Yor tad’a yam suma a kal ir zlad’a woina
1 Ni zla d’a hohoud’a yam suma a nga
nga huruzi andjege á le tchod’ina.
Ata yima yina fona,
azi ndak vun tcho mazi ndata
ata yima azi nga kad’enga abozina.
2 A nga le d’od’oka
yam asinena hi sumina, a hlumu,
a nga le d’od’oka
yam azina hi sumina, a hlum mi.
A nga hurum suma ki sum mazina,
a nga le sana murud’umba á hle djo mama mi.
3 Kayam ndata, Ma didina mi dala:
Gola! An nga ni nga hurun á mba ki ndaka
yam agi andjaf ma hina na.
Agi mba fud’ugi yagi woi d’i,
agi mba tid’igi yagi akulo herengêleng nguo mi,
kayam yi máma ni yima ndaka.
4 Kur bur máma a mba tinigi ndala,
a mba lazagi ala:
Ei b’lagei wa woi ki irei fafat,
Ma didina mi he wa andaga meid’a mi suma dingâ,
mi he wa asine meina mi suma bei hum vuna mi.
Ni kayam me ba, a hurumi ge?
5 Ni kayam ndata ba, sa magi tu pî
mba mi fe andaga d’a suma hi Ma didinina
a mba b’rawat aduk tazid’a d’i!
Suma a tchi tuguyod’a ki zlad’a hi ma djok vunid’ina
6 A nga dan ala:
Ang ar bei djok vuna,
ar ang djok vun ma hina na d’i,
ar zulona mi lami d’i.
7 Agi suma hi Jakob-ma,
wana ni zla d’a agi data zu?
Ma didina hurum mi zal atogo zu?
Mi ndak á le hina zu?
Na ni zla manda ni djivid’a
ir sama mi tit yam d’ingêrina d’uo zu?
8 Wani Ma didina nga mi dagiya:
Agi tchologi djangûna ki sum mana,
agi fogogi barud’a woi ata suma a hulongî avo
ata yima ayîna ki halasina.
9 Agi digigi aropma hi sum manina woi
kur aziyazi ma azi huruzi vum heîna,
agi nga yogi ahle suma djivi suma
an hazi abo grozinina woi burâ ki burâ.
10 Agi tchologi akulo, agi igiya!
Nga ni yima tuk tad’a d’i!
Kayam tcho magid’a,
b’lak ka ngola nga d’i mba kagiya,
ni b’lak ka kal teglesa.
11 Wani le sama ka zlad’a
mi mba mi djok vuna ala:
An nga ni dagi zlad’a yam süm guguzlud’a
yam süm ma ayîna mi ni,
sa máma mba mi arî
ma djok vuna hi sum ndazinina.
Alona mba mi tok Israel suma a mba sut teina
12 Ma didina mi dala:
Agi andjafâ hi Jakob-ma,
an mba ni togogï ki zla tagi pet,
an mba ni togogi agi Israel-lâ ad’ugi d’a ara.
An mba ni togogi
d’igi a tok tumiyôna kur kangâ mazina na,
d’igi a tok d’uwarâ ata yam ma te hatna na.
Agi mba togogi ni tok ka ablau d’a vuna kat gandjaud’a.
13 An ma mba ni mal lovotina mba ni tit avorogiya,
agi mba malagi lovota á i avun agre’â,
agi mba buzugugi woi abua.
An Ma didina amul magina mba ni tit avorogiya.
© Azumeina Bible © Alliance Biblique du Tchad, 1999.
