Jefte mi mbut ma ngolâ hi suma Galät-nina
1 Jefte ma Galät-na ni sama dur ayîna heîna, asumî atcha d’a gaulangâ, abum a yum ala Galät. 2 Atchad’a hi Galät-ta ti vud’um gro andjofâ. Atcha ndata grotna a djengâ, a dik Jefte woyo, a dum ala: Ar ang te djona habumina d’i. Kayam angî atcha d’a dinga gorotna.
3 Jefte mi ring ngei dei ki b’oziyoma, mi i kak sä yam ambas sa Top-pa. Suma hawa ya’â a tok gevemu, a i ki sed’em durâ mi.
4 Bugol bizad’a tcha, suma Amon-na a nde dur ayîna ki Israel-lâ. 5 Ata yima suma Amon-na a nga dur ayîna ki Israel-lîna, suma nglo suma Galät-na a i á hal Jefte yam ambas sa Top-pa. 6 A de mi Jefte ala: Ang mbeï kak ma ngol ma avoromina, ei i duri suma Amon-na.
7 Jefte mi hulong mi de mi suma nglo suma Galät-na ala: Ni agi ba, noyôn digin ni woi avo habun nduo zu? Ni kayam me ba, agi kalagi ini kur ndaka tua ba, agi mbagi atan nge?
8 Suma nglo suma Galät-na a de mi Jefte ala: Djiviya! Ki tchetchemba, ami mbamiya wa gevengû. Ang mbeï i ki sed’emiya, ei i duri suma Amon-na, ang kak ma ngol mamina, ang kak amulâ hi suma Galät-nina pet mi.
9 Jefte mi hulong de mi suma nglo suma Galät-na ala: Le agi mbagi á hulongôn avo á dur ayîna ki suma Amon-na, le Ma didina mi handjiya wa abonu ni, ni an ba, mba ni kak ma ngol magina.
10 Suma nglo suma Galät-na a de mi Jefte ala: Ma didina ni glangâs meina. Ami mba lami ahlena pet suma ang mba dami kazina.
11 Jefte mi i ki suma nglo suma Galät-na. A tinim ma ngolâ kaziya, a tinim ngola hi azigarîd’a mi. Jefte mi dugot zla d’a mi data pet avok Ma didina avo Mispa.
Jefte mi ge sunda ata suma Amon-na
12 Jefte mi ge sunda ata amul ma Amon-na, mi dum ala: Ni zla me adigei ki ang ba, ang mba dur ambas manda ge?
13 Amul ma Amon-na mi de mi suma Jefte mi sunuzi sä atama ala: Kid’a Israel-lâ a buzugï woi avo Ezipte-d’a, a hle ambas manda, tinï ad’ud’a avun alum ma Arnon-na dei gak mba avun alum ma Jabo’â kalum ma Jurdê-na mi. Ki tchetchemba, ang hulongôndji ki djivid’a.
14 Jefte mi ge sunda ata amul ma Amon-na kua, 15 mi dum ala: Israel-lâ a hle nga ambasa hi suma Mowap-mid’a d’oze d’a hi suma Amon-nid’a d’i. 16 Kid’a Israel-lâ a buzugï woi avo Ezipte-d’a, a tit ni hur fulâ gak a mba avun alum ma ngol ma Tchereuna, gak a mba Kades. 17 Ata yi máma Israel-lâ a ge sunda ata amul ma Edom-ma, a dum ala: Ang ar ami kalami kur ambas manga, wani mi min humuzi d’i. A ge sunda ata amul ma Mowap-ma hina mi, mi humuzi nga d’uo mi. Azi ar kaka Kades. 18 Bugola, a hle lovot ta hur fulîd’a, a ngui woi gen ambas sa Edom-mba ki d’a Mowap-pa, a mbeï abo ma yorogona hambas sa Mowap-pina, a ve kangâ sä abo alum ma Arnon-na woi hî bei kal yam andagad’a hi suma Mowap-mid’a ba, kayam alum ma Arnon-na ni hagad’a hi suma Mowap-mid’a.
19 Ata yi máma Israel-lâ a ge sunda ata Sihon amul ma Amor ma nga kaka Hesbon-na, a dum ala: Ang arami ami kalami kur ambas manga gak ami i ata yima ami imi kuana. 20 Wani mi min ar Israel-lâ á kal yam ambas mamba d’i. Mi tok sum mama pet, a ve kangâ Jahas, a dur Israel-lâ. 21 Ma didina Alona hi Israel-lîna, mi he Sihon ki sum mama pet abo Israel-lâ. A duruziya, a hle ambasa hi suma Amor-rîd’a pet, a kak kad’u. 22 Azi hlambasa hi suma Amor-rîd’a pet, tinï ad’ud’a avun alum ma Arnon-na dei gak mba avun alum ma Jabo’â, tinï ad’ud’a hur fulâ dei gak mba avun alum ma Jurdê-na mi.
23 Ki tchetchemba, Ma didina Alona hi Israel-lîna mi dik wa suma Amor-râ woi avok mam suma Israel-lâ. Ang min digizi woi zu? 24 Ang ndak á ve vama alo mangâ Kemos mi hangzina d’uo zu? Ahlena pet suma Ma didina Alo mamina mi hamizina, ami ndak á vamizi mi d’uo zu? 25 Na ni ang kal Balak Sipor gorom ma amul ma Mowap-ma mi tchi nga tuguyod’a ki Israel-lâ d’oze mi duruzi nga d’uo mi na kad’enga zu? 26 Gola! Ini ni biza d’a kikis hindid’a Israel-lâ a nga kaka avo Hesbon kazì ma nguyuma, avo Arower kazì ma nguyuma, kur azì ma nglona pet ma nga avun alum ma Arnon-nina. Ni kayam me ba, agi hlagizi kur atchogoi ndata d’uo ge? 27 An lang nga tcho d’i. Ni ang ba, lan tchod’a, ang ndan ayîna. Ar Ma didin ma ka sariyad’a mi ka sariyad’a ini aduk Israel-lâ ki suma Amon-na.
28 Wani amul ma Amon-na mi hum nga zla d’a Jefte mi dumzid’a d’i.
Vun ma hle ma Jefte mi hluma
29 Muzu’â hi Ma didinina mi kak yam Jefte. Mi i yam andaga d’a Galät-ta kandagad’a hi Manase-d’a, mi kal mi i Mispe d’a kur andaga d’a Galät-tid’a á i yam andagad’a hi suma Amon-nid’a. 30 Jefte mi hle vunam mi Ma didina, mi dum ala: Le ang han ad’enga an kus yam suma Amon-na ni, 31 kur hulong man nda avo ki furîd’id’a, sama lara ma mi ndeï avo hatan avok kikidji á d’ugulona, an mba ni tinim iram vam mi ang Ma didina, an ni hangzi vama ngat buzu ma ngala.
32 Jefte mi i ata suma á duruziya; Ma didina mi humzi abomu. 33 Mi duruzi tinï ad’ud’a Arower dei gak mi mba abo ma Minit-na. Mi hlazì ma nglona dok mbà gak mi mba Abel-Keramim, mi kus suma Amon-na; a hulong yazi kä ad’u Israel-lâ.
34 Jefte mi hulongî mi mba avo hatam Mispa. Gol wani, goromba ti ndeï á d’ugulom ki daliyâd’a abod’u, ti nga d’i lü djongâ. Ndat nabom vat tu, gorom ma ding nga d’i. 35 Ata yima mi watna, mi haû baru ma atama woyo, mi dala: Alë! Goronda! Ndak mban wa ndak ka ngola kanu, nda’î aduk suma a nga b’lagan djib’er mandina! An hle vunan mi Ma didina da’, an ndak á hulong bugol li!
36 Ti dum ala: Iba, le ang hle vunang mi Ma didina da ni, ang le ki sed’en d’igi ang hle vunang hina. Ki tchetchemba, Ma didina mi hang wa ad’enga, ang hle wa atchugulung ki mang suma djangû suma Amon-na da’. 37 Ti de mabut kua ala: Ang humunu, ang han tilâ mbà, an i yam ahinad’a, an tchi hora weyen ki buniyôn gro aropma.
38 Mi dat ala: Ndak iya! Mi hat tilâ mbà. Ndat ti i ki buniyôt gro aropma á tchi hora weyet yam ahinad’a. 39 Kur dabid’a hi til ma mbànid’a, ti hulongî ti mba avo gen abud’u, mi ndak vun vun ma hle ma mam hluma ki sed’ed’u. Ti zlap nga ki mandjuf fi. Kur bur máma a tin zla ndata aduk Israel-lâ á tit kad’u, 40 kur biza d’a lara pî gro arop suma Israel-lâ a nga i á tchi hora Jefte ma Galät-na goromba burâ fid’i fid’i.
© Azumeina Bible © Alliance Biblique du Tchad, 1999.
