Puka hi Babilon-nda
1 Wana ni zla d’a a dat yam hur ful ma avun alum ma ngolîd’a:
D’igi mbirlimba ti kal abo ma sutna na,
ma djangûna mi tcholï yam ambas sa ti mbut suma mandarîd’a,
nga mi djï hur fulâ.
2 Vama tcho ma kal teglesâ mi nde tam mbei iranu.
Ma mbut ira nga mi mbut ir suma,
ma b’lak yina nga mi b’lak yina mi.
Ma didina mi dala:
Agi suma Elam-ma, agi igiya!
Agi suma Mede-na, agi i nguyugi azina á durâ!
An nga ni d’el vun zam tad’a mi.
3 Kayam ndata, furun nga mi tanu,
ndaka nga d’i lan d’igi ndaka ti latcha d’a vuta na,
tcha d’a tatad’a ti d’elen bei hum zlad’a,
mandarâ mi d’elen á we yina mi.
4 Vunadigan ndi pat fek, mandarâ mi vanu,
fladege d’a an nga ni le furîd’a kuad’a
d’i mbut ni fladege d’a ti lan mandarîd’a.
5 A min tabulâ, a tin sama ndjola,
a nga te, a nga tche.
Ata yi máma na wat a nga yazi ala:
Agi suma nglona, tchologi akulo,
pruzugi mboriyona mbina.
6 Ma didina mi dan ala:
Ang i tin ma ndjola,
ar mi de vama mam mba mi wuma!
7 Le mi wakulumeina a nga tan pus ma dur ayîna
d’oze suma a tit ki korona
d’oze suma a tit ki djambalina ni,
ar mi gol tam djiviya!
Gagazi, ar mi gol tam djiviya!
8 Mi er ad’um akulo ala:
Salana, an nga tchola ata yi man ma ndjola faleya,
an nga tchola ata yi man ma ndjola andjege dei gak yima fod’a.
9 Gol wani, an we sana mi djak kur pus ma akulumeina
nga mi djïya, mi er ad’um akulo ala:
Babilon ndi puk wa! Babilon ndi puk wa!
Filei mat ma tcheta pepet
mi wizek wa kä woi andaga gegeleng!
10 Agi man suma a togi woi
d’igi sana mi to awuna kä ambid’ak na na,
wana ni vama an humum avun
Ma didin ma ad’engêm kal petna, Alona hi Israel-lîna,
ni dagizi wana.
Va mi le kur andjeged’ina ni me ge?
11 Wana ni zla d’a a dat yam Duma-d’a:
An hum dela d’i tcholï Seir, ti dan ala:
Ma ndjola, va mi le andjege ni me ge?
Ma ndjola, va mi le andjege ni me ge?
12 Ma ndjola mi hulong humba ala:
Yorogod’a nga d’i mba,
wani andjeged’a ti nga tua.
Le agi min humba ni, agi mbeyegï bur ma dingâ.
Suma Dedan-na ki suma Kedar-râ a ringâ
13 Wana ni zla d’a a dat yam Arabi-d’a:
Agi suma Dedan suma tid’igi ki djambalina,
agi mba burugi sä woi abagei Arabi.
14 Agi suma Tema-na,
agi mbeyegï ki mbina mi suma vunazi sona,
agi d’ugulogi vun suma ringâ ki tena mi.
15 Kayam azi nga ring abo mbigeu d’a fiyaka,
abo mbigeu d’a nga pata woid’a,
abo yeû d’a nga ndira woi á yetid’a,
abo ndaka hayî ma durîd’a mi.
16 Gola! Salad’a mi dan ala: Kur bur ma dabid’a hi biza d’a tud’a, subura hi suma Kedar-rîd’a mba d’i dap peyo. 17 Suma gangrang suma yet yeûd’a hi suma Kedar-râ a mba arî akid’eid’a. Kayam an Ma didina Alona hi Israel-lîna ni de da’!
© Azumeina Bible © Alliance Biblique du Tchad, 1999.
