Jeremi mi gus asinena tu
1 Ma didina mi de zlad’a mi Jeremi kur biza d’a dogo d’a Sedekiyas amul ma Juda-na nga mi tamulid’a, ni kur biza d’a dogo yam klavandi d’a Nebukanezar nga mi tamulid’a mi. 2 Ata yi máma azigar suma Babilon-na a mba ngui Jerusalem, ma djok vun Alona Jeremi mi nga kur gong nga dangeina kur azì ma amula hamul ma Juda-na. 3 Ata yima Sedekiyas amul ma Juda-na mi gum dangeinina, mi dum ala: Ni kayam me ba, ang djok vuna ala: Ma didina mi dala: Gola! An nga ni hazì ma ngol ma wana abo amul ma Babilon-na, mba mi hlumu. 4 Sedekiyas amul ma Juda-na mba mi sut tei abo suma Babilon-na d’uo, a mba hum abo amul ma Babilon-na, mba mi wumu, mba mi dum zlad’a woi avunam mbambak. 5 Amul ma Babilon-na mba mi i ki Sedekiyas Babilon, mba mi kak sä kua gak bur ma an mba ni duma. Le agi durugi ayîna ki suma Babilon-na pî, agi mba kuzuzi d’uo ge?
6 Jeremi mi dala: Ma didina mi dan zlad’a ala: 7 Gola! Hanamel abung ma dingâ Salum goroma nga mi djï geveng á dang ala: Ang gus asine man ma sä Anatot-na, kayam ang nga ki lovota á mbud’um á hlumu.
8 Kayam ndata, Hanamel abun ma dingâ goroma mi mba geven kur atrang nga dangeina d’igi Ma didina mi de na. Mi dan ala: An nga ni tchenengû, ang gus asine man ma sä Anatot ma sä yam andagad’a hi suma Benjamin-nid’ina, kayam ang nga ki lovota á mbud’um á hlumu. Ang guzumu.
Ata yi máma an wala ni zlad’a hi Ma didinid’a.
9 An gus asinena abo Hanamel abun ma dingâ goroma mam ma sä Anatot-na, an guzum ki bege d’a hapa dogo yam kid’iziya. 10 An ni b’ir mbaktum mba gusa kä, an tum tampongâ kad’u, an yi suma glangâsâ, an nga bege d’a hapa ki kilona mi. 11 Bugola, an hle mbaktum mba ami lami ki gusa d’a an tumut tampongîd’a d’igi gata de na, zlapa ki d’a ding nga vunat bei dukid’a. 12 An he mbaktum ndata mi Baruk Neriya gorom ma Mäseya gorom ngolonina avok Hanamel abun ma dingâ goroma, avok suma glangâs suma a tin abozi kur mbaktum mba gusina, avok Juif suma a nga kur atrang nga dangeinina mi. 13 An he vuna avorozi mi Baruk ala: 14 Ma didin ma lahlena petna, Alona hi Israel-lîna, mi dala: Ang ve mbaktum mba a le ki gusa d’a an tumut tampongîd’a ki d’a vunat bei dukid’a djak, ang tchuguzi kä kur dei ma lubuna kayambala a ngomozi tatâ d’a. 15 Kayam Ma didin ma ad’engêm kal petna, Alona hi Israel-lîna, mi dala: Burâ nga mi mba, a mba gus azina, asinena ki guguzlud’a kua kur ambas sa wanda.
Tchenda hi Jeremi-d’a
16 Bugol la an he mbaktum mba gusa mi Baruk Neriya goroma ta d’a, an tchen Ma didina ala: 17 Salad’a Ma didina, ang ma lakulod’a kandagad’a ki sib’ik mang nga kal teglesa ki bigang nga zid’a kang akulo zid’a, vama mi hlang abod’ina nga d’i. 18 Ang nga tak suma manga woi gak kur atchogoi d’a dubid’a, ang nga hulong wurak grod’a yam tchilad’a habuyozid’a. Angî Alo ma ngolâ, angî ma sib’ika. Simiyêng ala Ma didin ma ad’engêng kal petna. 19 Angî ma ngolâ kur d’alâ, ma ad’engâ kur sunda mi. Ang irang nga tinda yam tita hi sumid’a á wurak nge nge pî yam tit mamba, yam sun mam mba mi lata mi.
20 Ang nde kahle suma yoyouna kahle suma atchapma woi yam andaga d’a Ezipte-d’a gak ini. Aduk Israel-lâ, aduk suma dingâ mi, ang he simiyêng ngola gak ini. 21 Ang buzugï mang suma Israel-lâ woi kur ambas sa Ezipte-d’a kahle suma yoyouna kahle suma atchapma ki sib’ik mang nga kal teglesa ki bigang nga zid’a kang akulo zid’a, ang lahle suma mbut suma mandarâ mi. 22 Ang haziya wa ambas sa ang gun tang kat mabuyozi ngolo á hazizid’a. Nambas sa ambira ki mbul ayuma a nga sor kä kuad’a mi. 23 Azi mba, a hlad’u, wani a humung nga vunang ngi, a tit nga yam gat manga d’i, a le nga ahle suma ang hazi vuna kazi á led’ina d’uo mi. Ni kayam ndata ba, ang mba ki ndak ka wanda kazi wana.
24 Gola! A nga mbu andagad’a ad’u azì ma ngol ma wana á hlumu. A mba hazì ma ngol máma abo suma Babilon suma a nga durum ayînina. A nga hal á hlum kayî ma durâ ki baktarad’a ki tugud’ei d’a tcho d’a tchi matna mi. Zla d’a ang data ti ndak wa, ang nga golot ki irang mi.
25 Wani Salad’a Ma didina, ang dan ala: Ang gus asinena ki bege d’a hapa, ang yo suma glangâsâ... Gola! A nga hazì ma ngol ma wana abo suma Babilon-na!
Ma didina mi hulong humba mi Jeremi
26 Ma didina mi de mi Jeremi ala: 27 An ni Ma didina Alo ma yam suma petna. Vama hlan abod’ina mi nga zu? 28 Kayam ndata, an Ma didina ni dala: Gola! An nga ni hazì ma ngol ma wana abo suma Babilon-na, abo Nebukanezar amul ma Babilon-na. Mam mba mi hlumu. 29 Suma Babilon suma a nga durum ayînina, a mba kal kuru, a mba dom akud’a, a ngalam mbei kazuwei suma yam gongîyona akulo suma a nga ngal dubang ma his djivid’ina mi Bäl kua a nga he he d’a hawa d’a süm guguzlud’a kua malo ma dingâ á zalan ki huruna woi mi.
30 Ma didina mi dala: Israel-lâ ki suma Juda-na a tin ad’ud’a á le tchod’a avoron ni ki gugurei tazi dei, a zalan hurun ki sun nda a lat kabozid’a mi. 31 Kayam azì ma ngol wana nga mi djiwin ayî mana ki hur man ma zala akulo, tinï ad’ud’a ni kid’a a minimba dei gak ini. Kayam ndata, an nga ni hlum mbei avoronu! 32 An le hina kayam tcho d’a Israel-lâ ki suma Juda-na a lat á zalan ki hurunda. Sum ndazina kamulei mazina ki mazi suma nglona ki mazi suma ngat buzuna ki mazi suma djok vuna ki suma a nga kaka Juda-na ki suma a nga kaka avo Jerusalem-ma a le na mi. 33 Wani a ar zla d’a a mbut irazi iranda ta, a han ni huyogoziya. A nga had’azi ki yorogo dei wan pî, a nga hum hat ndata d’i. 34 A nga tin filei mazi ma ndjendjed’a kur gong nga a kud’uron kuad’a á mbud’ut ndjendjed’a. 35 A nga min yima nding ma kud’ora mi Bäl kur hor ra Ben-Hinom-mba á he grozi suma andjofâ ki grozi suma aropma vama ngat buzu ma ngala mi Molok mi. Ni vama an hazi vuna kam mboze mi tchol nga ata djib’er manda d’uo na. A nga le sun nda ndjendje d’a hina d’a á zut suma Juda-na á le tchod’a.
36 Ki tchetchemba, an Ma didina Alona hi Israel-lîna nga ni de zlad’a yam azì ma ngol ma agi nga dagi kam ala: A mba hum abo amul ma Babilon-na, a mba kus kam kayî ma durâ ki baktarad’a ki tugud’ei d’a tcho d’a tchi matna na ala: 37 Gola! An mba ni togozï kur ambas sa lara ge pet ta an digizi woi kur kayî mana ki hur man ma zal ma gugulu’îd’a, an mba ni hulong mbazi ka hî kur yima wana, an mba ni kagazi kur bei va mi lazi ba. 38 Azi mba mbut sum mana, an mba ni arî Alo mazina mi. 39 An mba ni hazi hur ma tuna á tit kur lovot ta tud’a á lan mandaran burâ ki burâ tala azi kak ki djivid’a, grozi suma blogozina a kak ki djivid’a mi d’a. 40 An mba ni djin vun Ma djin ma didina ki sed’eziya, an mba ni wal lei ki sed’ezi d’i. An mba ni lazi djivid’a, an mba ni kal mandar mana kuruziya, kayambala azi wal lei ki sed’en nduo d’angû d’a. 41 Tan mba d’i lan djivid’a á lazi djivid’a, an mba ni kagazi kur ambas sa wanda ki hurun tu ki muzugan tu mi.
42 Ma didina mi de kua ala: D’igi an mba ki ndak ka ngola yam sum ndazina hina, an mba ni mba ki djivi d’a an dat kazid’a hina dedege mi. 43 A mba gus asinena kur ambas sa agi nga dagi kat ala: Ni ful la suma d’oze d’uwarâ mi nga kua d’uo, a nga hat abo suma Babilon-na mi d’a. 44 A mba gus asinena ki beged’a, a mba b’ir mbaktum mba gusa, a mba tumut ki tampongâ, a mba yi suma glangâsâ yam ambasa hi suma hi Benjamin-nid’a kazì ma ngui Jerusalem-ma, kur azì ma nglo ma Juda-na, kur azì ma nglo ma yam ahinad’ina, kur azì ma nglo ma yam andaga d’a abo tat tud’a, kur azì ma nglo ma abo ma sutnina mi. Kayam an mba ni hulongî ki mazi suma a yozi magombina avo. An Ma didina ni de na.
© Azumeina Bible © Alliance Biblique du Tchad, 1999.
