1 Ma m’to pudu gə́ uba ndag-loo gə́ Saron ləm,
Gə pudu ndujaje gə́ wəl-looje’g ləm tɔ.
(Basa)
2 To gə́ pudu ndujaje gə́ uba dan kunje’g bèe lé
Njemɔr ləm kara
Aar mbuna ŋgama̰dje’g togə́bè ya tɔ.
(Ŋgoma̰də)
3 To gə́ kag-pɔmə gə́ uba mbuna kagje gə́ mee kɔr’g bèe lé
Yeḛ gə́ m’undá dan kəm’g lé
Aar mbuna basaje’g togə́bè ya tɔ.
Ma m’ndiŋga rɔm mba si ndilee’g,
Tɔɓəi ka̰dee lel tam’g jula-jula tɔ.
4 Yeḛ aw səm kəi-ma̰-nduú’g,
Ndá nékɔr-gin gə́ yeḛ wa dɔm’g lé
To ndigi na̰ ya.
5 Maji kar sí gədmje gə mbə kandə nduú
Arje siŋgam ḭ ne dɔ maree’g
Gə kandə kag-pɔmə
Mbata m’to rɔko̰ ndigi na̰ ya.
6 Maji kar jigelee gəd dɔm ləm,
Jikɔlee kara wam sém ləm tɔ.
(Basa)
7 Ŋgama̰dje gə́ Jerusalem,
M’ra ndòo rɔ sí’g gə ri ndooije ləm,
Gə ri arkasje ləm tɔ,
Ɓad ɓa kar yeḛ gə́ m’undá dan kəm’g
Ndel dɔ ɓi’g ɓəi lé
Gə goo mee ndigi ləa lé
Maji kar sí ndeleeje kédé el,
Ndeleeje dɔ ɓi’g el.
Yeḛ nja si ree
(Ŋgoma̰də)
8 Ndu yeḛ gə́ m’undá dan kəm’g lé ya ɓar,
Aa oo, yeḛ tal jagəra-jagəra
Dɔ mbalje’g ləm,
Gə dɔdərlooje’g ləm tɔ aw gə́ nee.
9 Yeḛ gə́ m’undá dan kəm’g lé
To asəna gə arkas bèe ləm,
Esé gə ŋgan ndooije bèe ləm tɔ.
Aa oo, yeḛ aar gir ndògo-bɔrɔ’g lə sí,
Yeḛ aa loo gə́ kəmbolè kəi’g ləm,
Yeḛ aa loo kəm ba̰də lar’g ləm tɔ.
10 Yeḛ gə́ m’undá dan kəm’g lé
Un ta pa ulam pana:
I njemɔr ləm gə́ m’undai dan kəm’g lé
Uba naŋg ḭta gə́ ree.
11 Mbata aa oo naḭ ɓar dəs mba̰,
Ndi əw rəa kər ləm, aw ɓee mba̰ ləm tɔ.
12 Puduje nduba rɔ dee ləm,
Kàr kɔs pa lə néje lai teḛ mba̰ ləma,
Ndu no̰ lə dərnda ɓar
Loo-ndɔ’g lə sí ləm tɔ.
13 Kodé andə gə ka̰deeje gə́ dɔtar ləm,
Baḭ nduúje gə́ d’aw pudu lé kara
Ǝ̰də sululu ləm tɔ.
Njemɔr ləm gə́ m’undai dan kəm’g lé
Uba naŋg ḭta gə́ ree!
14 Dərnda ləm gə́ si mbuna mbalje’g ləm,
Gə́ iya rəa mba̰-ərje’g ləm tɔ lé
Am m’oo kəmi ləm,
Am m’oo ndui ləm tɔ
Mbata ndui kul yururu ləm,
Kəmi ma̰də yaa̰ kəm’g ləm tɔ.
(Ko̰ ŋgoma̰də lé)
15 Twaje tàlje lé ar síje,
Ŋgan tàlje gə́ d’aw tuji nduúje,
Mbata nduúje lə sí d’aw pudu.
(Ŋgoma̰də)
16 Yeḛ gə́ m’undá dan kəm’g lé
Yeḛ to kama̰ ndá ma m’to kea̰-yeḛ tɔ.
Yeḛ ar koso-nékulje ləa d’aw d’o̰ mu
Mbuna puduje’g lé ya.
17 Ɓad ɓa kar loo kul lɔm ɓəi ləm,
Gə kar ndil kagje d’aḭ ɓəi ləm tɔ lé
I gə́ m’undai dan kəm’g lé
Maji kari tel ree,
Maji kari to tana gə ndooi bèe ləm,
Gə ŋgon arkas bèe ləm tɔ
Dɔ mbal gə́ kai sí dana lé ya.
© Ngambai Bible © Alliance Biblique du Tchad 1989, 2015.
