Buzuk ka Abud’a 30 - Azumeina Bible 1999 (MPG)

Yima ngal dubang ma his djivid’ina

1 Ma didina mi de mi Moise kua ala: Agi minigi yima ngal dubang ma his djivid’ina kagu kasiyana. 2 Agi minimî abo tam tu; fiyagam nus metred’a, bubuwam nus metred’a, fiyagam mba akulod’a metred’a tu mi. Agi pad’am kengêm ma fid’ina akulo adivadif abo tam tu. 3 Agi gulud’um yam ma halhalâ, huyogom ma abuna ki kengêm ma fid’ina ki lor ra kal teglesa. Agi tinim vunam ma dalalâ ki lora pepet mi. 4 Agi yorogi b’alang ma lora mbà ata vunam ma ad’u kä ma yam kengêm ma mbànina, agi nigigi karangâlina kua á hlum kiya. 5 Agi kagi agu kasiyana karangâlina, agi gulud’um ki lora mi. 6 Agi tinigi yima ngal dubang ma his djivid’ina avok baru d’a ka ir ra nga avok zanduk manid’a, avok zandu’â vunam ma duk ma nga tinda akulo yam zanduk man mámina. Ni yima an mba ni ngavagi kuana. 7 Yorogo d’a lara pî, Aron mba mi ngal dubang ma his djivid’ina ata yima mi min lalambina. 8 Fladege d’a lara pî, Aron mba mi ngal dubang ma his djivid’ina ata yima mam do lalamba akud’ina. Ni hina ba, mba mi ngalan dubang ma his djivid’ina kur atchogoi d’a lara ge pet. 9 Agi hagi dubang ma his djivi ma dingâ á ngala yam yi máma d’oze vama ngat buzu ma ngala d’oze he d’a hawa d’a afuta d’i. Ar agi vogi süm guguzlud’a kam mbuo mi.

10 Aron mba mi yam buzuna hi vama a ngad’am á zlup yam tchod’ina ata keng yima ngal dubang ma his djivid’ina yam tu kur bizad’a. Agi lagi hina á zlup yam tchod’a kur biza d’a lara ge pet kur atchogoi magid’a pet mi. Yima ngal dubang ma his djivid’a máma mba mi arî yima yed’et ma a tinim iram vam yam an Ma didinina.

Moise mi ndum Israel-lâ

11 Ma didina mi de kua ala: 12 Ata yima ang mba ndum Israel-lîna, ar nge nge pî adigazi mi he va mi an Ma didina á wurak yam tam ata yima ang mba ndumuzina. Hina wani, tugud’ei d’a tcho d’a tchi matna mba d’i nde adigazi d’i.

13 Suma ang ndumuzina pet, nge nge pî mi he bege d’a hapa grama vavahl ndak ir aneka hi bege d’a a ngat á hed’a yam zlub’u d’a kud’orid’a. Bege ndata ni ir gera dok mbà , ni he d’a hawa d’a yam an Ma didinid’a. 14 Suma ang ndumuzina pet suma bizazi dok mbàna ki suma bizazi kal dok mbàna pet a han he d’a hawa ndata. 15 Ma ndjondjoîna mi wurak kal bege d’a a ngata d’i; ma houd’a mi wurak kid’ak grama vahl hluo mi; ni he d’a hawa d’a yam an Ma didinid’a, kayam azi wurak yam taziya. 16 Le ang ve wa bege ndata aboziya ni, ang le ki sunda hi zlub’u d’a ngaf tad’id’a. Mba d’i arî vama ge humba yam Israel-lâ avoron an Ma didina á wurak kaziya.

Hal ma ngol ma mbusa

17 Ma didina mi de kua ala: 18 Agi yorogi hal ma ngol ma mbusa ki kawei ma hleuna, agi lagi vama ad’um kä na ki kawei ma hleuna mi. Agi tinim aduk zlub’u d’a ngaf tad’a ki yima ngal ahle suma ngat buzuna, agi oî mbina kur kä, 19 kayam Aron azi ki groma a mba mbus abozi kasezi kua. 20 Ata yima a i á kal kur zlub’u d’a ngaf tad’a, d’oze a mba ata yima ngal ahle suma ngat buzuna á le sun nda ngal ahle suma ngat buzuna suma ngala avorona, azi mbus abozi kasezi ki mbiyo máma kayam azi bo d’i. 21 Gagazi, azi mbus abozi kasezi kayam azi bo d’i. Gat ndata mba d’i arî gat ta didinda yam Aron kandjavam ma kur atchogoi d’a lara ge petna.

Zla d’a yam mbul ma a tinim iram vama

22 Ma didina mi de kua ala: 23 Agi yogi andjaf mbul ma his ma afufuî ma kal teglesâ teteng: Mir ma nga mi djang kä na kilona vahl, sinamoma kilona mbà ki nusa, kanelâ kilona mbà ki nusa, 24 kasâ kilona vahl ndak ir aneka hi bege d’a a ngat á hed’a yam zlub’u d’a kud’orid’a ki mbul olifâ lidirâ karagaya mi. 25 Ar sama le suna mbul ma his ma afufuînina mi gizeyêzi á mbut mbul ma a tinim iram vama á vom yam suma ata yima a mba tinizi ki kur sundina. 26 Ni mam ba, ang mba vom yam zlub’u d’a ngaf tad’a, yam zanduk mana, 27 yam tabulâ kahle mam suma sunda, yam agu lalamba kahle mam suma sunda, yam yima ngal dubang ma his djivid’ina, 28 yam yima ngal ahle suma ngat buzuna kahle mam suma sunda pet, yam hal ma ngol ma mbusa ki kawei ma ad’um kä na mi. 29 Ang tin ahle ndazina irazi vaziya, azi mba mbut nahle suma yed’et suma kal teglesâ. Vama lara ma mba mi dozina mba mi mbut yed’et mi. 30 Ang vo mbulâ yam Aron azi ki groma, ang tinizi irazi vazi á lan sun nda ngat buzuna.

31 Ang de mi Israel-lâ ala: Wana ni mbul ma yed’et ma a mba tinim iram vam kan an á vom yam suma ata yima a mba tinizi ki kur sundina kur atchogoi magid’a petna. 32 Ar sa mi lum atam mbi, ar agi yorogi andjaf mbul ma gizeîd’a d’igi mam na na d’uo mi. Kayam mam mi mbul ma a tinim iram vama, agi ngomomî vam hina baba. 33 Sama lara ma yor andjaf mbul ma d’igi mbul máma na na d’oze ma mi vom yam sama nandjaf Aron nduo nina, a mba pad’am mbei aduk sum mama.

Mbul ma his ma afufuî ma a tinim iram vama

34 Ma didina mi de kua ala: Ang yo mbul ma his ma afufuîna, nala, mbul estaktena, mbul onisâ ki mbul galbanuma. Ang nga dubang ma his djivid’a ma d’igila hirwiling ma kal teglesâ dedeged’a tu, ang vom kam kua. 35 Ar sama le suna mbul ma his ma afufuînina mi gizeyêzi ki ndjuvuna á mbud’uzi dubang ma yed’et ma a tinim iram vama á ngala. 36 Ang bihl nde giligimu, ang tinim kä avok zanduk man ma nga kur zlub’u d’a ngaf tad’ina ata yima an mba ni ngavang kuana. Mam mba mi mbut ni va magi ma yed’et ma kal teglesâ. 37 Ar agi yorogi dubang ma his djivid’a ma gizeî ma d’igi mam na na á le ki sun magid’a d’i, agi golomî vama a tinim iram vam kayam an Ma didinina. 38 Sama lara ma yor dubang ma his djivid’a ma d’igi mám na na á hizima, a mba pad’am mbei aduk sum mama.