Zla d’a kak djangûna ki wiyengîd’a
1 Le sana adigagi mi nga ki zlad’a ki wiyema ni, ni kayam me ba, mi kal kam avok suma bei he gagazid’ina ge? Ni kayam me ba, nga mi kal kam avok suma hAlonina d’uo ge? 2 Agi wagi nga d’ala suma hAlonina a mba ka sariyad’a yam suma kur duniyad’ina d’uo zu? Le agi mba kagi sariyad’a yam suma duniyad’a ni, agi ndagagi á kagi sariya d’a ngiyeû d’a wanda d’uo zu? 3 Agi wagi nga d’ala ei mba kei sariyad’a yam malaikana d’uo zu? Na ni ei ndagei á ka sariyad’a duniya d’a wanda d’uo zu? 4 Le agi nga ki zla d’a hina d’a ni, ni kayam me ba, agi igi ki sed’et avok suma suma Toka ti golozi a ndak nga va d’uo na ge? 5 An dagi hina kayam zulona mi lagiya. Agi nga ki sama ne ma ndak á ka ir sariyad’a hi b’oziyomid’a d’uo zu? 6 Na ni djivid’a sana mi kal yam wiyema avok suma bei he gagazid’ina zu?
7 Le agi nga kalagi sariyad’a yam tagiya ni, ni vama zulona d’uo zu? Le azi nga lagi ahle suma a nga ata yazi d’uo na pî ni, agi nga vagi tagi d’uo zu? Djivid’a kal la agi arazi a yo ahle magina hawa d’uo zu? 8 Wani ni agi tagid’a ba, nga lagi ahle suma ata yazi d’uo na mi b’oziyogina, agi nga b’ad’azi ahligiyezi mi. 9 Agi wagi tetet ala suma a lahle suma ata yazi d’uo na a mba kal kur leud’a hAlonid’a d’uo d’uo zu? Ar agi lobogi tagi d’i. Suma mizeuna, suma tuwal fileina, suma e’eûd’a, suma a bur ki ndrozi andjofîna, 10 suma kula, suma a’arad’a, suma gurut ki süma, suma ngul suma, suma tchiget suma ki suma hina na a ndak á kal kur leud’a hAlonid’a d’i. 11 Suma dingâ adigagi adjeu ni hina mi. Wani ki tchetchemba, Salad’a Jesus Christ ki Muzu’â hAlo meinina a mbud’ugi wa woi yed’et kur tchod’a, a tinigi wa iragi vagi mAlona, a mbud’ugi wa d’ingêr avok Alona mi.
Agi minigi tagi yam subura hAlonid’a
12 Suma dingâ adigagi a mba dala: Ahlena pet a han lovota kazi á led’a. Gagazi, wani ahle suma dingâ a nga djivid’a á led’a d’i. Ahlena pet a han lovota kazi á led’a, wani an min mbut magoma hi va tu d’i. 13 Agi nga dagi ala: Tena ni yam haid’a, haid’a ni yam tena mi. Gagazi, wani Alona mba b’lagazi woi djak. Hliu tad’a nga ni yam mizeuna d’i, wani ni yam Salad’a. Salad’a ni yam hliu tad’a mi. 14 Alo ma tchol Salad’a akulo aduk suma matna karid’ina, mba mi tcholei akulo karid’a kad’eng mamba mi.
15 Agi wagi ala hliu tagi ni ir hliu tad’a hi Christ-sa. An ndak á hle ir hliu tad’a hi Christ á mbud’ut ir hliu tad’a hatcha d’a gaulangâ zu? Nga na d’i! 16 Agi wagi nga d’ala sama zlap katcha d’a gaulangîna mi mbut ni hliu ma tuna ki ndad’u, d’uo zu? Kayam mbaktumba hAlonid’a ti dala: Azi djak mba mbut ni hliu ma tuna. 17 Wani sama zlap tu ki Salad’ina mi mbut ni muzuk ma tuna ki mamu.
18 Ar agi walagi woi ki mizeuna. Tcho d’a pet ta sana nga mi lata, tin ni woi abu atam pid’agï, wani sama nga mi le mizeunina mi le ni tam tchod’a. 19 Agi wagi nga d’ala hliu tagi ni gong nga kud’ora hAlona d’a Muzuk mam ma bei tchod’a ba ma mi hagizi nga kurugina d’uo zu? Agi nga ni yam tagi d’i. 20 Alona mi guzugi ni ki gus sa kal teglesa. Kayam ndata, ar agi suburugi Alona ki hliu tagiya.
© Azumeina Bible © Alliance Biblique du Tchad, 1999.
