndu lé to kaiya wa. Wah! bèe el. Né ɓó lé godndu godo ndá kəm a kinja dɔ kaiya’g el. Mbata ɓó lé godndu pana: I a ra kəmkəḭ dɔ né’g lə mari el, ndá m’a koo loo gər nékəmkəḭ el tɔ . 8 Godndu lé nja ɓa ar kaiya wa ne loo to məəm’g, ar mal néje gə́ ɓəd-ɓəd ram ne, mbata ɓó lé godndu godo ndá kaiya a to né gə́ wəi. 9 Ma nja ləw lé m’isi m’lal godndu lé kara m’isi kəmba ya tɔ. Nɛ loo gə́ godndu lé teḛ mba̰ ndá kaiya lé tel si kəmba ŋga, ma lé ɓa m’tel m’wəi ne tɔ. 10 Togə́bè ɓa godndu gə́ a gə kar dəw ur loo gə́ a gə si gə kəmə lé keneŋ ndá ɔrm ilam ta yoo’g ɓa. 11 Mbata mbɔl dɔ godndu lé kaiya iŋga ne loo mba kərm ne ndá godndu lé am m’wəi ne tɔ .
12 Togə́bè ɓa godndu lé to né gə́ to gə kəmee ləm, ta godnduje lé kara to né gə́ to gə kəmee gə to gə dɔ najee gə to maji ɔr njoroŋ ləm tɔ. 13 Né gə́ maji lé see tel to gə́ né yoom wa. Wah! bèe el. Nɛ kaiya ɓa un né gə́ maji telee gə́ né yoom mba riba ne dɔ kaiya pərəg. Yee ɓa mbɔl dɔ godndu lé ɓa kaiya tel to gə́ né gə́ dum ya.
14 Jeḛ n’gər gao, godndu lé to né gə́ ka̰ ndil ya. Nɛ ma nja m’to né gə́ ka̰ darɔ gə́ taam ilam gə́ ɓər gin kaiya’g. 15 Mbata né gə́ m’ra lé m’gər kəmee el, né gə́ m’wɔji-kwɔji ra lé m’ra el nɛ né gə́ m’ə̰ji bəḭ-bəḭ ɓa m’tel m’ra . 16 Ɓó lé né gə́ m’wɔji-kwɔji ra el lé ɓa m’ra ndá yee ɓa am m’gər gao to gə́ godndu lé to maji ɔr njoroŋ ya. 17 Bèe ndá to ma ɓa m’ḭ gə dɔrɔm m’ra né neelé el nɛ kaiya gə́ ra ɓee məəm’g lé ɓa gə́ njerea ya. 18 Ma m’gər gao, né gə́ maji kára kara to məəm’g el, yee ɓa wɔji dɔ darɔm, mbata m’oo loo gə mba kwɔji né gə́ maji məəm’g gə mba ra nɛ tɔg rəa ləm godo. 19 Mbata né gə́ maji gə́ ma m’wɔji-kwɔji ra lé m’ra el, né gə́ majel gə́ ma m’wɔji-kwɔji ra el lé ɓa m’ra tɔ. 20 Ɓó lé ma m’ra né gə́ m’wɔji-kwɔji rəa el lé ndá to ma ɓa m’ḭ gə dɔrɔm m’ra el, nɛ kaiya gə́ to məəm’g lé ɓa gə́ njerea ya.
21 Bèe ndá ma m’iŋga godndu nee məəm’g: loo gə́ m’wɔji-kwɔji ra maji ndá majel lé ula rəa rɔm’g mbiriri. 22 Mbata məəm gə́ kəi lé m’ra rɔlel dɔ godndu Ala’g ya 23 nɛ ma m’oo godndu gə́ raŋg gə́ ra kula dəb rɔm’g ɔs kaar godndu gə́ takə̰ji ləm ndigi lé ləm, wam ne ɓər ilam ne rəw’g lə kaiya gə́ ḭ kwɔim’g ne nja ləm tɔ. 24 Ma lé m’to dəw gə́ daŋ’d ŋga! See na̰ ɓa a kwa yoo gə́ rɔm’g neelé kɔree kam wa. 25 Maji kar dɔkaisəgərə nai gə Ala, mbɔl dɔ Jeju Kristi Mbaidɔmbaije lə sí ɓa to njekwayoo neelé rɔm’g kɔree karm ya!
Togə́bè ɓa gə goo gosonégər ləm lé m’to ne gə́ ɓər gin godndu Ala’g nɛ gə goo darɔ lé m’to gə́ ɓər gin godndu ka̰ kaiya ya!
Togə́bè ɓa gə goo gosonégər ləm lé m’to ne gə́ ɓər gin godndu Ala’g nɛ gə goo darɔ lé m’to gə́ ɓər gin godndu’g ka̰ kaiya ya.
© Ngambai Bible © Alliance Biblique du Tchad 1989, 2015.
