1 Sunda Hamuleinid’a 10 - Azumeina Bible 1999 (MPG)

ZLAD’A HI DAVID AMULÂ HI ISRAEL-LÎNA

Matna hi Saul-lâ

1 Bur tu suma Filistê-na a dur ayîna ki Israel-lâ. Israel-lâ a ring avoroziya; suma a fe dakina a puk kä, a bo yam ahina d’a Gilbowa-d’a. 2 Suma Filistê-na a tes Saul ki groma ped’et, a tchi Saul groma, nala, Jonatan azi ki Abinadap ki Malkisuwa. 3 Zozok ayîna mi tok yam Saul, suma yeûd’a a sisiwim yeûd’a, mi nga mi zlak abozi djidjik. 4 Ata yi máma Saul mi de mi sama mi zim ahle mam suma sïnina ala: Ang pat mbigeu mang nga fiyaka, ang tchogonu; ar suma bei ngat bayâ ndazina a mba tchan tchi ba a lazan ndi.

Wani sama zim ahle mam suma sïnina mi min ndi, kayam nga mi le mandarâ ngola. Ata yi máma Saul mi pat mbigeu mam mba fiyaka, mi ge tam avunad’u. 5 Kid’a sama zim ahle mam suma sïnina mi wum mi mit da d’a, mi ge tam avun mbigeu mam mba fiyaka, mi mit ki sed’em mi.

6 Ni hina ba, Saul ki grom suma hindina a bo. Sum mama pet a bo ni kur bur ma tuna. 7 Ata yima Israel-lâ pet suma a nga kaka kur horina pet a wed’ala azigar suma Israel-lâ a ring wa, Saul azi ki groma a tchazi wa mi d’a, a ar aziyazi a ringâ; suma Filistê-na a mba a kak kua.

8 Tcha ndjivinda suma Filistê-na a mba á yo ahlena hi suma a tchazina, a fe mad’a Saul ki grom suma hindina kä yam ahina d’a Gilbowa-d’a. 9 Azi fok ahle suma ata Saul-lâ, a ngad’am yam a hlad’u, a yo ahle mam suma sïna mi. Bugola, azi i de zla ndata woi kur ambas mazid’a pet mi filei mazina, mi sum mazina mi. 10 A tchuk ahle suma sïna hi Saul-lâ kur gonga halo mazinid’a, a b’alam yam akulo kur gong nga kud’ora halo mazi ma a yum ala Dagon-na na mi.

11 Ata yima suma Jabes suma Galät-na a hum ahlena pet suma suma Filistê-na a lazi ki Saul-lâ, 12 andjof suma gangrangâ pet a tchol a i yoï mad’a Saul azi ki groma, a mbazi Jabes. A tozizi asogozi ad’u agu ma ngol ma Jabes-sâ, a d’el tazi bei te tena gak burâ kid’iziya.

13 Saul mi mit ni yam tcho mam mba mi lat avok Ma didinid’a, kayam mi ngom nga zlad’a hi Ma didinid’a d’i. Mi mit ni yam djop pa mi i djopa avun suma azuleinid’a mi. 14 Mi djop nga Ma didina d’i. Ni kayam ndata ba, Ma didina mi tchum mbeyo, mi hamul mamba woi mi David Jesse goroma.