Ester 9 - Azumeina Bible 1999 (MPG)

Juif-fâ a sä atchuguluzi ki mazi suma djangûna

1 Bur ma dogo yam hindina hi til ma dogo yam mbà ma a yum ala Adar-rîna mi ndaga. Ni bur mala a de woi yam vun ma hed’a hamulâ na, ni bur ma suma djangûna hi Juif-fîna a tin huruzi ala a te kaziya na, wani zla ndata ti hulongî kazi azi go. Kur bur máma Juif-fâ a kus kaziya. 2 Kur azì ma ngol ma lara ma amulâ Asuwerus mi te kama, Juif-fâ a tok tazi kur azì ma azi nga kaka kuana, a nde suma a ndjak vunazi kazi á tchid’ina durâ. Sama tchol avorozi nga d’i, kayam mandarazi vazi pet. 3 Suma nglo suma yam andagad’ina ki suma nglona hamulîna ki suma te yamba ki suma a nga le sunda avo hamulîna, a ndjun ad’u Juif-fâ, kayam mandara Mardose mi vaziya. 4 Kayam Mardose mi mbut ma ngol ma sunda hamulîna, simiyêm nde yina woi kur ambasa pet, simiyêm nga mi i avogovok mi.

5 Juif-fâ a ka mazi suma djangûna ki mbuguyo suma fuyogeina nga nga, a tchaziya, a dabazi woyo, a le vama huruzi mina ki sed’eziya. 6 Kur azì ma ngol ma Sus-sâ Juif-fâ a tchi suma kikis vahl. 7 A tchi Parsanedata, Dalfon, Aspata, 8 Porata, Adaliya, Aridata, 9 Parmaseta, Arizai, Aridai ki Vayezata. 10 Azi zla tazi dogo pet ni Haman Hamedata gorom ma djangûna hi Juif-fîna groma. Wani Juif-fâ a hurumuzi nga ahligiyezi d’i.

11 Kur bur máma tamba ablau suma a tchazi kur azì ma ngol ma Sus-sâ, a mba dazi zlazi mamulâ. 12 Amulâ mi de mamula Ester ala: Juif-fâ a tchi suma kur azì ma ngol ma Sus-sâ kikis vahl ki Haman grom suma dogona mi. A mba le ni nana ki suma kur ambas man nda sä woi abud’a, an we nga d’i. Wani ndak min ni me? An mba ni haksiya. Ndak tchenen ni me kua pî, an mba ni humugu?

13 Ester ti dum ala: Amulâ, le ang mina ni, ang he vuna mi Juif suma avo Sus-sâ a tchi suma ndjivin d’igi a tchazi ini na, a gap Haman grom suma dogo suma a tchazina akulo ata aguna mi.

14 Amulâ mi he vuna ala ar a le hina. A tchi wal zla ndata kur azì ma Sus-sâ, a gap Haman grom suma dogo ndazina akulo mi. 15 Juif suma avo Sus-sâ a tok tazi kur bur ma dogo yam fid’ina hi til ma Adar mámina, a tchi suma kua kikis hindi, wani a hurumuzi nga ahligiyezi d’i.

16 Juif suma a nga abu kur leud’a hamulîd’ina, a tok tazi yam tazi á dur ki mazi suma djangûna, a tchi mazi suma djangûna 75.000, wani a hurumuzi nga ahligiyezi d’i. 17 A lahle ndazina ni kur bur ma dogo yam hindina, a tuk tazi kur bur ma dogo yam fid’ina, a le te ma furîd’a burâ sop.

18 Wani Juif suma a nga avo Sus-sâ, a tok tazi á tchi mazi suma djangûna kur bur ma dogo yam hindina gak bur ma dogo yam fid’ina, a tuk tazi kur bur ma dogo yam vahlâ, a le te ma luna, a le furîd’a burâ sop mi.

19 Kayam ndata, Juif suma a nga kaka kel kur azì ma bei gulumuna kama, a nga le te ma luna, a nga le furîd’a, a nga he tazi ahlena hawa kur bur ma dogo yam fid’ina hi til ma Adar-râ bizad’a ki bizad’a.

Juif-fâ a tin vun til ma ge humba

20 Mardose mi b’ir ahle suma a le ndazina kur mbaktumba, mi sun mbaktum ndata mi Juif-fâ pet suma a nga kur leud’a hamulâ Asuwerus suma gogona ki suma dedeina mi. 21 Mi dazi ala: Agi lagi vun tilâ bizad’a ki bizad’a, kur bur ma dogo yam fid’ina gak bur ma dogo yam vahlâ hi til ma Adar-rîna. 22 Kayam bur máma ni bur ma agi sagi atchugulugi ki magi suma djangûnina. Ni til ma hur ma wura magina mi mbut hur ma hapmina, yor ta magid’a ti mbut furîd’ina mi, ni bur ma agi lagi te ma luna á lagi furîd’ina. Nge nge pî adigagi mi sun ahlena mi ndrama, mi he he d’a hawad’a mi suma houd’a mi. 23 Juif-fâ a le sunda yam zla d’a Mardose mi dazizid’a, a tin ad’ud’a á ngom vun til máma d’igi Mardose mi b’irizizi na.

24 Kayam Haman Hamedata ma Aga’â gorom ma djangûna hi Juif-fîna mi nga hurum á dap Juif-fâ woyo, mi le Purim (nala, Togina) á we bur ma a tchazi woi kuana. 25 Wani ata yima Ester ti tchol avok amulîna, amulâ mi he vuna kur mbaktumba ala: Ar tcho d’a Haman mi ngat kurum á lat mi Juif-fîd’a ti hulong kamu, a gabam akulo ata aguna, mam ki groma mi. 26 Kayam ndata, a nga yi bur máma ini ala Purim, ata yi d’a a yum ala Purim-mid’a. Juif-fâ a ve zla d’a Mardose mi b’irizizi kur mbaktum ndatid’a kahlena pet suma azi wazina kahle suma a mba kazina mi. 27 Juif-fâ a tin vun til ma bei ara ba na kaziya, yam andjavaziya, yam suma a zlap ki sed’ezina, á ngom bur ma mbà ma hi vun til mámina bizad’a ki bizad’a, ata bur ma a ngama d’igi Mardose mi b’irizizi kur mbaktumba na. 28 A nga ngom bur ma vun til máma, kur atchogoi d’a lara ge pet, kur azina hi sama lara ge, kur azì ma ngol ma lara ge pet mi. Bur ma Purim-ma ni burâ hi Juif-fâ ma bei ara ba na, mi arî vama ge humba kazi kandjavazi gak didin.

29 Amula Ester Abisayil goromba ki Mardose ma Juif-fâ a b’ir mbaktum mba yazi á mbàd’a ki vun mazi ma hed’a yam mbaktum mba a b’irit yam bur ma Purim-mid’a tala ti ka’î zla d’a irata d’a. 30 A sun mbaktum ndata mi Juif-fâ pet suma a nga kaka kur ambas sa kis kam dok mbà yam kid’iziya d’a amulâ Asuwerus nga mi te kata, a b’ir kurut ala a kak ki halasa bei vunadik ka tumba. 31 Ester azi ki Mardose a tinizi bur ma Purim máma kur bur ma a ngam yam azi Juif-fâ, yam andjavaziya, yam d’el ta mazid’a bei te tenid’a, yam tchi mazina mi. 32 Vun ma hed’a hi Ester-râ mi sira burâ hi Purim-ma ngingring. Ni hina ba, a b’irim kur mbaktumba wana.