Libina hi Näman-na mi yak keyo
1 Ma ngolâ hi azigar ma Siri-na a yum ala Näman, salama mi lum ad’um heî, mi suburum heî mi. Ni kayam mam ba, Ma didina mi had’enga mi suma Siri-na á kus ayîna. Mam mi grang ma gagazina, wani mi ni libina. 2 Wani suma Siri-na a i hurumba ata andaga d’a Israel-la, a veï gor atchad’a, a gat weid’a abo atchad’a hi Näman-nda. 3 Bur tu ti de mi salata ala: Ladjï salana mi i ta’î tam mi ma djok vun Alona ma nga kur azì ma Samari-na ni, mam mba mi yagam libi mama woi atogo hina zak. 4 Wani Näman mi i de mamulâ zla d’a gor wei d’a Israel-la ti dumzid’a.
5 Amulâ mi dum ala: Djiviya! Ang iya. An nga ni hang mbaktumba abong mamul ma Israel-lâ. Näman mi i yo kawei ma hapma kilona kikis hindi, lora kilona dok karagaya ki baru ma lü vun tilâ dogo mi. 6 Mi mbaza, mi he mbaktum mba amul ma Siri-na mi humzid’a mamul ma Israel-lâ. Mi de kur ala: An sunungza ma ngolâ hi azigar manina Näman ki mbaktumba wana, kayam ang yagam libi mama woyo.
7 Ata yima amul ma Israel-lâ mi dap mbaktum ndata ndumba dapma, mi haû baru mama woyo, mi er ad’um akulo ala: An nAlona ba, ni tchi sana kat mi, ni hulong zlid’im mi zu? Gola! Amul ma Siri-na mi sununï sana ka wana ala an yagam libi mama woyo! Agi wagi zla d’a sa máma mi halan ki sed’eta.
8 Kid’a Elise mi hum ala amul ma Israel-lâ mi haû baru mama woyo d’a, mi ge sunda mi dum ala: Ni kayam me ba, ang hat hurung na ge? Ar sa máma mi mbeï avo hatanu. Mba mi wala gagazi, ma djok vun Alona mi nga yam ambas sa Israel-la.
9 Wani Näman mi mba ki pusâ hakulumeinina kakulumei mama, mi tchol avun azina hi Elise-na. 10 Elise mi sun sana mi dum ala: Ang i mbus tang kä kur alum ma Jurdê-na mbumbus yang kid’iziya, ang mba yak kei yuyung.
11 Wani Näman hurum zala, mi ge tam mi iya, nga mi dala: An djib’er ala ma djok vun Alona mi ndeï ini woi avo hatam á mba gevenu, mba mi tchen Ma didina Alo mama, mba mi tin abom ata yan ma mbilâ ba, libi mana mba mi yak keyo. 12 Na ni Abana ki Parpar alum ma Damas-sâ a kal nga mbiyo ma Israel-lâ tala an ge tan kur á mbus ni yak kei d’a d’uo zu? Wani mi hulong mi ge tam kayîna, mi iya.
13 Wani azungeî mama a hut gevem go, ma dingâ tu mi dum ala: Abunu, ladjï ma djok vun Alona mi dangî vama ad’engâ pî ni, ang mba lum mbuo zu? Ni kayam me ba, ang aram bei led’a ge? Tala ang ge tang aduk mbina go ba ang yak keyo d’a.
14 Kayam ndata, Näman mi i kur alum ma Jurdê-na, mi hlup kä aduk mbina hluhlup yam kid’iziya d’igi Elise mi dum na. Mi yak kei yuyung, babagam mbut d’igi gogor ma gorâ na. 15 Ata yi máma mi hulongî avo hi Elise zlapa ki suma ki sed’ema pet, mi mba mi tchol avok ma djok vuna Elise, mi dum ala: Salana, ki tchetchemba, an we yam andagad’a pet alo ma ding ma d’igi Alona hi Israel-lîna na na nga d’i. Ang ve he d’a hawa d’a nde d’a an mbangzi wanda.
16 Wani Elise mi dum ala: Avok Ma didina ma bei matna ma an nga ni lum sundina, an nga ni ve va abong ngi. Wani Näman atam baba, wani Elise mi ve nga d’i.
17 Näman mi dum ala: Salana, kayamba ang ve nga he d’a hawad’a d’uo d’a, an nga ni tchenengû, ang aran an azong mangâ lovota nde á yo andaga manga ir anek ka zid’a hi koronid’a mbà, kayam an min he vama ngat buzu ma ngala d’oze vama ngat buzu ma zlap darigïd’a malo ma ding ngi, an he ni mi Ma didina Alona hi Israel-lîna tu go. 18 Avok tua an nga ni tchen Ma didina mi vat hurum mbei kanu. Ata yima salana amul ma Siri-na mi kal kur gonga á kud’or alo mama Rimon-na, an pî ni kud’urom mi, kayam mam deng tamî atanu. Kayam ndata, ar Ma didina mi vat hurum mbei kanu.
19 Elise mi dum ala: Ang i lafiya. Näman mi iya.
Tcho d’a Gehazi mi lata
Näman mi hut sä woi hina nde. 20 Gehazi azongâ hi Elise-na mi de tam ala: Salana mi ve nga vama Näman ma Siri-na mi humzina d’i. Wani gagazi, avok Ma didin ma bei matna, an i ad’umu, an i ni ve va abom nde.
21 Gehazi mi i ad’u Näman. Näman mi golom nga mi ringîya, mi tchuk asem mbei kä kur pus mama, mi ngavamï mi djobom ala: Ang mbeï ni hawa ko zu?
22 Gehazi mi hulong dum ala: An mba ni hawa ko. Salana mi sununï ala an dangû, suma mbà aduk adesâ hi suma djok vun Alonina a tcholï yam ambas sa Efraim-mba, a mba nga avo hatamu. Mi tcheneng ala: Ang humza kawei ma hapma kilona dok hindi ki baru ma lü vun tilâ mbà mi aziya.
23 Näman mi dum ala: Ang ve kawei ma hapma kilona dok karagaya! Mi tezemu, mi hum kawei ma hapma bud’omeina mbà, mi hum baru ma lü vun tilâ mbà mi, mi hum azungeî mama mbà á tinim avo. 24 Azi mbaza ata yima a yum ala Ofel-lâ, mi ve bud’omei suma abozina, mi tchuguzi avo hatamu, mi ar azungeîna hi Näman-na a iya. 25 Gehazi mi hulong gen salama Elise. Elise mi djobom ala: Ang le ni lara ge?
Mi hulong dum ala: Salana, an i nga yi d’i.
26 Wani Elise mi dum ala: Ang we nga d’ala an we sa máma kur muzu’â ata yima mi tchuk asem mbei kä kur pus mama á ngavangâ d’uo zu? Wani nga ni yima ang ve baru ma djivid’a ki beged’a á gus asine ma olif-fâ ki ma guguzlud’a d’oze tumiyôna kamuzleina d’oze azungeîna ki yuguneinina d’i. 27 Kayam ndata, libina hi Näman-na mba mi djogong kandjavang gak didin. Ata yima Gehazi mi nde woi abu avok Elise-na, libina mi zagam hapa mbû d’igi gagarad’a na.
© Azumeina Bible © Alliance Biblique du Tchad, 1999.
