ALONA MI YI JEREMI
1 Wana ni zlad’a hi Jeremi Hilkiya goromid’a. Mam mi ma ding tu aduk suma ngat buzu suma a nga kaka avo Anatot yam ambas sa Benjamin-ndina. 2 Ma didina mi dum zlad’a kur biza d’a dogo yam hindi d’a Josiyas Amon goroma amul ma Juda-na nga mi tamulid’a. 3 Mi dum zlad’a kur atchogoi d’a Jojakim Josiyas goroma amul ma Juda-na nga mi tamulid’a, gak mba kur dabid’a hi biza d’a dogo yam tud’a hi Sedekiyas Josiyas goroma amul ma Juda-nid’a, gak mba kur atchogoi d’a a yo suma Jerusalem-ma magomba kur til ma vahlâ hi biza ndatina.
Alona mi yi Jeremi á de zla mamba woyo
4 Ma didina mi dan ala: 5 An wangî avok ka bei an kolong kur asung ba d’a; avok ka bei ang ndeï woi kur asung ba d’a, an tining irang vangû, an tining man ma djok vuna mandjaf suma.
6 An hulong dum ala: Salad’a, Ma didina, an ni gogorâ tua, an ndak nga á de zlad’a aduk suma d’i.
7 Wani Ma didina mi dan ala: Ar ang dala angî gogorâ d’i. Kayam ang mba i ata suma pet suma an mba ni sunung atazina, ang mba dazi woi yam ahle suma an mba ni hang vuna kazina pet mi.
8 Ma didina mi dan kua ala: Ar ang lazi mandarazi d’i, kayam an nga zlapa ki sed’eng á sud’ung ngeyo. 9 Bugola, Ma didina mi mat abom mi don vunanu, mi dan ala: Gola! An tining wa zla manda avunangû. 10 Gola! An tining ini yam andjaf suma ki leud’a tala ang pat teyo, ang to kä woyo, ang b’lak keyo, ang pleî woyo, ang min akulo, ang pe mi d’a.
Abo agu amandena ki dei ma yahlena
11 Ma didina mi dan ala: Jeremi, ang we ni me ge?
An hulong dum ala: An we agu amandena.
12 Ma didina mi dan kua ala: Jeremi, ang we djivi tetet, kayam an nga ni b’at tan á ndak vun zla manda.
13 Ma didina mi dan kua yam á mbàd’a ala: Jeremi, ang we ni me ge?
An hulong dum ala: An we dei ma yahlena mi nga tinda abo ma norâ, mi lengî kä keya.
14 Ma didina mi hulong dan ala: Nabo ma norâ ba, ndaka mba d’i tcholï ti wet tei yam suma a nga kaka kur ambasina pet.
15 Ma didina mi dan kua ala:
Gola! An nga ni yï suma kur leu d’a abom ma norîd’a halang.
Azi mba mba.
Nge nge pî, mba mi tin zlam mamba
avun agrek ma Jerusalem-ma, huyok gulumun matna,
a mba nguyum mbei d’uhl,
avun azì ma nglo ma kur ambas sa Juda-d’ina pet mi.
16 An mba ni kazi sariyad’a kazi yam asa’at mazid’a,
kayam a aran ndei
a ngal dubang ma his djivid’ina malo ma dingâ,
a grif kä avok sun nda azi lat kabozid’a.
17 Wani ang Jeremi, ang djin d’i’â furungû,
ang tchol akulo, ang i dazi woi
yam ahlena pet suma an mba ni hang vuna kazina.
Ar ang zlak avorozi tala an zlagang avoroziya d’a d’i.
18 Gola! An tining ini yam ambas ndata pet
d’igi azì ma ngol ma ad’eng ma ngunguna na,
d’igi grak ka kawei ma wurana na,
d’igi gulumun ma kawei ma hleuna na
á dur kamulei suma Juda-na ki mazi suma nglona
ki mazi suma ngat buzuna ki suma kur ambasina pet mi.
19 Azi mba durung ayîna,
wani azi mba kus kang ngi,
kayam an nga zlapa ki sed’eng á sud’ung ngeyo.
An Ma didina ni de na.
© Azumeina Bible © Alliance Biblique du Tchad, 1999.
