Jerusalem mba awilid’a
1 Ndak Jerusalem, yam o d’a an lat kaka,
an nga ni ba vunan ndi;
Ndak Siyon, yam o d’a an nga ni lat kaka,
an mba ni tuk tan ndi
gak prut mak ka woid’a mba d’i nde woi d’igi yima fod’a na,
gak sut maka mba d’i ngal d’igi aku d’a ganda hina tua mi.
2 Ata yi máma andjaf suma a mba we sut ta Ma didina mi sud’uka,
amuleina pet a mba we subur maka,
a mba yak ki simi ma awili ma Ma didina mba mi yakina.
3 Ndak mba d’i mbut ni d’igi avaval la subura na
hur abo Ma didina,
d’igi djum mba amula na
hur abo ma biyarâ hAlo ma’îna mi.
4 A mba yak ala Ta a digit teid’a d’uo d’a,
a mba yandaga maka ala Ta a arat teid’a d’uo mi,
wani a mba yak ala Ta an hurun vat heîd’a,
a mba yandaga maka ala Ta a teleta,
kayam Ma didina tam lum djivid’a kagu,
andaga maka mba d’i ve ndjufâ.
5 D’igi gor azongâ mi ve gor weid’a na,
hina mi, gro’â a mba mbut ni d’igi ndjuvuk na,
d’igi gor weid’a a teleta
ti ni furîd’a hi ndjuvut ma mi teletna na, hina mi,
ndak mba d’i mbut ni furîd’a hAlo ma’îd’a mi.
6 Ndak Jerusalem, an tin wa suma ndjola yam gulumun ma’â.
Azi mba ba vunazi falei d’oze andjege d’i;
agi suma nga gagi hum Ma didina
yam ahle suma a le ki Jerusalem-mina,
agi tugugi tagi d’i.
7 Agi aram ta d’i,
gak mi hulong mi minit blangât ma adjeuna,
gak mi mbud’ut vama subura hi suma yam andagad’ina pet mi.
8 Ma didina mi gun tam kabom ma ndjufâ
ki bigam mba sib’ika ala:
An mba ni ar mak suma djangûna
a mba tawu ma’â d’uo d’a,
an mba ni ar andjaf suma dingâ grozina
a mba tche süm guguzlu d’a ndak zumuta d’uo mi.
9 Wani suma a mba tok awunina a mba tumu,
a mba gilen an Ma didina;
suma a mba dut guguzlud’ina,
a mba tchat süm matna kur gulumuna
hi yi man ma an tinim iram vama.
10 Agi suma Jerusalem-ma,
agi buzugugi woyo,
agi buzugugi woi atogo kur azì ma ngolâ,
agi malagi lovota mi suma a nga djïna,
agi tozogi zul la kur lovot ta titid’a woyo,
agi yogi ahuniyôna woyo,
agi pagi drapod’a akulo mandjaf suma mi.
11 Gola! Ma didina nga mi de zla ndata woi
yam andagad’a pet ala:
Agi dagi mi suma Siyon-na ala:
Gola! Magi ma suta nga mi djï ki wurak mamba abomu.
Gola! Wurak ka yam sun mambid’a nga abom mi.
12 A mba yagi ala Suma a tinizi irazi vazina,
a mba yagi ala Suma Ma didina mi tchuguzi akulona.
Ndak Jerusalem, a mba yak ala
Azì ma ngol ma a aram mbeina d’uo d’a,
wani a mba yak ala Ta a le kat heîd’a.
© Azumeina Bible © Alliance Biblique du Tchad, 1999.
