Amale’â a b’lak Siklak, wani David mi digizi ad’uziya
1 Kur bur ma hindina, David mi mbaza Siklak ki sum mama. Suma Amale’â a dur wa ayîna abo ma sutna hi Juda-na avo Siklak, a b’lak azì ma ngol ma Sikla’â woyo, a ngalam mbei mi. 2 A yo aropma ki suma pet suma azi fazi avona, gugureina ki suma nglona; a tchi nga sa d’i, wani a yozi a i ki sed’eziya.
3 David ki sum mama a mbaza avo; gol wani, azina nga mi ngala, amiyôzina ki grozi suma andjofâ ki suma aropma a yozi wa hurumba. 4 Ata yi máma David ki suma a nga ki sed’ema a tchi gagak ad’engêzi d’a tchina dap peyo. 5 Aropma hi David suma mbàna Ahinowam mba Jisreyel-la ki Abigayel atchad’a hi Nabal ma Karmel-lîd’a, a yozi mi.
6 David mi nga kur yor tad’a ngola, kayam sum mama a nga dala: Ei durizi kahinad’a, ei tchiziya! Kayam suma pet a nga kur hur ma hata, nge nge pî nga mi hat hurum yam grom suma andjofâ ki grom suma aropma. Wani David nga mi fad’enga ni yam Ma didina Alo mama.
7 David mi de mi ma ngat buzuna Abiyatar Ahimelek goroma ala: Ang yonï baru d’a efod’a. Abiyatar mi yomzïya.
8 David mi djop Ma didina ala: Le an dik ad’u azigar ndazina ni, an fazi zu?
Ma didina mi hulong dum ala: Ang digiziya; gagazi, ang mba faziya, ang mba prud’ï suma a yozina.
9 David ki mam suma kikis karagayana a tchol a iya, a mbaza avun toliyon nda Besor-ra. Suma dingâ a seî a ar nga blogozi kä woyo. 10 David mi i ki suma ad’um kikis fid’i; suma kikis mbàna a ar nga kä woyo, a seî heî, ad’engêzi d’a djak toliyonda nga d’i. 11 A fe ma Ezipte-na abageya, a im gen David; mi hum avungôna ki mbina. 12 A hum tulum ma sod’a nde ki ades guguzlu d’a sod’a mbà mi. Kid’a mi mud’uzi dad’a, mi fad’enga, kayam mi te nga tena d’oze mi tche nga mbina d’uo burâ hindi.
13 David mi dum ala: Angî sana hi nge ge? Ang tcholï nara?
Mi hulong dum ala: An ni gor ma Ezipte-na magoma hi ma Amale’â. Gola! Ini ni bur ma hindina salana aran ndeyo, kayam an tugud’eid’a. 14 Ami i ni dur ayîna abo ma sutna hi Keret-na, yam andaga d’a Juda abo ma sutna hi Kalep-ma, ami ngalami azì ma Sikla’â woi mi.
15 David mi dum ala: Ang min tinin ata yima azigar ndazina a nga kuana zu?
Mi hulong dum ala: Ang gunun tang avok Alona ala ang mba tchan ndoze ang han abo salana d’i. Hina wani, an mba ni tagang yima azigarâ a nga kuana.
David mi kus yam Amale’â
16 Sa máma mi tin David ata yima azi nga kuana. Gol wani, suma Amale’â a b’rau nga woi ata yina teteng, a nga te, a nga tche, a nga le furîd’a kayam ahle suma nglo suma azi hurumzï kur ambas sa Filistê-d’a ki d’a Juda-d’ina. 17 David mi ndätazi durâ ki yina kukrumuka dei gak tcha ndjivin fladege. Sa mazi tu pî mi sut ti; nazungeî suma kikis fid’i suma a nga yam djambala a ringâ hol. 18 David mi prud’ï suma kahle suma suma Amale’â a yozina pet, kamiyôm suma mbàna mi. 19 Sa tu pî mi ar sä hî d’i. Gugureina ki suma nglona, grozi suma andjofâ ki suma aropma, va tu pî ma azi hurumuma, mi ar ri; David mi mba ki sed’ezi pet. 20 David mi yoï d’uwar ma gureina ki ma nglona pet. Suma a nga tit avok d’uwarîna a nga dala: Wana nahle suma David mi prud’uzïna!
21 David mi hulongî gen suma kikis mbà suma a seî woi blogom á i ad’um suma a ar nga kä woi avun toliyon nda Besor-rina. Azi tchol a i á d’ugol David ki suma a nga ki sed’ema. David mi hut geveziya, mi gazi depa. 22 Suma tcho suma hawa yak suma a nga aduk suma a i ki David-na a dala: Azi i nga ki ei d’uo da ni, ei hazi ahle suma ei prud’uzïna d’i; nge nge pî ei hum amamba ki groma hol, azi i ki sed’eziya.
23 Wani David mi dazi ala: B’oziyona, agi lagi hina ki vama Ma didina mi heizina d’i, kayam mi ngomei mi hei azigar suma a mba tei durîna aboya. 24 Ni nge ba, mba mi humugi ini zla magi ndata ge? Sama mi i dur ayînina ki sama mi ar nga kä avun ahlenina, b’rau mazid’a nabo tat tu, a b’rawazi nabo tazi tu mi.
25 David mi le hina kur bur máma. Gak kur bur ma bugolâ, zla ndata ti arî gata aduk Israel-lâ gak ini.
26 Kid’a mi mbaza avo Siklak-ka, mi sun ahle suma mam prud’uzïna he d’a hawad’a mi suma nglo suma Juda-na, mi buniyôma, mi dazi ala: Wana ni he d’a hawad’a hahle suma an prud’uzï abo suma djangûna hi Ma didinina! 27 Mi sun mi suma Betel-lâ, mi suma Ramot suma abo ma sutna, mi suma Jatir-râ, 28 mi suma Arower-râ, mi suma Sifmot-na, mi suma Ektemowa-na, 29 mi suma Rakal-lâ, mi suma kur azì ma Jeramel-lâ, mi suma kur azì ma Ken-na, 30 mi suma Horma-na, mi suma Bor-Akan-na, mi suma Ata’â, 31 mi suma Hebron-na, ata yima ma lara ma David mi tit ki sum mama kua adjeuna.
© Azumeina Bible © Alliance Biblique du Tchad, 1999.
