Gat ta a hat yam vana hi ndrangînid’a
1 Moise mi de kua ala: Le agi wagi amuhlâ d’oze timina hi ndraginina nga mi i á bad’a woyo ni, agi aram mi ba woi d’i, agi vum im mi salama. 2 Le salama mi nga go ki sed’egi d’uo, agi wum nga d’uo mi ni, agi igi ki va máma avo hatagiya, agi ngomom avo hatagi gak bur ma salama mba mi djobom zlama. Ata yi máma agi humziya. 3 Agi lagi hina ki koro mama ki baru mam mba ngola ki va mam ma lara ma mi vit tei ma agi fuma. Agi aram mi ba woi d’i.
4 Le agi wagi korona hi ndraginina d’oze amuhl mama, mi puk kä lovod’o ni, agi golom tä d’i, agi ndjunum hlumzi akulo.
Gat ta tetenga
5 Moise mi de kua ala: Ar atchad’a ti tchuk baruna hi mandjufîna d’i, ar mandjufâ mi tchuk baruna hatchad’ina d’uo mi. Sama mi le hina na mi le ni vama ndjendjed’a avok Ma didina Alo magina. 6 Le agi fagi azì aleina glovod’o, le nata aguna akulo d’oze kä andaga grona d’oze asena nga kur ba, asuzi ti nga burâ kaziya ni, agi vagi asud’a ki grotna pet ti. 7 Agi aragi asud’a ti iya, agi yogi grod’a kayambala agi kagagi ki furîd’a agi tagi tatâ yam andagad’a d’a.
8 Le agi minigi dudur ra awilid’a ni, agi minigi gulumuna avunat akulo kayambala sana mi ndeï kä kua ba, buzuwam mi ar kagi d’uo d’a.
9 Ar agi zaragi andjaf ahle suma dingâ aduk asine magi ma guguzlud’a d’i. Le agi lagi hina ni, ahle suma kur asine maginina pet zlapa ki vud’a guguzlud’a, a mba tinizi irazi vazi mi Ma didina. 10 Ar agi gagi dju’â kel amuhlâ ki korona á zuma tu d’i.
11 Ar agi tchugugi baru d’a a tchilit ki tumus tumiyônid’a zlapa ki baru d’a par ra lalavata atagi d’i.
12 Agi djinigi baru d’a botlozi d’a bizeibizeid’a fid’i avun baru ma agi mba tchugugizi atagina.
Gat ta vatchad’a
13 Moise mi de kua ala: Le sana mi vatchad’a, mi zlap ki sed’ed’u, bugol hurum vat nga d’uo ba, 14 nde mi tchugut zla d’a aboina kat ala: Gor ndata tit mata nga atat yat tuo. An ni vad’u. Kid’a an zlap ki sed’eta, an fat nga gor atchad’a d’uo ni, 15 ata yi máma gor ndata simiyêt a i ki vama tak mala gorozid’a ni gor atchad’a na avok suma nglo suma hur azinina. 16 Abut mi dazi woi ala: An ni he goronda mi sama wana, wani mam hurum vat nga d’i, 17 mi nde tchugut zlad’a kat ala mam fat nga gor atchad’a d’i. Wana ni vama tak ma katna. Simiyêt a tchuk baru ma azi bur kam ma buzuna tub’ak kuana kä avok suma nglo ndazina. 18 Suma nglo suma hur azinina a ve sa máma, a tom a gad’amu. 19 A kam sariyad’a kam mi wurak gora abut bege d’a hapa kis, kayam mam mi le glangâs ma aboina yam gor ra Israel-la. Bugola, mi vad’u, mi kak ki sed’et gak mat mama; mi nga ki lovota á digit tei ti.
20 Wani le zla ndata ni zla d’a irata, le gor atcha ndata a fat nga gor atchad’a d’uo ni, 21 ata yi máma a nde ki sed’et tei avun azina habutna, suma hur azinina a durut kahinad’a, a tchat teyo, kayam ti le ni sun nda ata yat tuo d’a aduk Israel-lâ, ti b’lak tat navo habud’u. Hina wani, agi mba d’elegi tcho d’a led’a woi adigagiya.
22 Le a ve sana mi bur katcha d’a a telet tei dad’a ni, mandjufâ katchad’a djak, agi tchazi woyo. Hina wani, agi mba d’elegi tcho d’a led’a woi aduk Israel-lâ.
23 Le sana mi ngaf ki gor atcha d’a a kat dad’a hur azina, mi bur ki sed’ed’u ni, 24 agi buzuguzi woi avun azina, agi duruzi kahinad’a zla tazi djak. Agi tchazi woyo, kayam gor atcha ndata ti yi nga akulo d’i, kayam ahle ndazina a le ni hur azina avo, kayam sa máma mi burî katcha d’a sama dingâ mi kata. Hina wani, agi mba d’elegi tcho d’a led’a woi adigagiya. 25 Wani le sana mi ngaf ki gor atcha d’a a kata nabagei ba, mi b’lagad’u ni, agi tchumî mam tu. 26 Agi lagi va ki gor atchad’a d’i, kayam ti le nga tcho d’a ndak á matnid’a d’i. Zla ndata ti hle tat ni d’igi sana mi bur ndrama kä, mi nde kam mi tchum na. 27 Gor atcha d’a a kat ta sa máma mi ngavat abageid’a, dam ti tchi wa wulula, wani sama ndjunut nga d’uo d’a.
28 Le sana mi ngaf ki gor atcha d’a a kat nga d’uo d’a, mi bed’et mi bur ki sed’et ba, a faziya ni, 29 sama bur ki sed’et máma mi wurak bege d’a hapa dok vahl mabud’u, kayam mi b’lagad’u, mi vat atchad’a mi. Mi kak ki sed’et gak mat mama; mi nga ki lovota á digit tei ti.
30 Ar sa mi vatchad’a habumba á we gandilad’a habumba d’i.
© Azumeina Bible © Alliance Biblique du Tchad, 1999.
