Suma a le sunda kur asine ma guguzlud’ina
1 Jesus mi had’azi kua ala: Leu d’a akulod’a ti hle tat ni d’igi samazì ma mi nde ki yorogo tcholol á hal suma sunda kur asinem ma guguzlud’ina na. 2 Ata yima vunazi ndjak tu ala bur tu ni sile sile na, mi tchuguzi á le sunda kur asinem ma guguzlud’a. 3 Mi ndabu kua ki mid’ei ma de zlad’a, mi we suma dingâ a nga tchola ad’u su’â hawa. 4 Mi dazi ala: Agi i lagi sunda kur asinen ma guguzlud’a mi, an mba ni hagi wurak ka ndaka. Azi i mi. 5 Mi ndabu kua kafat ta falei d’ad’ar. Kid’a afata tchuk siyata, mi le ni hina dedege mi. 6 Mi ndabu kua kafata libina, mi fe suma dingâ a nga tchola hawa. Mi dazi ala: Ni kayam me ba, agi kagagi ka hî yorogo dei gak ki tchetchemba bei le sunda ge? 7 Azi hulong dum ala: Kayam sa hami nga sun ndi. Mi dazi ala: Agi i lagi sunda kur asinen ma guguzlud’a mi.
8 Kid’a afata nik dad’a, sala asine ma guguzlud’a mi de mi sama avunama ala: Ang i yï suma sunda, ang wuragazi yam sun mazid’a. Ang tin ad’ud’a yam suma danana gak mba yam suma a yozi avo’â. 9 Suma mi hazi sunda kafata libina a mba, a fe sile tutu. 10 Suma avo’â a mba, a djib’er ala azi mba fe ini kala, wani azi pet a fe ni sile tutu mi. 11 Ata yima azi ve beged’ina, a nde guroî yam samazina. 12 A dum ala: Suma a le sunda lera tu gid’engâ, ang ndjagazi ki ami suma lami sunda ki ndaka falei dei ki zumalina. 13 Mi hulong ded’a mi ma ding tu adigazi ala: Bäna, an lang nga tcho d’i, ang ndjak vunang ki sed’en ni yam sile d’a tud’a d’uo zu? 14 Ang hle manga, ang iya. An min he suma danana d’igi an hang ang na mi. 15 Djivid’a an le vama hurun mina ki bege manda d’uo zu? Ang le yungôra ni kayambala an ni sama djivina d’a zu?
16 Jesus mi de kua ala: Hina, suma danana a mba mbut suma avo’â, suma avo’â a mba mbut suma danana mi.
Jesus mi de yam á hindid’a yam mad’am ki tchol mamba
(Gol Mar 10.32-34Luc 18.31-34)17 Kid’a Jesus mi i tupa Jerusalem-mba, mi yo mam suma hat suma dogo yam mbàna woi vazi nga mi dazi zlad’a kur lovota ala: 18 Gola! Ei nga tubi kur Jerusalem. Suma a mba han an Gor Sana abo nglo suma ngat buzuna azi ki suma hat gata. A mba kan sariya d’a matna kanu. 19 Azi mba han abo andjaf suma bei wAlona. Sum ndazina a mba lazanu, a mba ton ki blafâ, a mba b’alan akulo ata agu ma b’ala mi. Wani kur bur ma hindina, an mba ni tchol akulo aduk suma matna.
Tchenda hi Jacques azi ki Jean asuzid’a
(Gol Mar 10.35-45)20 Ata yi máma, Zebede groma asuzi ti hut gen Jesus ki grotna. Ti grif kä avoromu, ti tchenem yam va tu. 21 Jesus mi djobot ala: Ndak min ni me ge?
Ti hulong ti dum ala: Ang he vuna mi gron suma mbà wana ala fata ang kak kur leu mangid’a, tu mi kak ata bigang nga ndjufa, ma hina mi kak ata bigang nga gulad’a mi.
22 Wani Jesus mi hulong dat ala: Agi wagi nga vama agi tchenema d’i. Agi ndagagi á tchagi kop ma kid’eî ir ma an mba ni tchuma zu?
Azi hulong dum ala: Ami ndagamiya.
23 Mi dazi ala: Gagazi, agi mba tchagi kop mana, wani á kaka yam bigan nda ndjufa ki d’a gulad’a, ni an ba, mba he d’i, wani yi máma ni yam suma Abun mi minizizi kazina.
24 Ata yima mam suma hat suma dogona a hum hina na, huruzi mi zal yam b’oziyozi suma mbà ndazina. 25 Wani Jesus mi yazi eya, mi dazi ala: Agi wagi suma a nga te yam andjaf suma dingîna a nga tamula kaziya, mazi suma nglo suma kal kazina a nga lazi kad’enga mi.
26 Wani adigagi agi nga na d’i, wani sama lara pî ma min á mbut ma ngolâ adigagina, mi mbut nazong magina. 27 Sama lara pî ma min á mbut ma avo’â adigagina, mi mbut nazong magina. 28 Hina mi, an Gor Sana ni mba nala suma a lan sunda d’i, wani an tanda ni mba ná le sunda mi suma, ná he tan á matna á wurak yam suma ablaud’a mi.
Jesus mi mal ir suma duka mbà
(Gol Mar 10.46-52Luc 18.35-43)29 Kid’a Jesus azi a buzuk kei kur Jeriko-d’a, ablau suma a nga tit ad’umu. 30 Gol wani, suma duka mbà a nga kak kä avun lovota. Kid’a a hum ala Jesus nga mi kala d’a, a er ad’uzi akulo ala: Salamina, ang David goroma, ang wami hohowomiya.
31 Ablau suma a ngobozi ala: Agi bagiya!
Wani azi er ad’uzi akulo kua ad’enga ala: Salamina, ang David goroma, ang wami hohowomiya.
32 Jesus mi tchola, mi yazïya, mi djobozi ala: Agi min ala an lagi ni me ge?
33 Azi dum ala: Salamina, ang malami irami woyo.
34 Jesus mi wazi hohowoziya, mi dozi iraziya. Ata yi máma na wat, irazi d’i mal leyo, a nga tit ad’um mi.
© Azumeina Bible © Alliance Biblique du Tchad, 1999.
