Azigar ma d’engzengâ hi Jesus Christ-sâ
1 Kayam ndata, ang gorona Timote, ar ang sira kur suma d’a zlabei tu ki Jesus Christ-sa. 2 Ahle suma ang humuzi avunan avok suma glangâsâ ablaud’ina, ang hahle ndazina abo suma d’engzeng suma a ndak á had’azi mi suma dingîna mi.
3 Ar ang fe ndaka zlapa ki sed’en d’igi azigar ma d’engzengâ hi Jesus Christ-sâ na. 4 Azigar ma dur ayîna nga mi tin hurum yam vama blogoma d’i, kayam mi min á le mam ma ngolâ tam djivid’a. 5 Hina mi, sama nga mi ring ata yima lunina, le nga mi ring ata yat tuo ni, a nga wuragam mbi. 6 Sama nga mi le sunda kur asinena ki ndakina, ni mam ba, mi te vud’agu ma avo’â. 7 Ar ang djib’er yam zla d’a an data, kayam Salad’a mba mi hang ned’a á wäd’u ahlena pet.
8 Ang djib’er yam Jesus Christ ma ad’u andjafâ hi David-na ma mi tchol akulo aduk suma matnina, ni ma an nga ni tchum walam mbei kur Zla d’a Djivid’ina. 9 Kayam zla ndata, an nga ni fe ndaka gak a djinin ki kindjingâ d’igi sama sulu’â na. Wani zlad’a hAlonid’a a djinit nga d’i. 10 Kayam ndata, an ve tan ad’enga kur ahlena pet yam suma Alona mi manazina, kayam azi fe sut ta Jesus Christ nga mi hat mi sumid’a, zlapa ki subur ra didinda mi.
11 Zla ndata ni zla d’a irata:
Le ei boi zlapa ki mamu ni,
ei mba kagei zlapa ki mam mi.
12 Le ei vei tei ad’enga ni,
ei mba tei leud’a zlapa ki mam mi.
Le ei aram mbeyo ni,
mam mba arei woi mi.
13 Le ei ni suma bei d’engzenga ni,
mam mi Ma d’engzengâ;
mi ndak á tin vunam yam tam mbi.
Ma le sun ma a kuguma
14 Ang gazi humazi yam zla ndata, ang gad’azi avok Alona ala ar azi tchi tuguyod’a yam zla d’a hawa yaka d’i. Ni zla d’a nga d’i ba suma a humutna woid’a. 15 Ang he tang mAlona d’igi sama ndak avorom ma le sunda bei zulona ba ma väd’u zla d’a gagazid’a ata yat d’ingêrâ na. 16 Wani ar ang hazigang mi zla d’a de d’a hawa yak ka ndjak nga ki he gagazid’a d’uo d’a. Ni kayam zla d’a hina d’a ba, suma a mba wal lei kAlona ngola. 17 Hat mazid’a mba d’i i avogovok d’igi mbil ndod’ina na. Himene ki Filet a nga aduk sum ndazina. 18 Azi ar zla d’a gagazid’a woyo, a nga dala tchola hi suma matnid’a kal wa da’, a nga mbut yam he gagazid’a hi suma dingîd’a kä. 19 Wani ad’u ge d’a Alona mi gata, ti nga tchola ngingring. Zla mam mba a b’irit ki geunid’a ti dala: Salad’a mi we sum mama; a b’ir kua ala: Sama lara pî ma nga mi yi simiyê Salad’ina, ar mi wal lei ki tchod’a.
20 Kur gong nga ngola duguyona a nga, ni duguyo suma lora ki suma a lazi ki kawei ma hapmina hol li, wani duguyo suma aguna ki suma lubuna a nga mi. Duguyo suma hud’a a nga, suma bei hud’a a nga mi. 21 Le sama wal tam mbei kahle suma tcho suma an dang kazina ni, mam mba mi mbut ni dei ma djivi ma Salama mi ndak á le sun nda djivi d’a lara ge pet ki sed’ema. 22 Ang wal lei ki d’od’ok ka tetenga hazungeînid’a. Ar ang hal d’ingêra ki he gagazid’a ki od’a ki b’leng nga halasa zlapa ki suma a nga yi Salad’a ki hur ma tunina. 23 Wani ang noî djop pa lilid’a woyo. Ang we ni djop pa lilid’a ba, nga d’i mba ki yalâ. 24 Ar azongâ hi Salad’ina mi yal li, wani mbeî mi ka’î sama le yam suma petna. Ni sama ndak á hat suma ki ve tad’ina, 25 ni ma nga mi gat suma tchila yam zlad’a ki lulumad’ina, dam Alona mba mi mbud’uzi huruzi á we zla d’a gagazid’a tetet kla ge. 26 Azi mba mba kur we d’a irata á buzuk kei kur dauna hi Diable ma vazina, á le minda hAlonid’a mi.
© Azumeina Bible © Alliance Biblique du Tchad, 1999.
