Jonatan mi ndjun yam David
1 Saul mi de mi goroma Jonatan azi kazungeî mama pet ala a tchi David teyo. Wani Saul goroma Jonatan hurum ve David heî. 2 Jonatan mi de mi David ala: Abun Saul nga mi halang á tchid’a. Ndjivin ang gol tang djiviya, ang ngei tang ngei dei ad’u va. 3 An mba ni nde woi ni tchol gen abun abagei ata yima ang nga kuana, an mba ni dum zla manga, an mba ni we zla d’a mam mba mi data, an mba ni dangziya. 4 Jonatan mi de zla David djivid’a avok abum Saul, mi dum ala: Ang amulâ, ar ang le tchod’a á kak djangûna kazong mangâ David ti, kayam mam lang nga tchod’a d’i, wani mi le ni djivid’a ki sed’eng ngö. 5 Mi he tam mbeyo, mi tchi ma Filistê-na. Ma didina mi le ki sed’em mi sut Israel-lâ pet sut ta ngola. Ang tang we ki irangû, ang le furîd’a. Ni kayam me ba, ang le tchod’a á tchi ma bei zlad’a kama David bei lovod’ot ke?
6 Saul mi hum vun Jonatan, mi gun tam ki simiyê Ma didina ala: Ma didina ni Ma bei matna; David va mba mi lum mbi. 7 Jonatan mi yi David, mi dum zla ndata pet. Bugola, mi mbamï gen Saul; David mi ar kaka abo Saul kur sun mamba d’igi avok deid’a na.
Mikal ti sut David tei abo Saul
8 Ayîna mi tchol tchol la dinga. David mi ndabu á dur ayîna ki Filistê-na, mi kus kaziya, mi tchazi ngola; a ring avoromu. 9 Ata yi máma muzuk ma tcho ma tcholï ata Alonina, mi ve Saul; Saul mi nga kaka klavi kasap mamba abomu. David nga mi bu adingâ. 10 Saul mi min ala mi ngruvum asapa atam huyok gonga, wani David mi fut tam mbeyo. Saul mi pe asapa huyok gonga tip; kur andjege ndata David mi ring mi sut tamu.
11 Saul mi tchuk suma avo hi David á ndjolom á tchum yorogo. Wani Mikal atchad’a hi David-ta, ti mba d’i dum ala: Ang le ring andjege hî d’uo ni, a mba tchang yorogo. 12 Ti sirim mbei abu ir fenetred’a; David mi ring mi iya; ni hina ba, David mi sut tamu.
13 Mikal ti hle filei ma a yum ala Terafim-ma, ti gum kä yam azangâ, ti tchugum bak b’ëd’a kä kamu, ti d’ud’um ki baruna. 14 Kid’a Saul mi sun suma á veï David-ta, ndat ti dazi ala: Mi nga tugud’eid’a. 15 Saul mi hulongôzï ala a i golomu, mi dazi ala: Agi hlandji kazang mama, kayam an tchumu. 16 Suma sunda a hulong a mba a gol wani, Terafim-ma mi nga ged’a yam azangâ ni mamu, bak b’ëd’a nga tchuka kamu.
17 Saul mi de mi Mikal ala: Ni kayam me ba, ndak lan lemba ndak ar man ma djangûna mi sut tam ge?
Mikal ti hulong de mi Saul ala: Mi dan ala: Le ndak aran an i d’uo ni, an tchagu.
David azi ki Saul a nga Nayot
18 Ni hina ba, David mi ring mi sut tamu, mi i gen Samuel avo Rama, mi dum ahlena pet suma Saul mi lazina. Bugola, mi i ki Samuel, a kak sä Nayot. 19 A mba de mi Saul ala: Gola! David mi nga kaka Nayot go ki Rama. 20 Saul mi tchuk suma á veï David. Azi wades suma djok vuna a nga djok vuna, Samuel mi nga avoroziya. Muzu’â hAlonina mi ve suma hi Saul-lâ, azi tazid’a a nde djok vun Alona mi! 21 A mba de zla ndata mi Saul; mi tchuk suma dingâ; azi nde djok vun Alona mi. Mi tchuk suma yam á hindid’a, a djok vun Alona hina mi. 22 Ata yi máma Saul tamba mi i Rama, mi mbaza avun golong nga ngol la so d’a Seku-d’a, mi djop ala: Yima Samuel azi ki David a nga kuana ni lara ge?
A hulong dum ala: A sä ni Nayot go ki Rama. 23 Saul mi ge tam mi i iram abo ma Nayot-na go ki Rama. Muzu’â hAlonina mi vum mi; nga mi tit glovot nga mi djok vun Alona gak mi mbaza Nayot go ki Rama. 24 Mi fok baru ma atama woyo, nga mi djok vun Alona avok Samuel, mi bur kä andaga gandila kur falei ndata gak andjege. Ni hina ba, a nga dala: Saul pî, mi nga aduk suma djok vun Alona mi zu?
© Azumeina Bible © Alliance Biblique du Tchad, 1999.
