David mi mbut ma ngolâ hades azigarîna
1 David mi tchol Gat, mi i ngei tam kur zul ahina d’a Adulam-mba. B’oziyoma ki suma avo habuma pet a huma, a i gevemu. 2 Suma pet suma nga kur ndakina ki suma a nga ki balâ kazina d’oze suma tazi nga lazi zlezleû d’uo na, a tok gevemu; mam mbut ma ngol mazina. Suma ki sed’ema a ni go ki kikis fid’i.
3 Ata yima David mi tchol mi i Mispe d’a Mowap-pina, mi de mamul ma Mowap-ma ala: An nga ni tchenengû, ang aran lovota mabun kasun á kak avo hatang gak an we vama Alona mba mi lum ki sed’ena. 4 David mi izi avo hamul ma Mowap-ma. Kid’a David mi nga kur yima ngeid’id’a, azi nga kaka kamulâ.
5 Ma djok vun Alona Gad mi de mi David ala: Ang kak ata yima ngeid’a d’i, ang hulong yam ambas sa Juda-d’a. David mi kal aduk agu d’a Heret-ta.
Saul mi tchi suma ngat buzu suma avo Nop-ma woyo
6 Saul mi hum ala a fe wa David azi ki sum mama yaziya. Saul mi nga kaka kä ad’u atchinda avo Gibeya akulo yam yima ndingâ kasap mamba abomu; azungeî mama pet a nga tchola gevem gogo. 7 Saul mi de mazungeî mam suma a nga tchola gevem gogona ala: Agi humugiya, agi suma Benjamin-na! Na ni Jesse goroma mba mi hagi agi asinena ki guguzlud’a pet d’igi an na mi zu? Na ni mba mi tinigi yam suma dudubuna ki suma kikisâ pet mi zu? 8 Ni kayam me ba, agi pet ndjagagi vunagi kan nge? Sama dan ala gorona mi djin vunam ki Jesse goroma na nga d’i; sama adigagi ma hurum hat yam zla manda ma mi dan ala gorona mi le hozugona mazong mana ala mi kak djangûna ki an á burun kä woi d’igi mam nga mi le ini hina na nga d’uo mi na na ge?
9 Dowek ma Edom-ma ma nga aduk azungeîna hi Saul-lâ, mi hulong dum ala: An we Jesse goroma mi mba avo Nop gen Ahimelek Ahitup goroma. 10 Ahimelek mi tchen Ma didina kamu, mi hum tena, mi hum mbigeu d’a fiyaka hi Goliyat ma Filistê-nid’a mi.
11 Amulâ mi sun mi yï ma ngat buzuna Ahimelek Ahitup goroma ki sum mama pet ki suma ngat buzu suma avo Nop-ma mi. Azi pet a i gen amulâ. 12 Saul mi de mi Ahimelek ala: Ahitup goroma, ang huma!
Ahimelek mi hulong dum ala: Salana, an wana!
13 Saul mi dum ala: Ni kayam me ba, agi ki Jesse goroma agi ndjagagi vunagi kan nge? Ni kayam me ba, ang hum avungôna ki mbigeu d’a fiyaka, ang tchen Alona kam tala mi kak djangûna ki an mi burun kä woi d’igi mam nga mi le ini na ge?
14 Ahimelek mi hulong de mamulâ ala: Ni nge ba, aduk azungeî mangâ pet, ni ma d’engzengâ d’igi akunongâ David na ge? Ni ma ge yam kä ad’u gat manga, a nga hum ngola avo hatangâ mi. 15 Ni ini tua ba, an tin ad’ud’a á tchen Alona kam zu? Nga na d’i! Amulâ, ar ang tin zla ndata yam an azong mangâ d’oze sa man ndi, kayam an azong mangâ ni we nga zlad’a gor roze zla d’a ngol kua d’i.
16 Amulâ mi de mi Ahimelek ala: A mba tchang ki sum mangâ pet.
17 Amulâ mi de mi suma ngomom suma a nga tchola gevem gogona ala: Agi mbud’ugi iragi agi tchagi suma ngat buzuna hi Ma didinina woyo, kayam azi tazi a ndjun David, a wala mi ringî ringâ, azi dan nga kam mbi. Wani azungeîna hamulîna a min do abozi ata suma ngat buzuna hi Ma didinina d’i.
18 Ata yi máma amulâ mi de mi Dowek ma Edom-ma ala: Ang mbut irang ang tchi suma ngat buzu ndazina woyo. Mi mbut iram mi tchazi mi, mi tchi suma a tchuk baru d’a efod’a atazina kur bur máma ni dok klavandi yam vahl. 19 Saul mi tchi suma avo Nop-ma woi ki mbigeu d’a fiyaka, andjofâ karopma, gugureina ki suma kokoyôna, amuzleina, korona ki tumiyôna mi, ni kur azì ma ngol ma suma ngat buzuna hi Ma didinina a nga kuana.
20 Sama dingâ tu simiyêm ala Abiyatar ni Ahimelek gorom ma Ahitup gorom ngolonina, mi sud’a, mi ring mi i bugol David. 21 Abiyatar mi de mi David ala: Saul mi tchiya wa suma ngat buzuna hi Ma didinina woyo.
22 David mi de mi Abiyatar ala: An we kur bur máma tamba ala Dowek ma Edom-ma mi nga kua, mba mi ar bei de Saul li. A tchi sum mangâ pet ini ni kayam anu. 23 Ang kak ki sed’enu, ang le mandar ri, kayam sama halan á tchid’ina, mi halangî ang mi. Ang kak go ki sed’enu; an mba ni ngomongû.
© Azumeina Bible © Alliance Biblique du Tchad, 1999.
