(d) AHAP AMUL MA ISRAEL-LÂ
Amul ma Siri-na mi ngui azì ma ngol ma Samari-na á durâ
1 Ben-Hadat amul ma Siri-na mi tok azigar mama pet, mi yo amuleina ad’um dok hindi yam mbà kakulumeina ki pus ma dur ayîna teteng, mi i ngui azì ma ngol ma Samari-na á durâ. 2 Mi tchuk sunda ata Ahap amul ma Israel-lâ, a mba dum ala: 3 Ben-Hadat mi sunumï ala: Ang hanï kawei mang ma hapma ki lor manga karubuyong ki grong suma djif suma kal teglesâ mi.
4 Amul ma Israel-lâ mi hulong dum ala: Salana amulâ, an ge yan kä ad’u zla manga, an hang tan tata kahle mana pet mi.
5 Wani suma sunda a hulongî kua yazi á mbàd’a, a dum ala: Gola! Ben-Hadat sunumï mi dang ala: Avok an sunï sum mana á dang ala: Ang hanï kawei mang ma hapma ki lor manga karubuyong ki grongâ. 6 Wani an nga ni dang ngei mbak ala ndjivin hina dedege an mba ni sundja azungeî mana atangû, a mba halang hur aziyang ma amula ki hur azina hi mang suma sunda, a mba yoï ahlena pet suma djivi suma ang nga ki na.
7 Ata yi máma amul ma Israel-lâ mi yï suma nglo suma yam ambasina pet, mi dazi ala: Agi wagi tetet ala sa máma mi min lei ni tchod’a, kayam mam tchugï sunda ala an hum arubuyon ki grona ki kawei man ma hapma ki lor manda. Wani an d’elem nga d’uo mi!
8 Wani suma nglona a dum ala: Ang hum zla mamba d’i, ang min nduo mi.
9 Kayam ndata, Ahap mi hulong zla d’a ded’a mi suma sunda hi Ben-Hadat-na ala: Salana, zla d’a ang dandji avoka an humud’u, wani zla d’a ang dandji ka tchetchem wanda, an minit ti! Suma sunda a i de zla ndata woi mi Ben-Hadat mi.
10 Ata yi máma Ben-Hadat mi hulongî sunda ata Ahap ala: Ata yima an b’lak Samari-na, le gugum ma arâ mi oî wa hur abo suma a nga tit ad’una ni, ar alona mi mban ndak ka ngol la kala kanu!
11 Amul ma Israel-lâ mi hulong dazi ala: Agi i dum ala: Sama i dur ayîna tua na nga mi subur tam d’igi sama kuzï ayîna da na hina d’uo!
12 Ata yima Ben-Hadat mi hum zla ndatina, mi nga ni kur tched’a zlapa kamulei suma dingâ kur zlub’ud’a. Ata yi máma na wat mi he vuna mi azigar mam suma nglona ala: Agi minigi tagi á ndagi azina durâ! Azi min tazi á nde durâ mi.
Amulâ Ahap mi kus ayîna
13 Wani ma djok vun Alona tu mi mba gen Ahap amul ma Israel-lâ, mi dum ala: Ang gola! Ma didina mi dan ala an dangû: Ang wablaud’a hi azigarâ d’a wanda ko zu? An mba ni hangzi ini abongû. Hina wani, ang mba wala an ni Ma didina!
14 Ahap mi djobom ala: Nabo nge ba, ang mba handji abon nge?
Ma djok vuna mi dum ala: Zla d’a ded’a hi Ma didinid’a ba wana: Nabo azungeî suma hamulei suma yam ambasina.
Ahap mi dum ala: Ni nge ba, mi ndayîna avok ke?
Mi dum ala: Ang tanga!
15 Ahap mi i gol azungeî suma hamulei suma yam ambasa suma a b’irizina, azi ni 232. Mi kal mi gol suma dur ayîna hi Israel-lâ pet, azi ni 7000.
16 Kid’a afata tchol falei d’ad’ara, a buzuk á dur ayîna. Wani Ben-Hadat kamulei suma dok hindi yam mbà suma a ndjunuma a nga tche süma kur zlub’ud’a, a gurut abo süma mi. 17 Azungeî suma hamulei suma yam ambasina a buzuk avok á durâ. Wani Ben-Hadat mi sun sana á gol vama nga lena. Sa máma mi hulong mba, mi dum ala: Suma a buzugï ni Samari.
18 Ben-Hadat mi dazi ala: Le a mba ni hawa ni, agi vazi karid’a; le azi mba ná dur ayîna pî, agi vazi karid’a mi.
19 Wani azungeî suma hamulei ndazina ki azigar suma a tit ad’uzina a buzuk kei huyok azina. 20 Nge nge pî mi tchi mam ma djangûna. Suma Siri-na a wet ringâ, Israel-lâ a nga digizi ad’uziya. Ben-Hadat amul ma Siri-na mi sut tam kakuluma zlapa ki suma djang akulumei suma dingâ mi. 21 Wani amul ma Israel-lâ mi ndabua, mi tchi akulumeina, mi b’lak pus ma dur ayîna teteng ngeyo, mi tchi azigar suma Siri-na ngingidjip mi.
22 Wani ma djok vun Alona máma mi hulong mba gen amul ma Israel-lâ, mi dum ala: Ang ve tang ad’enga, ang djib’er djivi yam vama ang mba luma, kayam dama hina dedege wani, amul ma Siri-na mba mi hulongî á dur ayîna ki sed’eng ngei!
Ahap mi kus ayîna kus sa dinga
23 Wani suma sunda hamul ma Siri-na a de mi salazina ala: Alona hi Israel-lîna nalo ma ahinad’a. Ni kayam ndata ba, azi kalei kad’enga wana, wani le ei duruzi woi pid’agi ni, gagazi, ei mba kalazi kad’enga. 24 Ki tchetchemba, ang le hina. Ang pat amulei suma ndjunungâ woi pet, ang vrak suma nglo suma dingâ blangâziya. 25 Ang yo azigarâ ablaud’a ndak yam suma a tchazi woina, ang hal akulumeina ki pus mazina ablaud’a ndak yam suma avo’â mi. Bugola, ei i duri azigar suma Israel-lâ woi pid’agi. Gagazi, ei mba kalazi kad’enga. Ben-Hadat mi hum zla mazid’a.
26 Tcha dama ata yi máma hina dedege wani, Ben-Hadat mi i gol azigar mam suma Siri-na, mi i ki sed’ezi avo Afek á dur ayîna ki Israel-lâ. 27 Ahap mi i gol azigar mam suma Israel-lâ mi, mi hazi tena. Bugola, azi i ngruf tazi ki suma Siri-na. Azi vanguvora ad’u mbà d’igi mola haho’îd’a mbà na abo ma irazina, wani suma Siri-na a oî yina woi yam ambasa.
28 Wani ma djok vun máma mi mba gen amul ma Israel-lâ kua, mi dum ala: Gola! Ma didina mi sununï ala: Suma Siri-na a dala: Ma didina nalo ma ahinad’a, mi nga nalo ma pid’a’â d’i. Kayam ndata, an nga ni hang azigar suma ablau ndazina pet abongû. Ata yi máma agi mba wagi ala an ni Ma didina.
29 A le burâ kid’iziya avun taziya. Kur bur ma kid’iziyana a ngruf durâ; Israel-lâ a tchi azigar suma Siri suma asemba 100.000 kur bur ma tuna. 30 Suma a ar 27.000 a ring kur azì ma Afe’â, wani gulumuna mi dris kä kaziya.
Ahap mi tchi nga amul ma Siri-na d’i
Ben-Hadat tamba mi ring mi kal kur azì ma ngolâ, mi kal klavi kur gonga, mi ngei tamu. 31 Azungeî mama a dum ala: Ang huma! Ami humumi ala amulei suma Israel-lâ namulei suma a we hohowa sumina. Ami i tchugumi baru d’a dodora atamiya, ami tchugumi ziyona kelemi d’igi suma dangeina na mi, ami i fami amul ma Israel-lâ. Hina wani, mam mba mi tchang nguo kla! 32 A tchuk baru d’a dodora ataziya, a tchuk ziyona keleziya, a i gen amul ma Israel-lâ. Azi dum ala: Azong mangâ Ben-Hadat mi dala ang tchum mbuo.
Ahap mi dazi ala: Mi nga ki iram tua zu? Mam mi wiyena!
33 Sum ndazina a fe vama simat ma djivina avun Ahap, a ve zla mamba atogo zak, a dum ala: Gagazi, Ben-Hadat ni wiyengâ!
Ahap mi dazi ala: Agi i halamïya! Ben-Hadat mi ndeï woi ata yima ngeid’a. Ahap mi hlum akulo kur pus mam ma dur ayîna.
34 Ata yi máma Ben-Hadat mi de mi Ahap ala: An min hulongông azì mang ma abun hluma. Ang i gus ahligiyeng ngei kur Damas d’igi abun mi gus mamina woi kur Samari na mi.
Ahap mi dum ala: Ar ei djini vuneya. Bugola, an arangû. Azi djin vunaziya, mam aram mi iya.
Alona mi ka sariyad’a yam Ahap yam amangeî mamba
35 Ata yi máma na wat, Ma didina mi he vuna mi ma dingâ tu aduk suma a djogom vunama. Kayam ndata, mi de mi ndrama ala: Ang kanu. Wani ndrama mi min ndi. 36 Wani ma djok vun máma mi dum ala: Kayamba ang ge nga yang kä ad’u vun ma hed’a hi Ma didinina d’uo d’a, ata yima ang wal ki sed’ena, azlona mba mi vang ini. Kid’a ndrama mi wal ki sed’emba, mi ngaf kazlona; azlona mi vum mi.
37 Wani ma djok vun máma mi i fe sama dingâ, mi dum ala: Ang kanu. Sa máma mi kam mbilâ. 38 Ma djok vun máma mi i kak kä avun lovot ta amulâ Ahap mi kal ini kuad’a, mi mbut tam sama dingâ, mi zlup barud’a iramu.
39 Ata yima amulâ nga mi kalâ, ma djok vun máma mi dum ki delem akulo ala: An azong mangâ ni nga ni kur ayî ma durâ, wani sana tu mi ndeï woi ata yima ndjara, mi vanï sama dangeina tu, mi dan ala: Ang gol sa máma. Le mi sut wa ni, ang mba mit blangâmu, d’oze ang mba wuragan bege d’a hapa dudubu hindi. 40 Wani ata yima an azong mangâ nga ni le sunda abo hî abo hî na, sa máma mi ringâ!
Ahap mi hulong dum ala: Ang tanga ka wa sariya manga kangû!
41 Ata yi máma na wat, sa máma mi yo baru d’a mi zlubut iramba woyo. Amul ma Israel-lâ mi wum ala ni ma dingâ tu aduk suma djok vun Alona.
42 Ma djok vun máma mi dum ala: Gola! Ma didina mi sununï ala an dang ala: An hang amul ma Siri-na abong ala ang tchumu, wani ang aram bei tchid’a. Kayam ndata, ni ang tanga ba, mba mit blangâmu, sum mangâ a mba bo balum sum mama mi. 43 Amul ma Israel-lâ mi hulong avo hatam kur Samari, tam tchuk lus, hurum zal mi.
© Azumeina Bible © Alliance Biblique du Tchad, 1999.
