Ma didina ni Ma ad’engêm kal petna
1 Agi gilegi Ma didina,
kayam ni vama djivina á gile Alo meina ki sawala,
kayam ni vama lei tei furîd’a á gilem d’igi ndak kam na na.
2 Ma didina nga mi hulong min Jerusalem akulo,
nga mi tok Israel suma a i mbeïd’ina avo,
3 nga mi b’leng hur suma huruzi b’la’â,
nga mi djinizi mbilizi mi.
4 Mam nga mi ndum ablaud’a hi tchitchiud’id’a,
nga mi tinit simina pepet mi.
5 Salad’a ni ma ngolâ,
mi nga kad’eng nga kal papad’a,
d’al mama ni ma bei dabid’ina mi.
6 Ma didina nga mi ndjun suma lulumana,
nga mi hulong yam suma asa’atna kä gak andaga mi.
7 Agi hlagi sawala mi Ma didina ki subura,
agi gilegi Alo meina kadingâ.
8 Nga mi ka d’ugula akulo,
nga mi hlalona á se yam andagad’a,
nga mi deî asuna akulo yam ahuniyôna mi.
9 Nga mi he tena mi d’uwarâ;
ata yima gro gagauna a nga tchina, mi hazi tena mi.
10 Nga nad’enga hakulumid’a ba,
tam mbi lum djivid’a kat ti.
Nga ni ringâ hi sanina ba,
tam mbi lum djivid’a kam mbuo mi.
11 Ma didina tam nga d’i lum djivid’a
ni yam suma a nga lum mandarama,
ni yam suma a tin huruzi
yam o mam mba didindina mi.
12 Ndak Jerusalem, ndak subur Ma didina!
Ndak Siyon, ndak gile Alo ma’â!
13 Kayam nga mi sira kawei ma avun aziya’â,
nga mi b’e vunam yam grok suma kuru’â,
14 Nga mi mba ki b’leng nga halasa yam ambas maka,
nga mi hobok kawu ma djivi ma kalâ mi.
15 Nga mi sun vun mam ma hled’a yam andagad’a;
zla mamba nga d’i ring atogo zak mi.
16 Nga mi yagï nesâ kä
d’igi baru d’a hap pa titila na,
nga mi yagï mbad’ï
d’a ab’leng nga heî d’a hapa kä
d’igi butna na,
17 nga mi yagï mogoi mama kä kukus.
Ni nge ba, mi ndak á tchol
avok ab’leng mamba ge?
18 Nga mi de zlad’a, a nga lau woyo,
mi le simetna, mbina mi djang mi.
19 Nga mi tak zla mamba woi mi Jakob,
nga mi he gat mamba ki nga hur mama mi Israel.
20 Mi le nga hina kandjaf suma dingâ pet ti,
a we nga nga hur mama d’uo mi.
Agi gilegi Ma didina!
© Azumeina Bible © Alliance Biblique du Tchad, 1999.
