Jakob mi b’e vunam yam groma
1 Jakob mi yï grom suma andjofâ gevemu, mi dazi ala: Agi togogïya! An dagi yam ahle suma a mba mba kagi ndjivina. 2 Agi grona, agi togogïya, agi humugiya, agi humugi zla d’a an abugi Israel nga ni dagizid’a.
3 Ruben, angî goron ma ngolâ.
Ad’eng man nda avoka, an djogongziya.
Ang kal b’oziyongâ ki subura ki sib’ika mi.
4 Angî d’igi mbiyo ma nga mi sulul huhubupma na,
wani ang mba kak ma avo’â d’i,
kayam ang bur kamanda,
ang mbut azang man ma burâ ndjendjed’a.
5 Simeon azi ki Levi ni yogo grotna,
a ndjak vunazi á dur ayî ma tchona.
6 An min ndjak vunan ki sed’ezi kur tok mazi d’a gumunda d’i,
an min ndjunuzi kur tok mazid’a d’i.
Kayam kur hur mazi ma zala azi tchi suma,
kur asa’at mazid’a azi ka amuzleina gigilangâziya.
7 An gazi vuna kayam ayî mazina mi kal ngola heî,
kayam ayî mazi ma djulula kal ngola mi.
An mba ni walazi woi ki sum man an Jakob-ma,
an mba ni b’rawazi woi aduk sum man an Israel-lâ mi.
8 Ni ang Juda ba, b’oziyongâ a mba suburungû.
Ang mba tin abong ad’u azik mang suma djangûna.
Abung groma a mba grif kä avorongû.
9 Ang Juda gorona, angî d’igi azlo ma azong ma tcholï ata yima nduwandina na.
Mi tchuk guguvam mi bur kä;
sama mba mi tcholom akulo ni nge ge?
10 Juda, totogo d’a amula mba d’i prut abong ngi;
totogo d’a te leud’a mba d’i wal ki sed’eng nguo mi,
gak mbad’a hi Sala totogo ndata.
Ni ma suma a mba ge yazi kä avoroma.
11 Ni ma koro mama nga djinda ata guguzlud’ina;
gor koro mama nga djinda ata abuwatna.
Mi nga mi mbus baru mama kä aduk süm guguzlud’a,
mi nga mi mbus baru mam mba ngola kä aduk mbiyo
vut guguzlu d’a hleud’a d’igi buzuna na d’a.
12 Iram mba d’i mbut hleud’a abo süm guguzlud’a;
siyam mba mi mbut hapa abo ambira.
13 Zabulon mba mi kak avun alum ma ngolâ,
ata yima a djin batod’a kuana.
Haga mamba mba d’i dabï ni Sidon.
14 Isakar ni d’igi koro ma ad’engâ na,
mi nga burâ kä aduk kangâna hi d’uwarîna mbà.
15 Mi wala yi máma ni yima djivi ma tuk tad’a,
nandaga d’a djivid’a heî,
mi tin nga domndjolom á zi ahle suma ane’â,
mi ge yam kä á le sun nda magomba.
16 Dan mba mi bak zlad’a aduk sum mama
d’igi andjaf an Israel ma dingâ tu na mi.
17 Dan mba mi mbut ni d’igi gugui ma kur lovotina na,
d’igi magei d’a avun lovota
d’a et akuluma dodogasemba
sama kama mi puk kä kazigam na.
18 Ma didina, an djib’er ala ang nga sud’unu!
19 Gad, suma kula a mba nguyum á durâ,
wani mam mba mi tchol ki sed’eziya,
mba mi b’rawazi woi yayak.
20 Andagad’a hi Aser-ra mba d’i wul ahlena heî;
te mama mba mi mbut ni d’igi tena hamulîna na.
21 Neftali ni d’igi duk ka abagei
d’a nga d’i vut gro suma djivinid’a na.
22 Josef ni d’igi agu ma vut ma nga tchola avun mbiyo ma laud’ina na;
abom nga mi ruî gak mi tchila woi yam gulumuna.
23 Suma yet yeûd’a a mba halam ki zlad’a,
azi mba dur ki sed’emu.
24 Wani agu yeû mamba nga ndira woi ad’enga,
abom nga ved’a ad’enga,
kayam ad’enga hAlo ma sib’ika hi an Jakob-ma,
kayam mam mi ma pola, ahina d’a deng tad’a hi an Israel-lîd’a.
25 NAlona hi an abungâ ba, mba mi ndjunungû,
Alo ma ad’engêm kal petna, mi b’e vunam kangû,
mi b’e vunam kang ki mbiyo ma akulona,
mi b’e vunam kang ki mbiyo ma kä ad’u andagad’ina mi,
mi b’e vunam kang ki grona ki d’uwarâ mi.
26 B’e vun ma an b’angzi kangâ,
mi kal b’e vuna habuyona,
mba mi kak didin d’igi ahuniyô suma a nga adjeu dei gak didina na.
Ar b’e vun máma pet mi kak yam Josef,
yam ma an tinim iram vam aduk b’oziyomina.
27 Benjamin ni ngû ma ayîna,
yorogod’a mam mut vama mam vumina,
fladeged’a nga mi b’rau vama mam vumina.
28 Wana nandjafâ hi Israel ma dogo yam mbàna, wana ni zla d’a abuzi mi dazizid’a. Abuzi mi b’e vunam kazi tutu pet, nge nge pî, mi b’e vunam kamu.
Jakob mi mid’a
29 Bugola, Israel mi hazi vuna, mi dazi ala: An nga ni mit ni mid’a; agi i tozon ni gen abuyon kur zul ahina d’a kur asinena hi Efron ma Het-nid’a, 30 ni d’a Makpela d’a avok Mamre d’ar ra kur andaga d’a Kanan-ndid’a. Abraham mi gus zul ahina ndata zlapa kasinena abo Efron ma Het-na, kayam ti mbut ni yima tos mat mama. 31 Nata yi máma ba, a tos Abraham azi kamamba Sara kua; ni kua ba, a tos Isak azi kamamba Rebeka mi; ni kua ba, an tos Lea mi. 32 Asinena ki zul ahina ndata, Abraham mi guzuzi nabo suma Het-na.
33 Ata yima Jakob vunam dap zla d’a ded’a mi gromina, mi hulong bur kä, mi duk vunamu.
© Azumeina Bible © Alliance Biblique du Tchad, 1999.
