Murud’umba hi sanid’a
1 Ni sawal la David azongâ hi Ma didinina mi hlat mi hat mi ma ngolâ hi suma hle sawalina.
2 Zla d’a de d’a ndjendjed’a hi ma asa’atnid’a
ei ni kurum krovo dei,
nga mi le mandara Alona d’i.
3 Nga mi subur tam katam vam
tala ar tcho mamba nde woi abu d’uo d’a,
nga mi ar tcho mam ndata woi d’uo mi.
4 Zla d’a de d’a ndavunamba ni zla d’a kad’a ki lop ira,
ne d’a tinim á le sun nda djivid’id’a,
mi wal tam mbei ki sed’ed’u.
5 Nga mi djib’er yam mbut ira ata yam ma burâ,
mi nga kaka kur lovot ta ata yat tuo d’a,
nga mi wal lei ki tcho d’a led’a d’uo mi.
Djivid’a hAlonid’a
6 Ma didina, o mang nga didinda ti i akulo gak tcha hur alona,
d’engzeng manga ti i akulo gak yam d’ugula.
7 D’ingêr manga nga d’i i akulo d’igi ahina d’a fiyaka na,
sariya manga nga d’i i kä d’igi zul la yiyika na.
Ma didina, ang nga ngom suma kahle suma a nga karid’ina mi.
8 Alo mana, djivi mang nga kal teglesa ti ngola heî.
Suma a ngei tazi nad’u gigingângû.
9 Azi nga hop kahle suma zul avo hatang heîna,
ang nga hazi mbiyo alum mang ma djivina á tched’a.
10 Kayam angî sidei arid’a, arid’a tcholï natangû;
ni kayam b’o manga ba, ami nga wami b’od’a.
11 Ang tak o mang nga didinda woi yam suma a wangâ,
ang simat d’ingêr manga woi yam suma huruzi djivid’ina.
12 Ar sama subur tama mi lan va d’i,
ar sama asa’atna mi digin nduo mi.
13 Gola! Suma le tchod’a a puk wa kä avorongû;
a zud’uzi kä,
a ndak á tchol akulo d’uo d’a.
© Azumeina Bible © Alliance Biblique du Tchad, 1999.
