Vama tak ma yam telina
1 B’oziyona, agi wagi nga d’uo zu? An nga ni de zlad’a mi suma a we gatina. Gata ti nga kad’enga yam sana kid’a mi nga ki iram tua d’a. 2 Le atchad’a ti ve mandjufâ ni, gata ti djinit ki ndjuvut kid’a mi nga ki iramba. Wani le ndjuvut mi mid’a ni, ti but wa woi kur djin nda gata ti djinit ki ndjuvuta. 3 Kayam ndata, le ti ve mandjuf ma dingâ kid’a ndjuvut nga karid’a tua d’a ni, a mba yat ala atcha d’a mizeuna. Wani le ndjuvut mi mid’a ni, ti but wa woi kur gat ndata. Le d’i ve mandjuf ma dingâ pî, a mba yat ala atcha d’a mizeuna d’uo d’a. 4 Kayam ndata, b’oziyona, ata yima agi zlabagi tu ki hliu tad’a hi Christ-sîna, agi bogi woi ata gata. Ki tchetchemba, agi mbud’ugi ni suma hi sama dingîna, nala, hi mam ma tchol akulo aduk suma matnina. Hina, ei lei sun nda djivid’a yam Alona. 5 Kid’a ei tid’i yam minda hi sa mei ma adjeunid’a, gata ti zut djib’er ra tchod’a á le sunda ir hliu tei á ï kur matna. 6 Wani ki tchetchemba, ei boi wa woi ata gat ta djini kä d’a, ei bud’i wa woi kur gata. Hina, ei lei sun nda awilid’a mAlona ni yam ad’enga hi Muzuk mamid’a, wani nga ni yam ad’enga hi gat ta adjeu d’a a b’irita d’i.
Gata ki tchod’a
7 Kayam ndata, ei mba dei nana ge? Gata ni tchod’a zu? Nga na d’i! Wani gata ti tagan tcho manda. Ladjï gata ti dala: Ang le d’od’oka d’i d’uo ni, an ndak á we d’od’oka d’i. 8 Wani tchod’a ti fad’enga ni yam vun ma hed’a hi gatina á le sun nda d’od’oka teteng kurunu. Ladjï gata nga d’uo ni, tchod’a ni vama matna. 9 Adjeu d’a gata ti nga kan nduo d’a, an nga karid’a. Wani ata yima vun ma hed’a hi gatina mi mbana, tchod’a ti mbut arid’a, 10 an mit teyo. Vun ma he ma in kur arid’ina, mi mbut ni vama mi in kur matnina. 11 Ni kayam vun ma hed’a ba, tchod’a ti fe lovota á lobonu. Ni yam vun ma he máma ba, tchod’a ti tchan ndei mi.
12 Hina, gata ni vama bei tchod’a ba na, vun ma hed’a ni vama bei tchod’a ba ma d’ingêr ma djivina mi. 13 Na ni vama djivina mi mbut vama tchana zu? Nga na d’i! Wani ni tchod’a ba, ti tchan ndeyo. Wani ata yima tchod’a ti le sunda yam vun ma hed’a hi gatina, ti tak kei ala tcho d’a tata ni vama tchona. Hina, yam vun ma hed’a ba, tchod’a ti mbut tcho d’a ngol la kala.
Tchod’a te yam sana
14 Ei wei ala gata ni hi Muzu’îd’a, wani an ni sama kur hliuna, an ni magoma hi tchod’ina mi. 15 An nga ni wäd’u vama an nga ni luma d’i, kayam an nga ni le vama an minim á led’ina d’i, wani vama an minim mbuo na, an nga ni lumu. 16 Wani le an le vama an minim mbuo na ni, an wala gata ni djivid’a. 17 Hina, ni an tanda ba, nga ni lahle ndazina d’i, wani ni tcho d’a nga kaka kurunda ba, nga d’i laziya. 18 An wala vama djivi mi nga kurun ndi, nala, kur sa man ma adjeuna. Wani le an min á le djivi d’a nga kurunda pî, an ndak á lat ti. 19 Kayam djivi d’a an min lata, an nga ni lat ti, wani tcho d’a an min lat tuo d’a, an nga ni lad’u. 20 Wani kid’a an nga ni lahle suma an min lazi d’uo nid’a, ni an tanda ba, nga lazi d’i, wani ni tcho d’a nga kaka kurunda ba, nga d’i laziya.
21 An fe gat ta wanda: Ata yima an min á le djivid’ina, an le ni tchod’a zang. 22 An tan nga ni le furîd’a kurun krovo yam gata hAlonid’a. 23 Wani an we gat ta dinga ti nga kur hliu tanu, ni d’a nga dur ayîna ki gata hi djib’er mandid’a á mbud’un magoma hi gata hi tcho d’a nga kur hliwindina. 24 Ni zla d’a hohoud’a kanu! Sama mba mi pad’an ndei kur hliwin ma in kur matnina ni nge ge? 25 An le mersi mAlona yam Jesus Christ Saleina.
Hina, an tanda nga ni le sunda kur gata hAlonid’a ki djib’er manda, wani kur sa man ma adjeuna, an nga ni le sunda ni kur gata hi tchod’id’a.
© Azumeina Bible © Alliance Biblique du Tchad, 1999.
