Job mi de kua ala: An min we bur ma djivi ma kalâ
1 Job nga mi i avogovok ki zla mamba mi dala:
2 An le ni nana ba, ni kak d’igi an kak adjeu
d’a Alona nga mi ngomonda na ge?
3 Ata yi máma lalam mamba nga d’i b’o woi kanu,
b’o mamba nga d’i ndjunun á nde woi kur nduvunda mi.
4 An le ni nana ba, ni kak d’igi kur bur ma an djeng sana
Alona nga mi kak ndjola kan d’igi banama na na ge?
5 Ata yi máma Ma ad’engêm kal petna mi nga zlapa ki sed’en tua,
gron suma azungeîna a nguyun kä,
6 an mbus asen ni ki mbul ambira,
ahinad’a nga d’i djangî mbulâ kan kä d’igi toliyonda na mi.
*
7 Ata yima an nde woi á i avun azì ma ngolâ
á kaka ata yima suma a tok kuanina,
8 azungeîna a wanu, a hut tazi woyo;
momorogeina a tchol akulo kasezi mi.
9 Suma nglona a ba zla mazi d’a ded’a,
a duk abozi avunazi mi.
10 Suma te yamba a seng silil,
sinazi ti b’al akulo ata d’id’igazi mi.
*
11 Suma a hum zla mandina a le furîd’a kanu,
suma a wana a le glangâsâ kan mi.
12 An sut ma hou ma nga mi yi ala a ndjunumu na,
ki ma hokuyo ma sama ndjunum nga d’uo na mi.
13 Suma a nga lá matnina, b’e vun mazina mi djok kanu,
an le atcha d’a modonod’a tat djivid’a, ti le hur ma hapma mi.
14 D’ingêra ti ni baru man ma tchuka,
sariya man nda ka d’a d’ingêra
ni baru man nda ngola ki djum manda mi.
15 An mbut ni d’igi ira hi ma dukid’a na,
an mbut ni d’igi asema hi ma dileîd’ina na mi.
16 An mbut nabud’a hi suma houd’a,
an hal ad’u zlad’a hi sama suma a wum nga d’uo na.
17 An kus aging sama batrangâ woyo,
an prut suma mi vazina woi avunam mi.
*
18 Ata yi máma an dala: An mba ni mit kur aziyan ma d’igi ma haleina na na,
an mba ni le burâ ablaud’a d’igi lesâ na.
19 An mbut ni d’igi agu ma sideyem nga tchola aduk mbinina na,
mbad’ïd’a mba d’i gan abon andjege mi.
20 Subur manda mba d’i mbut awilid’a atanu,
agu yeû manda mba d’i fad’enga hur abon mi.
*
21 Azi a humunu, a nga djuba;
a golonu, a seng silil á hum d’al ma an duma.
22 Bugol zla manda, sa nga mi tchi tuguyo d’i;
zla manda nga d’i yak kazi kä d’igi mbad’ïd’a na.
23 A djubun d’igi suma a djup alo ma sed’a na,
a tin huruzi yam zla manda d’igi suma a tin huruzi yam alo ma hod’ogeid’a na mi.
24 Ata yima an nga ni dazi zlad’a ki sandina, a le atchap;
le an dazi zlad’a ki sanda ni, a fad’enga.
25 An kak kaziya, an tagazi lovota,
an kak adigazi d’igi amulâ mi kak aduk azigar mama na
d’igi sama mi de d’alâ mi suma huruzi b’la’â na mi.
© Azumeina Bible © Alliance Biblique du Tchad, 1999.
