Apsalom mi hulong avo Jerusalem
1 Jowap Seruya gorotna mi wala amulâ hurum nga tinda yam Apsalom. 2 Mi ge sunda sä Tekowa, mi halï atcha d’a wäd’u zla d’a heîd’a, mi dat ala: Ndak mbut tak hohoud’a, ndak tchuk baru d’a dodora atagu. Ndak le mbul ma his djivid’ina atak ki, ndak le d’igi ndak tchi ni matna dedei na. 3 Ndak i gef amulâ, ndak i dum hina. Mi dat zla d’a ndat i dat mamulîd’a mi.
4 Atcha d’a Tekowa ndata ti i gef amulâ, ti ge tat kä andaga, ti grif kä, ti dum ala: Amul mana, ang ndjununu!
5 Amulâ mi dat ala: Ndak min ni me ge?
Ti dum ala: Ndjuvun mi mid’a, an arî modonod’a! 6 An wei manga grona ni mbà. Azi djak a nde to tazi abageya, sama mi yozi woi nga d’i. Ma dingâ mi tum wiyema, mi tchumu. 7 Wani andjavami a tchol djangûna ki sed’en an wei manga ala: Ndak hami ma tchi wiyemina, ami tchum balum wiyema, ami min tchami ma te djona woyo. Azi min tchan vun adjo man ma ar helâ woyo. Kayambala ndjuvun simiyêm yï d’oze va ar blogom yam andagad’a d’uo mi d’a.
8 Amulâ mi de matcha ndata ala: Ndak i avo hatagu! An mba ni dak zlad’a yam zla mak ndata tua.
9 Atcha ndata ti hulong dum ala: Salana, amul mana, ar tcho ndata hulongî kan an ki sum mana, ar ti kak kang ang ki leu manga d’i.
10 Amulâ mi dat ala: Le sa mi dak zla d’a tchod’a ni, ndak mbeyendjiya! Mam nga mi hulong dabak kuo d’a!
11 Ti de mamulâ ala: Ar ang djib’er yam Ma didina Alo mangâ tala ma hlatchugula mi tchi sama ding kua, tala mi tchi gorona woi d’uo d’a.
Amulâ mi dat ala: Ma didina ni Ma bei matna. Tumus sa yam goro’îd’a tu pî mba d’i nde kä andaga d’i.
12 Ti hulong dum ala: Salana, amul mana, ar an wei manga ni dang zla tu.
Mi dat ala: Ndak dë.
13 Ti dum ala: Ni kayam me ba, djib’er manga nga tu ki djib’era hi suma hAloninid’a d’uo ge? D’igi ang de kä na, zla ndata ti vangî ve, kayam ang hulongî nga ki ma ang kengêmza woina d’i. 14 Gagazi, ei mba boi d’igi mbiyo ma a vom kä ma mi sid’am kä ma sana nga mi fe lovota á gulum mbuo na na. Alona nga mi hulong tchol sama matna akulo d’uo d’a. Wani mi min ala sama a kengêmza woi avoroma, mi arza kaka ata yi máma d’i. 15 Ki tchetchemba, an mba ni de zla ndata mi ang salana, amul mana, kayam zlad’a hi suma lan mandarâ. An dang zla ndata mi ang amul mana, dam ang mba le sunda yam zla d’a an wei manga ni dangzid’a zi kla ge? 16 Gagazi, ang amulâ mba hum zlad’a hi an wei mangid’a, ang mba prud’un ndei abo sama nga mi halan an á tchid’a ki gorona woi aduk suma Alona mi manazina. 17 An wei manga ni de kurun ala zlad’a hi ang salana amul manid’a mba d’i b’lengên hurunu, kayam angî d’igi malaikana hAlonina na. Ang nga kaka go á hum zla d’a djivid’a ki zla d’a tchod’a mi. Ar Ma didina Alo mangâ mi kak ki sed’engû!
18 Amulâ mi hulong de matchad’a ala: An nga ni djobok zlad’a. Ndak ngeyen va kä tu d’i.
Atchad’a ti dum ala: Salana, amul mana, ar ang de zla manga!
19 Ata yi máma mi dat ala: Na ni zla d’a ndak dat pet wanda, Jowap vunam nga ki sed’ek kuo zu?
Atcha ndata ti hulong dum ala: Salana, amul mana, ang nga ki irang tua! An nga ni tin vunan avorong ang amul mana d’i. Gagazi, nazong mangâ Jowap ba, mi han vuna; ni mam ba mi dan an wei manga ahle ndazina wan pet mi. 20 Azong mangâ Jowap mi le ni lemba ki zla ndata á le vama dingâ. Wani ang salana, angî ma ned’a d’igi malaikana hAlonina na á wahlena pet suma a nga le yam andagad’a ka hina.
21 Amulâ mi de mi Jowap ala: Gola! An nga ni le vama ang dan kama; ang i veï Apsalom avo.
22 Jowap mi ge tam kä andaga, mi grif kä, mi lad’u amulâ, mi dala: Salana, amul mana, an we ini ala ang wan hohowonu, ang le sunda yam zla d’a an azong mangâ ni dangzid’a. 23 Jowap mi tchol mi i Gesur, mi veï Apsalom, mi mbam avo Jerusalem.
24 Wani amulâ mi dala: Ar mi kak sä woi avo hatam baba, ar mi wan iran ndi!
Apsalom mi kak sä woi avo hatam bei mi we ir amulâ ba.
David mi zlap darigïd’a ki Apsalom
25 Wani aduk Israel-lâ pet, sama djif d’igi Apsalom na na nga d’i. Kasem dei gak i kam akulo fafat bei fe yam ma ngul ba. 26 Avun biza d’a lara ge pet, mi nga wel yam mbeyo, kayam tumus sa kamba nga d’i tchum aneka. Le mi ngad’at da ni, mi ngat ki kilona, aneget kal kilo ma amulâ mi nga kahlenina mbà. 27 Apsalom mi vut gro andjofâ hindi ki gor atchad’a tu, a yat ala Tamar. Ti djif heî mi.
28 Apsalom mi le bizad’a avo Jerusalem mbà bei mi we ir amulâ. 29 Apsalom mi de mi Jowap ala mi mbeï mi i ki sed’em gen amulâ. Wani Jowap mi min mba gevem mbi. Mi dum kua á mbàd’a, wani Jowap mi min ndi. 30 Ata yi máma Apsalom mi de mazungeî mama ala: Agi gologiya! Asinena hi Jowap-ma mi nga gen mana. Awu orsâ nga kuru; agi i dom akud’a! Azungeîna hi Apsalom-ma a i dom akud’a.
31 Ata yi máma na wat Jowap mi tchol mi i gen Apsalom avo hatamu, mi dum ala: Ni kayam me ba, azungeî mangâ a ngalan awuna woi hur asinena ge?
32 Apsalom mi hulong de mi Jowap ala: Gola! An ge sunda atang ala ang mbeï an sunung gen amulâ, ang dum ala: Ni kayam me ba, an tcholï Gesur ni mba ge? An kak sä dji kua pî ni hotei. Ki tchetchemba, an min ni we ir amulâ. Le an nga ki zlad’a kanu ni, ar mi tchanu!
33 Ata yi máma Jowap mi i gef amulâ, mi dum zla ndata. Amulâ mi yï Apsalom. Apsalom mi mba gevemu; amulâ mi bed’em kok.
© Azumeina Bible © Alliance Biblique du Tchad, 1999.
