Ndak ka klavandid’a: Djera
1 Ma didina mi de mi Moise ala: Ang i gen Faron, kayam ni an ba ni b’alam hurum kazungeî mama, kayam an nde kahle man suma simata woi adigaziya. 2 Ni kayambala ang mba de zla ndata woi mi grongâ ki grong ngolona ala ni nana ba, an ngop Ezipte-na kahle suma simat suma an lazi adigazina ge? Ni hina ba, agi mba wagi ala an ni Ma didina.
3 Moise azi ki Aron a i gen Faron, a dum ala: Ma didina Alona hi Hebre-nina mi dala: Ang mba noî á ge yang kä avok an Ma didina hina gak mindja ge? Ang ar sum mana a i á kud’uronu. 4 Le ang ar nga sum mana á id’a d’uo ni, ndjivin an mba ni mba ki djera yam andaga manga. 5 Ti mba d’i oî yam andagad’a; sa mba mi wandagad’a woi d’i. Ti mba d’i b’lak ahle magi suma ar abo mogoinina, ti mba d’i b’lak agu magi ma d’uf ma abageina woi pet mi. 6 Ti mba d’i oî kur aziyangû, kur azina hazungeî mangîna pet, kur azina hi Ezipte-na pet mi. Dedei d’a abuyong kabuyong ngolo azi nga yam andagad’id’a, a we nga vama hina na yazi tu d’i.
Bugola, Moise mi nde woi avo hi Faron. 7 Azungeîna hi Faron-na a de mi Faron ala: Ni gak mindja ba, sa máma mba mi lei ndaka hina gagak ke? Ang ar sum ndazina a i kud’or Alo mazina. Ang we nga d’ala ambas meid’a ti b’la’î b’laga d’a d’uo zu?
8 A hulongî ki Moise azi ki Aron gen Faron, mi dazi ala: Agi i kud’urogi Ma didina Alo magina. Wani suma a ina ni nge nge azi ge?
9 Moise mi hulong dum ala; Ami imi ni kazungeî mamina ki momorogei mamina ki gromi suma andjofâ ki gromi suma aropma ki d’uwar mami ma gureina ki ma nglona, kayam ni vun til mami ma ngolâ á subur Ma didina.
10 Faron mi dazi vun ma ngolâ ala: Ar Ma didina mi i ki sed’egiya, kayam an nga ni aragi agi igi ki grogina! Wani ni pid’ak ala agi minigi ná le tchod’a! 11 Wani nga na d’i! Ni agi andjofâ hol ba, igiya, agi i kud’urogi Ma didina! Wana ni vama agi tchenegizina! A digizi woi avok Faron.
12 Ma didina mi de mi Moise ala: Ang hlabong akulo yam ambas sa Ezipte-d’a tala ar djera ti mba kad’u, ti b’lak asuna pet kahle suma a ar abo mogoinina woi ped’u d’a.
13 Moise mi hle totogo mamba akulo yam ambas sa Ezipte-d’a. Ma didina mi mbeï ki simet ma abo ma yorogonina yam ambasa. Simet ma abo ma yorogo máma, mi tin sira kur bur máma gak tcha avin yorogo, mi mba ki djera. 14 Djera ti b’rau woi yam ambas sa Ezipte-d’a pet, avun dabid’a hi haga mata mi. Avok dedei pî, djera mba nga hina yat tu d’i, mba d’i mba bugol hina d’uo mi. 15 Ti oî yam andaga d’a Ezipte-d’a pepet. Yina mbut nduvunda yam andagad’a. Ti b’lak asuna woi pet ki vud’aguna kahlena pet suma a ar abo mogoinina. Hum agu ma d’uf foze asu, mi ar nga kur ambas sa Ezipte-d’a d’i.
16 Faron mi yï Moise azi ki Aron atogo zak, mi dazi ala: An le tchod’a avok Ma didina Alo magina, an le tchod’a avogogi agi mi. 17 Wani ki tchetchemba, agi vad’agi hurugi woi kanu, agi i tchenegi Ma didina Alo magina, ar mi hle ndak ka tcho d’a tchi mat ndata woi kan wü d’a.
18 Moise mi nde woi avo hi Faron, mi i tchen Ma didina. 19 Ma didina mi mbeï ki simet ma ngol ma abo ma fladegenina, mi tor djera atogo zak, mi kottcha kä kur alum ma ngol ma Tchereuna. Kur ambas sa Ezipte-d’a pet djer tu pî ti ar nga d’i. 20 Ma didina mi b’al hur Faron kiki, mi ar nga Israel-lâ á id’a d’i.
Ndak ka zlengîd’a: Nduvunda
21 Ma didina mi de mi Moise ala: Ang hlabong akulo hur alona, nduvunda mba d’i mba yam ambasa. Ni nduvun nda sana mi ndak á dot kabomba.
22 Moise mi hlabom akulo hur alona, nduvun nda i’îlika ti mba yam ambas sa Ezipte-d’a pet gak burâ hindi. 23 Sa nga mi we ndram mbi, sa nga mi djok kei ata yima mam nga kaka kuana d’uo mi gak burâ hindi. Wani b’od’a ti nga ni ata yima Israel-lâ a nga kaka kuana hol.
24 Faron mi yï Moise, mi dum ala: Agi i kud’urogi Ma didina, agi igi ki grogina, wani agi aragi d’uwar magi ma gureina ki ma nglona ka hî.
25 Moise mi hulong dum ala: Na ni ni ang tanga ba, mba hami ahle suma ngat buzuna kahle suma ngat buzu suma ngala á hamizi mi Ma didina Alo mamina zu? 26 Ami mba imi ki d’uwar mamina. D’uwar mami tu pî mba mi ar ka hî d’i. Kayam ami imi ki sed’ezi á kud’or Ma didina Alo mamina. Gak ami mbami sä hî, ami wami nga vama ami mba hamizi á kud’or ki Ma didinina d’i.
27 Wani Ma didina mi b’al hur Faron kiki; Faron mi min arazi á id’a d’i. 28 Faron mi de mi Moise ala: Ang nde woi avo hatanu! Gol tang djivi á hulongî avoron ka hî! Le ang hulongî avoron ka hî d’eyu ni, an mba ni tchangû.
29 Moise mi dum ala: D’igi ang de na, an min hulongî avorong ka hî d’uo mi.
© Azumeina Bible © Alliance Biblique du Tchad, 1999.
