WAL LA AVOKA
(a) NGOPA KI VUN MA HLED’A
1 Mbaktum ndata nga d’i de zla sun nda teteng nga Alona mi ndat tei ir Isai Amot goroma yam leu d’a Juda-d’a kazì ma ngol ma Jerusalem-mid’a. Mi ndumuzi woi ni kur atchogoid’a hi Oziyas ki Jotam ki Ahas ki Ezekiyas amulei suma Juda-nid’a.
Suma bei wäd’u zlad’a ba na
2 Ndak akulod’a, ndak huma,
ndak andagad’a, ndak tin humak hum mi,
kayam Ma didina nga mi de zlad’a. Mi dala:
An ngom gugureina, an wuluzi a djeng nglod’a,
Wani a tchol huneîd’a ki sed’enu.
3 Amuhlâ mi we salama,
korona mi we kupma hi salamina mi,
wani Israel-lâ a nga wan ndi,
sum mana a nga wäd’u zlad’a d’uo mi.
Vama djivi mi nga yam ambas sa Juda-d’a d’i
4 Ni zla d’a hohoud’a,
yam agi andjaf suma le tchod’a,
yam agi suma zlad’a kagina,
yam agi andjaf ma murud’umba,
yam agi gro suma mbud’ugi ndjendjed’ina!
Agi noyôgi an Ma didina woyo,
agi gologi an Ma tin tan irat vat
kagi Israel-lîna is,
agi han huyogogi mi.
5 Ata yima agi tcholi ad’enga ngingring i avogovo’â,
agi min ala mi togi nata yima lara d’ei ge?
Yagi pet ni mbuleina,
hurugi pet ni tugud’eid’a mi.
6 Tin ad’ud’a kä ata asema dei
gak i akulo ata yamba,
vama djivi nga d’i,
ni mbilâ vam tu ki zlita
ki mbil ma ngadja’eî
ma bei sana mi mbuzum mbei
d’oze mi vom mbulâ iram
mboze mi djinim ba na.
7 Ambas magi ti mbut hur fulâ,
aziyagi ma nglona a ngalam mbeyo.
Andjaf suma dingâ a mba
a b’lagagi ahle suma yam andaga magid’ina kä iragiya,
va mi ar nga kat ti.
Wana ni b’lak ka d’i tcholï ata andjaf suma dingîd’a.
8 Jerusalem ti arî vat tu
d’igi zlub’u d’a aduk asine ma guguzlud’id’a na
d’oze d’igi paga d’a a pat aduk asine ma kurdunid’a na
d’oze d’igi azì ma ngol ma a nguyum akulo á durîna na.
9 Ladjï Ma didin ma ad’engêm kal petna
mi ngomei ad’ui d’a ar nded’a d’uo ni,
ei mbud’i wa ni d’igi Sodom na,
ei mbud’i wa ni d’igi Gomor na mi.
Kud’or ra ir Alona ndjendjed’id’a
10 Agi suma nglo suma b’lagagi woi
d’igi suma Sodom-ma na na,
ar agi humugi zlad’a hi Ma didinid’a.
Agi suma yagi nga kagi d’uo
d’igi suma Gomor-râ na na,
agi tinigi humagi yam gata hAlo meinid’a!
11 Ma didina mi dala:
Va mi ndolon kahle magi suma ngat buzu suma ablauna ni me ge?
An ndak wa
abo gamlâ ma agi handji vama ngat buzu ma ngalina,
abo mbul amuzleina mi.
Tan nga d’i lan djivid’a
yam buzu amuzlei
d’oze yam buzu tumiyô
d’oze yam buzu mbekmbere d’i.
12 Ata yima agi nga mbagi avorona,
ni nge mi dagi ala agi mired’egi hur
gulumuna hi gong man nda kud’orina kä ge?
13 Ar agi mbagi ki he magi d’a
hawa d’a hawa yaka d’i.
Andosâ hi dubang magi ma his djivid’ina
ni vama ndjendjed’a iranu.
Ar agi mbagi kahle magi suma ngat buzuna
kur bur ma deîd’a hi tilîna
d’oze kur bur ma sabatna
d’oze kur bur ma vun til ma teteng ma a ngama d’i.
Kayam an nga ni min kud’or ra zlapa ki mat ma tchid’id’a d’i.
14 Tan nga d’i lan djivid’a
yam vun til ma agi lagizi
kur bur ma deîd’a hi tilîna d’i,
yam vun til ma agi lagizi
kur bur ma vun til magi ma teteng ma a ngama d’uo mi.
Kayam azi nga tchan aneka,
an kau wa abo zi d’a ni zizid’a mi.
15 Ata yima agi yogi abogi akulo á tchendina,
an nga ni mbut iran ndeyo.
Agi nga dugud’ogi tchenda wan pî,
an nga ni humugi d’i,
kayam abogi mi nga tib’ak ki buzuna.
16 Agi mbuzugi tagi woyo,
agi mbud’ugi tagi woi yed’et,
agi aragi sun magi d’a asa’at ta agi lat avoronda woyo,
agi aragi tcho d’a led’a woi mi.
17 Agi had’agi á le djivid’a,
agi halagi d’ingêra,
agi hulongôgi ma a nga djobom vunama
kur lovot ta djivid’a,
agi kagi ir zlad’a hi ma hokuyod’id’a,
agi ndjunugi yam atcha d’a modonod’a mi.
Le agi sogi vuna ni...
18 Ma didina mi dala:
Mbeigïya, ei dei tei zlad’a.
Le tcho magid’a ti ni hleud’a diliu pî,
mba d’i mbut hapa d’igi nesâ na;
le d’i ni hleud’a kekeng d’igi gangeîna na pî,
mba d’i b’o hapa d’igi b’od’a hi tamasid’a na.
19 Le agi gagi yagi kä agi humun vunanu ni,
agi mba tagi vut ahle suma djivi suma yam ambasina.
20 Le agi humugi d’uo agi sogi vuna ni,
a mba tchagi ki mbigeu d’a fiyaka.
An Ma didina ni de woi ki vunan da’!
Mbut ta yed’eta hi Jerusalem-mba
21 Ang azì ma amul ma d’engzengâ,
ni nana ba, ang mbut d’igi atcha d’a gaulangâ na ge?
Angî ma a nga ka sariya d’a d’ingêra kurung adjeuna,
angî ma a nga le sun nda irata kurung adjeuna mi.
Wani ki tchetchemba, suma tchi matna
a nga kaka kurungî aziya.
22 Adjeu angî kawei ma hapma,
wani ang mbut wa sud’o tchafa;
adjeu angî süm guguzlud’a djivid’a,
wani ang mbut wa mbina.
23 Mang suma nglona a mbut suma bei hum vuna,
a ndjak vunazi tu ki suma kula.
Azi pet a min ni he d’a hawa d’a mbut ira,
azi nga ring bugol wuraka,
azi nga ka ir zlad’a hi ma hokuyod’id’a d’i,
azi nga djib’er yam zlad’a hatcha d’a modonod’id’a d’uo mi.
24 Kayam ndata, Salad’a Ma didin ma ad’engêm kal pet
ma ad’enga hi Israel-lîna mi dala:
An mba ni ka ir zla manda ki man suma djangûna!
An mba ni sä atchugulun ki man suma djangûna!
25 An mba ni hlabon kan akulo á tongû,
an mba ni mbuzung zozot manga woyo,
an mba ni yagang zozot manga woi
d’igi aku tchafa ti yak zozota hi kaweinid’a woi na.
26 An mba ni hulong tin mang suma ka sariyad’a
d’igi suma adjeuna na,
an mba ni tin mang suma de d’alâ
d’igi suma avo’â na mi.
Bugola, a mba yang ala
Azì ma ngol ma d’ingêrâ,
Azì ma ngol ma d’engzengâ mi.
27 Ma didina mba mi prut Siyon ndei
ni fata ti tit yam d’ingêrid’a,
mam mba mi sut suma kurutna woi
ni fata a mbut huruzi yam tcho mazid’id’a mi.
28 Wani mba mi b’lak suma tchila yam gata
ki suma le tchod’a woi abo tazi tu,
suma a aram mbeina a mba ba woi mi.
29 Gagazi, agi mba mbud’ugi zulona
kagu ma terben agi tinigi hurugi kama,
agi mba mbud’ugi zulona
kasine ma agi manam
ma agi nga tuwalagizina mi.
30 Agi mba mbud’ugi ni d’igi agu ma humam yak keina na,
d’igi asine ma mbina nga ad’um mbuo na na mi.
31 Sama ad’engâ mba mi mbut ni d’igi miyâd’a na,
sun mamba mba d’i mbut ni d’igi aku d’a munda na;
a mba ngal lei zla tazi djak;
sama ndak á tchat teina nga d’uo mi.
© Azumeina Bible © Alliance Biblique du Tchad, 1999.
