Jowahas tamula yam Israel-lâ
1 Kur biza d’a dok mbà yam hindi d’a Jowas Ahaziya goroma amul ma Juda-na nga mi tamulid’a, Jowahas Jehu goroma mi kak amula avo Samari, mi tamula bizad’a dogo yam kid’iziya. 2 Mi le sun nda tchod’a avok Ma didina, kayam mi tit ni bugol tchod’a hi Jerobowam Nebat goroma d’a mi lat mi zut Israel-lâ á le tchod’id’a, mi arat nga woi hina nde d’i. 3 Kayam ndata, Ma didina hurum zal yam Israel-lâ, mi hazi abo Hazayel amul ma Siri-na. Bugola, mi hazi abo goroma Ben-Hadat bizad’a ablaud’a. 4 Wani Jowahas mi tchen Ma didina ki hud’a. Ma didina mi humumu, kayam mi wala amul ma Siri-na nga mi kid’eî ir Israel-lâ heî. 5 Ata yi máma Ma didina mi sunï sama sud’uzi woi abo suma Siri-na, kayam azi kak kur aziyazi d’igi avoka na. 6 Hina pî, azi wal nga ki tcho d’a suma hi Jerobowam-ma a lat a zut ki Israel-lâ á le tchod’id’a woi d’i, a ar nga ahina d’a a tched’et ta a yat ala Asera-d’a nga tchola avo Samari tua mi. 7 Wani azigarâ hi Jowahas-sâ a ar nga ngol li. Akulumeina a arî dok vahl, pus mazi ma dur ayîna mi arî dogo, azigar suma asemba a arî dudubud’a dogo mi, kayam amul ma Siri-na mi tchazi woi ngola, mi mbud’uzi ni d’igi vama suma a mired’em kä kasezina na.
8 Sunda hi Jowahas sa ara kahle suma mi lazina pet kad’eng mam mba dur ayîna a b’irizi nga kä kur Mbaktum mba de zlad’a yam Sunda hAmulei suma Israel-lîd’a.
9 Jowahas mi mit mi i azulei kä ad’u abuyom ngolo. A tozom avo Samari. Goroma Jowas mi vrak tamula blangâmu.
Jowas mi tamula yam Israel-lâ
10 Kur biza d’a dok hindi yam kid’iziya d’a Jowas amul ma Juda-na nga mi tamulid’a, Jowas Jowahas goroma mi kak amula yam Israel-lâ avo Samari, mi tamula bizad’a dogo yam karagaya mi.
11 Wani mi le sun nda tchod’a avok Ma didina, mi wal nga ki tcho d’a Jerobowam Nebat goroma d’a mi lat mi zut ki Israel-lâ á le tchod’id’a woi d’i.
12 Sunda hi Jowas sa ara kahle suma mi lazina pet kad’eng mam mba dur ayîna kayî ma mam durum ki Amasiya amul ma Juda-nina, a b’irizi nga kä kur Mbaktum mba de zlad’a yam Sunda hAmulei suma Israel-lîd’a.
13 Jowas mi mit mi i azulei kä ad’u abuyom ngolo. A tozom avo Samari gen amulei suma Israel-lâ. Jerobowam mi vrak tamula blangâmu.
Elise mi de yam Israel suma a mba kus yam Siri-nina
14 Kid’a Elise mi ve tugud’eid’a á matnid’a, Jowas amul ma Israel-lâ mi i gevemu, mi hud’o kä kamu, mi nde tchina ala: Iba! Iba! Pusâ hi Israel-lîna ki suma djangâma!
15 Elise mi dum ala: Ang hle yeûd’a aguwat ki siyat mi. Amulâ mi hlad’u. 16-17 Elise mi dum ala: Ang mal ir fenetre d’a abo ma yorogonid’a woyo. Amulâ mi malad’u. Elise mi dum kua ala: Tin yeû manga ata aguwad’u. Amulâ mi hlagu yeû mamba. Elise mi tin abom yam ma hamulîna, mi dum ala: Ang yed’a. Amulâ mi yed’a.
Ma djok vuna mi er ad’um akulo ala: Yeû ndata ni vama taka yam kus sa Ma didina mba mi had’enga mi Israel-lâ á kus yam azigar suma Siri-nid’a. Â, ang mba dur suma Siri-na avo Afek, ang mba dabazi woyo.
18 Elise mi dum kua ala: Ang yo yeûd’a. Mam yod’u. Ma djok vuna Elise mi dum ala: Ang wad’at kä andaga. Amulâ mi wad’at kä andaga wawat yam hindi, mi ara.
19 Sana hAlonina hurum zala, mi dum ala: ladjï ang wat andagad’a yang vahl hloze yang karagaya ni, ang mba dur ayîna ki suma Siri-na gak ang dabazi woyo. Wani ki tchetchemba, ang mba dur ayîna á kus kazi ni yang hindi go.
20 Elise mi mid’a, a tozomu. Azigar suma Mowap-ma a nga mba hurum ahlena yam andaga d’a Israel-la bizad’a ki bizad’a. 21 Wani bur tu suma a i á tos matna, a we azigar ndazina. Atogo hina zak a ge sama mat máma kä kur zula hi Elise-d’a, a ringâ. Sama mat máma mi do aso’â hi Elise-na, mi zlid’a, mi tchol akulo kasemu!
Israel-lâ a kus yam Siri-na
22 Ata yima lara ma Jowahas mi tamula yam Israel-lîna, Hazayel amul ma Siri-na nga mi kid’eyêzi irazi ngola. 23 Wani Ma didina mi wazi hohowoziya, mi vat hurum mbei kaziya, kayam vun ma djin ma mam djinim ki Abraham ki Isak ki Jakob-ma. Mi min b’lagazi woi d’i gak ini mi arazi nga woi d’uo mi.
24 Hazayel amul ma Siri-na mi mid’a, goroma Ben-Hadat mi vrak tamula blangâmu. 25 Ata yi máma na wat Jowas mi yo azì ma Israel ma Hazayel mi yom abo abum Jowahas kur leu mambina. Jowas mi kus kam kukus yam hindi, mi hulong yo azì ma nglo ma Israel máma.
© Azumeina Bible © Alliance Biblique du Tchad, 1999.
