1 Wana nandjaf suma Ma didina mi arazi a kak kur ambasa á kuk ki Israel-lâ suma pet suma a we nga ayî ma durâ hi suma Kanan-na d’uo na. 2 Mi le hina kayam andjaf Israel suma kur atchogoi ndatina a we ayî ma durâ mi, kayam azi wum nga avok ki. 3 Suma a arazi kaka kur ambasina namulei suma Filistê suma vahlâ, suma Kanan-na, suma Sidon-na ki suma Hef suma a nga kaka yam ahina d’a Liban-ndina pet, tinï ad’ud’a yam ahina d’a Bäl-Hermon-nda dei gak mba avun agre’â hi Hamat-na. 4 Ma didina mi ar andjaf sum ndazina hina á kuk Israel-lâ á we na ni a mba ge yazi kä ad’u vun ma he ma mam Ma didina mi hum mabuyozi ngolo avun Moise-sâ ko zi ge? 5 Israel-lâ a ar kaka aduk suma Kanan-na ki suma Het-na ki suma Amor-râ ki suma Peris-sâ ki suma Hef-fâ ki suma Jebus-sâ mi. 6 Azi vik grozi suma aropma, azi he grozi suma aropma mi grozi suma andjofâ, a nga kud’or alo mazina teteng mi.
Ma ngol ma avok sumina Otniyel
7 Israel-lâ a le sun nda Ma didina tam nga d’i lum djivi kat tuo d’a, a nga kud’or alo ma a yum ala Bäl-lâ kalo d’a a yat ala Asera-d’a. 8 Ma didina hurum zal ata Israel-lâ ngola, mi hazi woi abo Kusan-Risatayim amul ma Mesopotami-na. Israel-lâ a le sunda mi Kusan-Risatayim gak bizad’a klavandi. 9 Israel-lâ a nde tchi yam Ma didina; Ma didina mi tchol ki ma sud’uzina Otniyel Kenas ma Kalep wiyem ma gorâ goroma. 10 Muzu’â hi Ma didinina mi kak kamu, mi mbut ma ngol ma avok Israel-lîna, mi i á dur ayîna. Ma didina mi hum Kusan-Risatayim amul ma Mesopotami-na abomu, mi kus kamu. 11 Ambasa ti kak ki halasa gak bizad’a dok fid’i. Bugola, Otniyel Kenas goroma mi mid’a.
Ma ngol ma avok sumina Ehut
12 Israel-lâ a le sun nda ding nga Ma didina tam nga d’i lum djivi kat tuo d’a. Ma didina mi had’enga mi Eglon amul ma Mowap-ma; mi kak djangûna ki Israel-lâ, kayam azi le sun nda ata yat tuo d’a. 13 Eglon mi tok suma Amon-na ki suma Amale’â, mi i dur Israel-lâ, mi digizi woi kur azì ma ngol ma Jeriko ma amulongeîna a nga kuana. 14 Israel-lâ a le sunda mi Eglon amul ma Mowap-ma gak bizad’a dogo yam klavandi. 15 Israel-lâ a nde tchi yam Ma didina; Ma didina mi tchol ki ma sud’uzina Ehut Gera gorom ma ad’u andjafâ hi Benjamin-na, ni ma gulad’a. Israel-lâ a sunum ki he d’a hawad’a mi Eglon amul ma Mowap-ma. 16 Ehut mi zle mbigeu d’a fiyak ka siyat mbàd’a, fiyagat ni santimetred’a dok vahl, mi kalat ata d’ik mama kä krovo kur baru mama yam ab’alam ma ndjufâ. 17 Mi he he d’a hawad’a mi Eglon amul ma Mowap-ma. Wani Eglon ni sama nded’a duguzlîna. 18 Kid’a Ehut mi hum he d’a hawad’a dad’a, mi tchuk suma a mba ki he d’a hawad’ina abua. 19 Mam tamba mi mbeï bugol filei ma ahina ma nga tinda go ki Gilgal-la, mi de mi Eglon ala: Amulâ, an nga ki zla d’a nde a dangzi vangû.
Ata yi máma amulâ mi de mazungeî mama ala: Agi bagiya! Suma pet suma a nga gevema a buzuk kei abua.
20 Eglon mi nga kaka kur gong nga ab’leng nga yam dudura akulo d’a a ngomot kam mam tu d’a. Ehut mi mba gevemu, mi dum ala: An nga ki zlad’a hAlonid’a á dangziya. Eglon mi tchol lei akulo yam zlam mamba. 21 Ata yi máma Ehut mi nik abom ma gulana, mi pat mbigeu mam mba fiyaka yam ab’alam ma ndjufâ, mi tchogom hurum tup. 22 Mbigeud’a kal kurum kaguwat tutum, mbulâ mi riwit tei yam siyad’u, kayam mam pat nga mbigeud’a woi kurum mbi, kayam ti ndeza ni woi blogom mbet. 23 Ehut mi nde woi abua, mi duk vun gong nga yam dudur ra akulod’a, mi gat vunat ki lakled’a.
24 Kid’a Ehut mi nde abu dad’a, azungeîna hamulîna a mba, a gol vun gong nga yam dudurid’a vunat nga duka, a dala: Gagazi, nga mi o ni bageid’a kur gong nga ab’lenga. 25 A djup tatâ, mi malazi nga vun gonga d’i. A yo lakled’a, a mal vun gonga, a gol wani, salazina mi nga ged’a kä matna! 26 Kid’a azi nga djup tua d’a, Ehut mi ringâ, mi kal lei bugol filei ma ahinad’a, mi sut tam Seir.
27 Ata yima mi mbazina, mi bu adifa yam ahinad’a hi Efraim-mba. Israel-lâ a togï gevem yam ahinad’a, mi ge tam avoroziya. 28 Mi dazi ala: Agi mbeyegï blogonu, kayam Ma didina mi hagiya wa Mowap magi suma djangûna abogiya. Azi i blogomu, a hle yima suma a djak alum ma Jurdê-na kasezi kuana abo ma ir Mowap-ma, a nga ar sa á kal li. 29 Kur bur máma a tchi suma Mowap suma gangrang suma a we durîna go ki 10.000. Sa mi sut nga tu d’i. 30 Kur bur máma suma Mowap-ma a hulong yazi kä ad’u Israel-lâ. Ambasa ti kak ki halasa gak bizad’a dok klavandi.
Ma ngol ma avok sumina Samgar
31 Bugol Ehut, Samgar Anat goroma mi vraga. Mi tchi suma Filistê-na kikis karagaya ki leleu ma a hat kamuzleinina, mi sut Israel-lâ woi mi.
© Azumeina Bible © Alliance Biblique du Tchad, 1999.
