So vuna hi Israel-lîna ki d’engzenga hAlonid’a
(Ni yam verse ma 1-na ki ma 47-48-na, ang gol 1 Sun hAm 16.34-36)1 Agi gilegi Ma didina!
Agi gilegi Ma didina, kayam mam mi ma djivina,
kayam o mamba ni d’a didinda!
2 Ni nge ba, ndak á de woi
yam sun nda ndandala hi Ma didinid’a ge?
Ni nge ba, ndak á de woi yam subur mamba pet ke?
3 Suma a nga tit yam gatina a le furîd’a,
suma a nga le sunda yam d’ingêra teteu na a le furîd’a mi.
4 Ma didina, ata yima ang we hohowa sum mangîna,
ang djib’er kanu;
ata yima ang sud’uzina, ang ndjunun
5 kayambala an we haheîd’a hi mang suma mandid’a d’a,
an le furîd’a kandjaf sum mangâ,
tan ndi lan zlezleû ki suma a te djo mangîna mi.
6 Ami lami tchod’a d’igi abuyomi ngolo na,
ami tchilami yam gata,
ami lami sun nda asa’ata.
7 Abuyomi ngolo a we nga ad’u
sun nda ndandal la ang lat sä avo Ezipte-d’a d’i,
azi mar rei yam o d’a ngol la ang lat kazid’a,
azi song vunang avun alum ma ngolâ,
avun alum ma ngol ma Tchereuna.
8 Wani mi sud’uzi woi yam simiyêm
á tak ad’eng mamba woyo.
9 Mi ngop alum ma ngol ma Tchereuna; mi so woyo;
mi tid’izi kur galileina d’igi sana mi tit hur fulâ na.
10 Mi sud’uzi woi abo suma a noyôzina,
mi prud’uzi woi abo mazi suma djangûna.
11 Mbina hlup mazi suma djangûna;
sa tu pî ar ri.
12 Ata yi máma a he gagazid’a yam zla mamba,
a gilem ki sawala mi.
13 Wani atogo hina zak azi mar rei yam sun mamba,
azi djup nga á wäd’u d’al mam ma mi dazizina d’uo mi.
14 Abagei hur fulâ huruzi oî ki d’od’oka;
azi nga kuk Alona abagei hur ful ma gangrasâ mi.
15 Mi hazi vama azi tchenem kama,
bugola, mi tchuguzi tugud’ei d’a tchod’a kaziya.
16 Azi nga le yungôrâ kur kangâ yam Moise
azi ki Aron ma Ma didina mi tinim iram vama.
17 Andagad’a ti ngo vunat teyo, ti lik Datan,
ti tos adesâ hi Abiram-ma kä mi.
18 Akud’a ti fo akulo aduk tok mazid’a,
ti ngal suma asa’at ndazina woyo.
19 Ad’u ahina d’a Horep-pa a yor gor amuhlâ,
a grif kä avok kawei ma a yorom máma.
20 Azi vrak Alo mala ni subur mazid’a na
kangus gor amuhl ma te hatna.
21 Azi mar Alo ma sud’uzi
ma lahle suma ndandalâ avo Ezipte-na woyo,
22 a mar ahle suma atchap suma mi lazi
yam ambasa hi Ham-mbina,
yam ahle suma mandar suma mi lazi
kur alum ma ngol ma Tchereunina woi mi.
23 Ma didina mi dala mi dabazi woyo;
ni Moise ma mam manama hol ba,
mi tchol avorom ir hod’ola hi gulumunid’a
á d’el vun ayî mama tala mi dabazi woi d’uo d’a.
24 Bugola, azi gol ambas sa djivid’a is,
azi he nga gagazid’a yam zla mam mba ded’a d’i.
25 Azi nde gureîd’a kur zlub’u mazid’a teteng,
azi ge nga yazi kä ad’u dela hi Ma didinid’a d’i.
26 Mi hlabom akulo, mi gun tam kazi ala
mam mba mi tchazi woi abagei hur fulâ,
27 mam mba mi tchazi andjavazi
ma danana woi aduk andjaf suma,
mam mba mi b’rawazi woi aduk andjaf suma bei wuma mi.
28 Azi nga zlap tazi ki Bäl ma Peyor-râ,
azi nga tahle suma a ngad’azi buzuna
malo ma bei arid’a ba na mi.
29 Azi zal hur Ma didina ki sun mazi d’a led’a;
tugud’ei d’a tchod’a ti nde adigaziya.
30 Ata yi máma Fines mi tchol akulo
mi tchi suma a le tchod’ina,
mi d’el ki vun tugud’ei d’a tcho ndata.
31 Kayam ndata, Ma didina nga mi ndumum ala
ni sama iratna yam sun nda mi lata
kur atchogoi d’a lara ge pet.
32 Azi zal hur Ma didina avun mbiyo ma Meriba-na,
a mba ki ndaka yam Moise.
33 Ata yi máma a zal hur Moise,
mi dazi zla d’a ndak nga á ded’a d’uo d’a.
34 Andjaf suma Ma didina mi dazi zlad’a kazina
azi tchazi nga woi d’i,
35 wani azi zlap tu ki sed’eziya,
a nga hat sun mazi d’a azi lata mi.
36 Azi nga kud’or filei mazina;
filei máma mi mbut ni dau ma vazina.
37 Azi nga he grozi suma andjofâ ki suma aropma
vama ngat buzuna mi fileina.
38 Azi vo buzuwa suma bei zlad’a kazi ba na woyo,
nala, buzuwa grozi suma andjofâ ki suma arop
suma azi nga hazi woi
vama ngat buzuna mi filei ma Kanan-nina.
Ambasa ti mbut ndjendjed’a ki suma azi tchazina.
39 Azi mbut ni suma ndjendjed’a ki sun mazi d’a led’a,
azi mbut ni suma gaulangâ ki sun mazi ndata mi.
40 Ma didina hurun zal yam sum mama,
mi gol sumala ni djo mama na is.
41 Mi hazi abo andjaf suma dingâ;
suma a noyôzi woina a te kaziya.
42 Mazi suma djangûna a lazi ndaka,
azi ge yazi kä ad’u ad’eng mazid’a mi.
43 Ma didina mi prud’uzi woi yam ablaud’a,
wani azi i avogovok kur so vun mazina,
azi rot kä kur tchila mazid’a.
44 Ma didina, mi hum tchi mazina,
mi wazi ndak mazid’a mi.
45 Mi djib’er yam vun mam ma djin
ma mi djinim ki sed’ezina;
kur djivi mamba mi wazi hohowoziya.
46 Mi zut suma a yozi magombina pet
á wazi hohowoziya.
47 Ma didina Alo mamina, ar ang sud’umiya!
Ar ang togomi woi aduk andjaf suma
kayambala ami gileng simiyêng ma bei tchod’a,
ami kagami ki furîd’a á suburung mi d’a.
48 Ar ei suburi Ma didina, Alona hi Israel-lâ
ma nga adjeu dei gak didina.
Ar suma pet a dala: Amin!
Agi gilegi Ma didina!
© Azumeina Bible © Alliance Biblique du Tchad, 1999.
