Jonas mi so vun Alona
1 Ma didina mi he vuna mi Jonas Amitai goroma ala: 2 Ang tchol i kur azì ma ngol ma Ninif-fâ, ang ngobozi kad’enga, kayam an we tcho mazid’a ti kal ngola heî gak ti mba akulo geven ka hî.
3 Wani Jonas mi tchol á ring Tarsis woi dei avok Ma didina. Mi i Jafa, mi fe bato d’a i Tarsis-sa, mi wurak beged’a, mi ful kur batod’a ki suma a le sunda kurutna á i Tarsis woi dei avok Ma didina.
4 Wani Ma didina mi tchol ki simet ma ngolâ mi sir yam aluma; abil ma ngolâ mi giget batod’a, ti ar go á kusa. 5 Ata yi máma suma a le sunda kur batod’ina a nde le mandarâ, nge nge pî nga mi yi alo mama ala mi ndjunumu. A nde yo ahle suma kur batod’ina, a nga tchuguzi woi kur aluma, kayam batod’a ti ar afefeta. Wani Jonas mi kal wa kä ad’u batod’a, mi bur sena d’ad’ak. 6 Ma ngolâ hi batod’ina mi hut gevemu, mi dum ala: Ni kayam me ba, ang bur sena ge? Ang tchol akulo, ang yalo mangâ, dam mba mi wei hohoweya, mba mi arei ei boi woi d’uo kla.
7 Suma le sunda kur batod’ina a nga de tazi ala: Mbeigiya, ei lei togina á we sama mi mba ki ndaka keina. A le togina; mi nde yam Jonas.
8 Ata yi máma a dum ala: Ang damiya, ni nge ba, mi mba ki ndak ndata kei ge? Ang le ni suna me ge? Ang tcholï ni lara ge? Ambazangî d’a lara mi ge? Angî andjaf ma lara ge?
9 Jonas mi hulong dazi ala: An ni ma Hebre-na, an kud’orî Ma didina Alo ma akulo ma mi le alum ma ngolâ kandagad’ina.
10 Ata yi máma mi vazi ad’u zla mamba. Kid’a sum ndazina a hum ala mi ringî woi avok Ma didina d’a, a le mandarâ ngola. A dum ala: Ni kayam me ba, ang le hina ge? 11 Ami langî nana ba, aluma mba mi tchol ge? A de hina ni kayam me aluma nga mi i avogovok ki sulula.
12 Mi hulong dazi ala: Agi hlan gan ndei alumu, aluma mba mi tchola. An wala ni yam an ba, simet ma ngolâ mi tchol ki sed’egi wana.
13 Wani sum ndazina a kuk á i ki batod’a avun gongôd’id’a. Wani pî, azi ndak ki, kayam aluma nga mi sulul avogovok ngola kazi tua. 14 Ata yi máma a tchi avok Ma didina, a dum ala: Ma didina, ami nga tchenengû, ar ami bomi woi yam sa máma d’i. Ar ang tinimi matna hi sama mi lami nga va d’uo na kami d’i. Ma didina, ni ang ba, lahle ndazina ata min manga. 15 Azi hle Jonas, a gum mbei kur aluma. Ata yi máma na wat aluma ba sulula. 16 Ata yi máma sum ndazina a le mandar Ma didina ngola, a ngad’am buzuna, a hlum vunazi mi.
© Azumeina Bible © Alliance Biblique du Tchad, 1999.
