Yina ndak wa á min gong nga kud’ora akulo
1 Kur bur ma avo’â hi til ma karagayana kur biza d’a mbà d’a Dariyus nga mi tamulid’a, Ma didina mi de mi mam ma djok vuna Aze ala mi i de mi Zorobabel ma Salatiyel gorom ma nga mi te yam Juda-na ki ma ngol ma ngat buzuna Josue Josadak goroma ala: 2 Ma didin ma ad’engêm kal petna mi dala: Suma a nga dala: Yima min gong nga kud’ora hi Ma didinid’ina mi mba nga d’uo tua.
3 Kayam ndata, Ma didina mi dazi zlad’a avun mam ma djok vuna Aze ala: 4 Na ni ata yima gong manda nga b’laka kä woina natchogoi d’a djivid’a kagi agi á kagagi kur aziyagi ma djivina zu?
5 Ki tchetchemba, Ma didin ma ad’engêm kal petna mi de kua ala: Agi djib’eregi yam tit magid’a. 6 Agi nga zumugi ngola, wani agi nga dud’ugi akid’eid’a; agi nga tagiya, wani agi nga hobogi d’i; agi nga tchagiya, wani nga vagi laud’a d’i; agi nga tchugugi baruna atagiya, wani tagi nga d’i ve d’ut ti. Sama le sunda nga mi ve bege mamba, wani nga d’i ndagam mbi.
7 Ma didin ma ad’engêm kal petna mi de kua ala: Agi djib’eregi yam tit magid’a. 8 Agi i djagagi yam ahinad’a, agi kagï aguna, agi minigi gong manda. Hina wani, tan mba d’i lan djivid’a, a mba suburun mi. 9 Agi nga tinigi hurugi yam ahlena ngola, wani agi nga fagizi akid’eid’a; agi nga mbagi kahlena avo ngola, wani an nga ni fozi woyo. Ni kayam me ge? Ni kayamba gong manda nga b’laka kä woid’a, wani agi nge nge pî nga mi b’at tam á min aziyamu. 10 Ni kayam ndata ba, akulod’a nga d’i gagi mbad’ïd’a d’i, andagad’a nga d’i wulugi ahlena d’uo mi. 11 Ni hina ba, an mba ki baktarad’a yam ambasa, yam ahuniyôna, yam asine ma awuna, yam ma guguzlud’a, yam ma olifâ, yam ahle suma a nga vut yam andagad’ina, yam suma, yam d’uwarâ, yam sun nda lara ge pet ta suma a nga lat kabozid’a mi.
12 Zorobabel Salatiyel goroma, ma ngol ma ngat buzuna Josue Josadak goroma kablau suma pet, a ge yazi kä ad’u dela hi Ma didina Alo mazinid’a yam zlad’a hi ma djok vun Alona Aze-d’a d’igi Ma didina Alo mazina mi sunumï na mi. Suma a le mandarâ avok Ma didina. 13 Aze ma Ma didina mi sunuma, mi de mi suma d’igi Ma didina mi sunumï na ala: Ma didina mi dala: An nga ki sed’egiya.
14-15 Ma didina mi mal djib’era hi Zorobabel Salatiyel gorom ma nga mi te yamba avo Juda-na ki djib’era hi ma ngol ma ngat buzuna Josue Josadak goroma ki djib’era hi suma a arâ pet. Ni kur bur ma dok mbà yam fid’ina hi til ma karagayana kur biza d’a mbà d’a Dariyus nga mi tamulid’a, azi mba, a nga le sunda kur gong nga kud’ora hi Ma didin ma ad’engêm kal petna, Alo mazinid’a.
© Azumeina Bible © Alliance Biblique du Tchad, 1999.
