*
1 Ki tchetchemba, ang yiya!
Ni nge ba, mi hulongông ini humba ge?
Ni nge ba, ma aduk malaika suma yed’etna,
mi hulongông ini zla d’a ded’a ge?
2 Hur ma zala nga mi tchi sama yam nga kam mbuo na woyo,
ayîna nga mi tchi sama lilid’a woi mi.
3 An we sama yam nga d’uo na sideyem nga mi sir kä,
atogo hina zak, an gum aziyam vuna ala:
4 Ar groma a fe sama a deng tazi atama d’i,
a kazi sariyad’a kazi ata yima ka sariyad’a bei sa mi ndjunuzi ba!
5 Suma meid’a tchazina a tawu mam ma mi dud’uma!
Awu mam ma aduk aweid’ina pî a dud’umu!
Suma vunazi sona a lik ndjondjoî mamba!
6 Djop vuna nga mi tcholï kä aduk andaga d’a gugud’upa d’i,
ndaka nga d’i deî ni kä aduk andagad’a d’uo mi.
7 A vut sana ná fe ndaka
d’igi aku d’a ti mun ti i akulod’a na.
*
8 Wani ladjï an ni angû ni, an mba ni de zla manda mAlona;
ni mam ba, an mba ni vum ad’u zla manda.
9 Mam mi sama mi lahle suma nglo suma sana mi ndak á vazi ad’uzi woi d’uo na,
ni sama lahle suma atchap suma sana mi ndak á ndumuzi d’uo na mi.
10 Nga mi salona yam andagad’a,
nga mi sunï mbina abagei yam asinena mi.
11 Nga mi hle yam suma lulumana akulo,
nga mi sut suma a nga kur yor tad’ina woi mi.
12 Nga mi b’lak nga hurâ hi suma lembina woyo,
azi ndak nga á ndak vun nga hur mazina d’uo mi.
13 Nga mi vik suma ned’a kur lem mazid’a,
nga mi b’lak d’alâ hi suma wed’a heîna woi mi.
14 Nga mi mbut yina nduvunda avorozi faleya,
a nga lam yina falei d’igi sana nga mi lam yina andjege na.
15 Alona nga mi sut suma hohoud’a woi
abo zla mazi d’a de d’a asa’ata,
nga mi prud’uzi woi abo ad’eng mazid’a mi.
16 Wani suma talala a nga ki hur ma tinda,
suma murud’umba a du’î vunazi akulo.
17 Gola! Sama Alona ngoboma mi le furîd’a!
Kayam ndata, ang gol ngopa hi Ma ad’engêm kal petnid’a is si.
*
18 Alona ni ma le sana ndaka, mi hulong mi sud’uma;
ni ma ka sana mbilâ, mi hulong tchilim abom melâ mi.
19 Mba mi sud’ung ngei kur ndaka yam karagaya.
Le ndaka mba kang yat kid’iziya pî,
mba d’i dong nguo mi.
20 Mba mi sud’ung ngei avun matna kur yima baktarad’a,
mba mi sud’ung ngei avun mbigeu d’a fiyaka kur ayî ma durâ mi.
21 Ang mba ngei tang ngei abo zla d’a de d’a tchod’a hi sumid’a,
ang mba le mandarâ kur bur ma b’laka mba yam sumina d’uo mi.
22 Bur ma b’laka ki baktarad’a a mba mbana,
ang mba san ni sana,
ang mba ring mandara amburei suma abageina d’uo mi.
23 Ang mba djin vunang kahuniyô suma abageina,
amburei suma abageina a mba lang va d’uo mi.
24 Ang mba kak ki halasa avo kur zlub’u manga;
fata ang i gol d’uwar mangâ kur kangânid’a,
ang mba fumî ata yam tched’imer.
25 Ang mba we sum mangâ a mba zul avogovogo,
andjavang mba mi d’ufî d’igi asu ma yam andagad’ina na.
26 Ang mba i azulei kä ni ki mamara kikra
d’igi a yo mbugulu d’a nga molid’a ata yat ma ndak á yod’a woina na.
27 Wana ni vama ami wuma! Zla ndata ni hina!
Ang huma, ang wad’ud’a djivi mi!
© Azumeina Bible © Alliance Biblique du Tchad, 1999.
