Tchenda hi sama mamarîd’a
1 Ma didina, an ngei tan natangû,
ar an mbut zulona bugol luo d’a.
2 Yam d’ingêr manga ang prud’un ndeyo, ang gan akulo,
ang tin humang ang sud’unu.
3 Ang mbut nahina man nda an ngei tan kuad’a,
ni yima ang he vuna kam ala an i kua teteu á sut tanu na,
kayam angî ahina manda ki gulumun man ma ngei tana.
4 Alo mana, ang prud’un ndei abo suma asa’atna,
abo suma bei d’ingêrâ ki suma murud’umba mi.
5 Salad’a, Ma didina, an tin hurun ni kang angû,
an tin hurun kangî ki gogoron dei.
6 An tin hurun kangî ei kur asun dei,
ni ang ba, ndanï woi kur asunu.
Kayam ndata, an nga ni gileng teteu.
7 Suma ablaud’a a golon ni d’igi vama atchapma na,
kayam angî yi man ma ngei ma ad’engâ.
8 Hurun nga oîd’a ki furîd’a á gilengû,
á suburung burâ ki burâ mi.
9 Ki tchetchemba, an djeng wa mamara da’,
ar ang noyôn ndei d’i,
ata yima ad’engên nga d’uo na,
ang aran ndei d’uo mi.
10 Kayam man suma djangûna a nga de zla d’a tchod’a kanu,
suma a nga kud’ugun á tchid’ina a nga djop tazi kanu.
11 Azi nga dala: Alona mi aram mbeyo;
agi digimu, agi vumu;
sama prud’um mbei abogina nga d’i!
12 Alo mana, ang wal lei dei ki sed’en ndi;
Alo mana, ang mbeï atogo ndjununu.
13 Ar suma a nga tchugun zlad’a kana,
a mbut zulona, a dap peyo.
Suma a nga hal á lan tchod’ina,
ar zulona mi laziya, a mang ngei mi.
14 Wani an tin hurun kangî ki iran fafat,
an mba ni gileng teteu.
15 An mba ni de woi yam d’ingêr manga
ki sut manga burâ ki burâ,
kayam an we nga ndum mata d’i.
16 Salad’a, Ma didina,
an mba ni de woi ni yam sun mang nga atchapa,
an mba ni de woi ni yam d’ingêr manga tu go.
17 Alo mana, ang had’an ni ki gogoron dei,
gak ini an nga ni de woi yam sun mang nga kal teglesa.
18 Alo mana, an djeng wa mamara, yan deî wa abusa,
ang aran dei d’i
tala an tak ad’eng manga mi suma kur atchogoi d’a wanda,
an tak sib’ik manga mi suma kur atchogoi d’a nga d’i mbad’a mi d’a.
19 Alo mana, d’ingêr manga ti kal akulo gak hur alona,
kayam ang lahle suma nglo suma kal papana.
Alo mana, ni nge ba, a mba ngam ki ang nge?
20 Ni ang ba, mbami ndak ka ngola kami ki hohoud’a,
wani ang mba hulong hami arid’a,
ang mba hlan ndei kur zul la yiyika mi.
21 Ang mba han ngol la kala,
ang mba b’lengên hurun kua mi.
22 Hina wani, Alo mana,
an mba ni gileng kadingâ yam d’engzeng manga,
an mba ni hang ngola kadingâ,
ang ma tin tang irat vat yam Israel-lîna!
23 An mba ni suburung ki sawala,
an mba ni gileng ki vunan mi,
kayam ang sud’un ndeyo.
24 An mba ni gileng kur burâ kaf yam d’ingêr manga;
suma a nga hal á lan tchod’ina,
a mbut zulona, a mang ngei mi.
© Azumeina Bible © Alliance Biblique du Tchad, 1999.
