Zandu’â hAlonina mi nga aduk suma Filistê-na
1 Filistê-na a hle zandu’â hAlonina, a hlumï yam ahina d’a Ebenezer-ra, a im avo Asdot, 2 a kalam kur gonga halo mazina Dagon-nda, a tinim gen Dagon máma. 3 Ndjivin nda suma Asdot-na a tchol akulod’a, a fe Dagon mi puk kä ki iram andaga avok zandu’â hi Ma didinina; azi hlum a tcholom akulo blangâma. 4 Ndjivin nda mbàd’a azi we Dagon puk kä kua andaga avok zandu’â hi Ma didinina, huyogom arî mam go, kayam yam azi kabom kus seyo, a nga tchuka kä ata agu ma avun gongina. 5 Ni kayam ndata ba, suma ngat buzuna hi Dagon-na avo Asdot ki suma pet suma a nga kal kur gong mambina, a nga tin asezi yam agu ma avun gongina d’i gak ini.
6 Wani Ma didina mi ngop suma Asdot-na gak a zlak ki mandarâ. Nga mi tumuzi ki tugud’ei d’a a yat ala emorota kazì ma nguyuzina pet. 7 Ata yima suma Asdot-na a wahle suma mba kazi hina na, a dala: Ar zandu’â hAlona hi Israel-lîna mi kak avo hatei d’i. NAlona ba, mi ngobei kalo meina Dagon wan mi. 8 Azi sun a yï amulei suma Filistê-na pet, a djobozi ala: Ami lami ni nana ki zandu’â hAlona hi Israel-lîna ge?
Azi hulong dazi ala: Agi hlum im Gat. A hlum a im Gat mi. 9 Wani kid’a azi mbaza ki zandu’â avo d’a, Ma didina mi ngop suma avo hur azinina, gugureina ki suma nglona, mi tumuzi ki tugud’ei d’a a yat ala emorota; azi nde tcha tata.
10 Ata yi máma na wat, azi hle zandu’â hAlonina, a im Ekron. Wani kid’a azi mbamza Ekron-nda, suma Ekron-na a tum siwela gandjau, a dala: A mba ki zandu’â hAlona hi Israel-lîna avo hatei ka hî ná tchï woi ki sum meina! 11 A sun a yï amulei suma Filistê-na, a dazi ala: Agi sunugi zandu’â hAlona hi Israel-lîna yam ambas mamba; ar mi tchï woi ki sum meina d’i. Kayam Ma didina tamba nga mi ngoboziya, a nga tcha tata á matna hur azina. 12 Suma a bo nga d’uo na, tugud’ei d’a a yat ala emorota ti vaziya; tchi mazi ma hohoud’a mi i gak akulo hur alona.
© Azumeina Bible © Alliance Biblique du Tchad, 1999.
