Ester ti vrak amula balum Vasti
1 Bugol ahle ndazina, kid’a amulâ Asuwerus hurum b’leng dad’a, mi djib’er yam Vasti kahle suma ti lazina ki gat ta mam tinit yam zla matid’a. 2 Ata yi máma azungeî suma a nga le sunda avo hatama a dum ala: Ar a halang yugunei suma djif heî suma a ngaf ki mandjuf fuo na. 3 Ar ang he vuna kur ambas manga pet ala ar azi togï gro arop suma djifâ kur azì ma ngol mamula avo Sus ata yima kaka haropmina, ar azi hazi abo Hege ma ngom arop ma a tinim yam aropmina, ar mi hazi ahle mazi suma a min ki tazi djifîna. 4 Gor atcha d’a ang hurung vata, ti vrak amula balum Vasti. Zla ndata ti lamulâ tam djivid’a, mi le hina mi.
5 Ma Juif-fâ nga kur azì ma ngol ma Sus-sâ, a yum ala Mardose. Mam mi Jayir goroma, Jayir ni Simei goroma, ni ma Kis gorom ngolonina; azi nad’u andjafâ hi Benjamin-na. 6 Ni ma Nebukanezar amul ma Babilon-na mi vumî Jerusalem zlapa ki ndroma ki Jekoniya amul ma Juda-nina. 7 Mam mi ma wul Hadasa-na nala Ester; ndat nabum wiyema goromba, ndat ni hokuyod’a, ti djif heî mi. Kid’a abut azi kasut a bod’a, Mardose mi mbud’ut goromba.
8 Ata yima a tchi wala yam vun ma hed’a hamulâ ki gat mamba tchina, a togï gro aropma ablaud’a avo Sus kur azì ma ngolâ abo Hege ma ngom aropma, a mba ki Ester kur azina hamulîna abom mi. 9 Gor wei ndata, hurum vat heî, tam lum djivid’a kad’u, mi hat ahle suma min tat suma nda’â atogo zak ki te matna mi, mi hat yuguneina abot kid’iziya, ni suma a yozi avo hamulîna, mi tinit ata yima kaka haropma ma djivi ma kalâ ki yugunei ndazina. 10 Ester ti tak nga sum matna d’oze andjavat tei mi sa d’i, kayam Mardose mi gad’at ala ti de woi mi sa d’i. 11 Wani burâ ki burâ Mardose nga mi ngui avun azina haropmina á gol na ni Ester ti nga ni nana ge, a nga lat ni nana ge d’a?
12 Gro yugunei ndazina a le ni tilâ dogo yam mbà kur min ta d’a ngad’a yam aropmid’a, a le mbul mirâ tilâ karagaya, a le mbul baum ma his ma afufuîna tilâ karagaya kahle suma ding suma min tad’a haropmina tua ba, nge nge pî mi i avok amulâ Asuwerus tua. 13 Ata yima gor weid’a ti nde woi kur azina haropma á i avo hamulîna, a nga hat ahlena pet suma ndat ti min á i ki sed’ezina. 14 Ti i avo hamulâ fladege, yorogo ti i kur azì ma mbàna haropma ma Sasgas nga mi ngomozi kuana. Mam mi ma yam arop suma gureina hamulîna. Bei amulâ mi minit mi yat ki simiyêt ba ni, ti nga d’i hulong gevem mbuo d’a.
15 Kid’a Ester Abisayil ma Mardose abum wiyema gorom mba Mardose mi mbud’ut gorombid’a burut ndak á i avok amulîd’a, ti hal nga vama ding ngi; nahle suma Hege ma ngom aropma hamulîna mi hattchina hol. Ester ti le suma a nga golotna pet tazi djivid’a. 16 Azi i ki Ester avo hamulâ Asuwerus kur aziyam ma amula; ni kur til ma dogo ma a yum ala Tebet-na, ni kur biza d’a kid’iziya d’a mam nga mi tamulid’a. 17 Amulâ hurum ve Ester kal arop suma dingâ pet, mi le kat kal gro arop suma dingâ pet mi. Ata yi máma mi kulubut avaval la amula kad’u, mi vragat amula balum Vasti. 18 Mi le te ma ngolâ yam Ester mi mam suma nglo suma kal teglesâ kazungeî mama, mi he vuna kur ambas mamba ala: Suma tuk tazi bei he tara, mi he he d’a hawad’a mi suma kur djib’er mamba ki furîd’a.
19 Ata yima a tok yugunei ndazina yazi á mbàd’ina, Mardose mi nga kaka kä avun agre’â hamulîna. 20 Ester ti tak nga andjavat toze sum matna woi d’uo gak d’igi Mardose mi hat vuna na. Ester nga d’i ge yat kä ad’u vun ma hed’a hi Mardose-na d’igi ata yima ndat nga abom dei na na.
Mardose mi sut amulâ
21 Kur biza ndata, ata yima Mardose mi nga kaka kä avun agre’â hamulîna, azungeîna hamulîna mbà suma a nga ngom vun azinina, nala, Biktan ki Teres, a ndjak vunazi á tchamulâ Asuwerus seyo. 22 Mardose mi hum zla ndata, mi dat mamula Ester. Ester ti i de zla ndata mamulâ ala: Mardose mi dat na. 23 A nde djop ad’u zla ndata, a fat ni hina dedege, a tchuk ziyona kel suma ngom vun azì suma mbà ndazina akulo ata aguna, a b’ir zla ndata kur mbaktum mba de zlad’a yam sunda hamuleinid’a kä avok amulâ.
© Azumeina Bible © Alliance Biblique du Tchad, 1999.
