1 Ma didina mi de mi Moise kua ala: Ang de mi Aron ala: Ang hlabong akulo ki totogo manga yam toliyonda, yam apo alum ma Nil-lâ, yam golongeîna, ar greneûna mi buzuk akulo yam andaga d’a Ezipte-d’a.
2 Aron mi hlabom akulo yam mbiyo ma Ezipte-na. Greneûna mi buzugï woi mi, mi oî mbimbigi yam ambas sa Ezipte-d’a. 3 Wani suma kuma suma Ezipte-na a lahle mazi suma mbut ndazina hina mi. Greneûna mi buzugï woi yam ambas sa Ezipte-d’a mi. 4 Faron mi yï Moise azi ki Aron, mi dazi ala: Agi tchenegi Ma didina kayam mi dik greneûna woi kan ki sum mana; an mba ni ar Israel-lâ a i á hahle suma ngat buzuna mi Ma didina.
5 Moise mi de mi Faron ala: Sama ngolâ, ang ngan burâ, ni mindja ba, an tchen Ma didina kayam ang kazungeî mangâ ki sum mangâ tala greneûna mi buzuk kei avo hatang avo hi sum mangâ d’a ge? Mba mi arî kur alum ma Nil-lâ hol.
6 Faron mi hulong dum ala: Navini.
Moise mi dum ala: Mba le na, kayam ang wala vama hle tam d’igi Ma didina Alo mamina na na nga d’i. 7 Greneûna mba mi buzuk kei avo hatangû, avo hazungeî mangâ ki sum mangâ mi. Mba mi arî kur alum ma Nil-lâ hol.
8 Moise azi ki Aron a buzuk kei avo hi Faron. Moise mi tchen Ma didina yam greneû ma mam mbam yam Faron-na. 9 Ma didina mi hum tchenda hi Moise-sa; greneûna mi bo woi hur gongîyona, hur azina, hur asinena mi. 10 A molom gubud’a gubud’a; ambasa b’ik kä ki hisâ b’ib’ik.
11 Wani kid’a Faron mi wala tam mbi tchuk simetna nde d’a, mi b’al hurum kiki, mi hum nga Moise azi ki Aron d’igi Ma didina mi hazi vuna na d’i.
Ndak ka hindid’a: Vurutna
12 Ma didina mi de mi Moise ala: Ang de mi Aron ala: Ang hle totogo manga akulo, ang wat andaga d’a gugud’upa. Mba d’i mbut vurutna kur ambas sa Ezipte-d’a pet.
13 A le hina mi. Aron mi hlabom akulo ki totogo mamba, mi wat andaga d’a gugud’upa. Andaga d’a gugud’up ndata ti mbut vurutna kur ambas sa Ezipte-d’a pet yam suma ki d’uwarâ. 14 Suma kuma suma Ezipte-na a lahle mazi suma mbuta á mba ki vurutna mi, wani a ndak ki. Vurutna mi nga yam suma ki d’uwarâ.
15 Ata yi máma suma kumana a de mi Faron ala: Vama le wana nad’enga hAlonid’a! Wani Faron mi b’al hurum kiki, mi hum nga Moise azi ki Aron d’igi Ma didina mi dazi adjeu na d’i.
Ndak ka fid’id’a: Azlipma
16 Ma didina mi de mi Moise ala: Ang tchol akulo ki yorogo tcholola, ang i ngaf Faron ata yima mi nde á i avun alumina, ang dum ala: Ma didina mi dala: Ang aran sum mana a i á kud’uronu. 17 Le ang ar nga sum mana á id’a d’uo ni, an mba ni tchuk azlipma atang kazungeî mangâ ki sum mangâ hur aziyangû. Hur azina hi Ezipte-na mba mi oî kazlipma yam andaga d’a azi nga kuad’a mi. 18 Wani kur bur máma an mba ni wal ir ambas sa Gosen nda sum mana a nga kaka kuad’a kambas sa Ezipte-d’a; azlipma mba mi tchila kua d’i, kayam ang wala an ni Ma didina ni nga kaka kur ambas ndata. 19 An mba ni le vama simata á wal ir sum mana ki sum mangâ avini.
20 Ma didina mi le na. Mi mba kazlip ma tchona adesâ adesâ avo hi Faron, avo hazungeî mama. Ambas sa Ezipte-d’a pet ti b’lak kei abo azlipma.
21 Faron mi yï Moise azi ki Aron, mi dazi ala: Agi i hagi ahle suma ngat buzuna mAlo magina, kur ambasa ka hî.
22 Moise mi hulong dum ala: Nga ata yat ti, kayam ahle suma ngat buzu suma ami hazi mi Ma didina Alo maminina nahle suma ndjendjed’a ir Ezipte-na. Le ami hami ahle suma ngat buzu suma ndjendje ndazina kä iraziya ni, a mba durumi kahinad’a á tchami woi d’uo zu? 23 Mbeî ami i tid’imi gak burâ hindi abagei hur fulâ á hami ahle suma ngat buzuna mi Ma didina Alo mamina d’igi mi hami vuna na.
24 Faron mi dum ala: Djiviya! An aragiya, agi i hagi ahle suma ngat buzuna mi Ma didina Alo magina nabagei hur fulâ go. Wani agi igi dei d’uo, agi tchenegi kan mi.
25 Moise mi hulong dum ala; Gola! An nga ni nde woi avo hatangû, an i ni tchen Ma didina. Ndjivin wani, azlipma mba mi buzuk kei avo hatangû, avo hazungeî mangâ, avo hi sum mangâ mi. Wani ang lobomi irami á d’elemi tala Israel-lâ a i hahle suma ngat buzuna mi Ma didina d’uo d’a d’i.
26 Moise mi nde woi avo hi Faron, mi tchen Ma didina. 27 Ma didina mi le d’igi Moise mi tchenem na. Azlipma mi buzuk kei avo hi Faron, avo hazungeî mama, avo hi sum mama pet mi; azlip tu pî mi ar ri. 28 Wani Faron mi b’al hurum kua kiki, mi ar nga Israel-lâ á id’a d’i.
© Azumeina Bible © Alliance Biblique du Tchad, 1999.
