Ezekiyas mi sut tei kur tugud’ei mamba
(Gol 2 Amul 20.1-11)1 Kur atchogoi ndata Ezekiyas mi ve tugud’eid’a á matna. Ma djok vun Alona Isai Amot goroma mi mba gevemu, mi dum ala: Ezekiyas, Ma didina mi dala: Ang min ahligiyeng ki tchetchemba, kayam ang mit ni mid’a, ang nga tchol akulo d’uo d’a.
2 Ata yi máma Ezekiyas mi mbut tcha iram sä gumun gonga, mi tchen Ma didina ala: 3 Ma didina, ang djib’er yam tit ta an nga ni tit avorong memet ki hur ma tuna burâ ki burîd’a; an nga ni le sun nda djivid’a avorong burâ ki burâ mi. Ezekiyas mi tchi ngola.
4 Ata yi máma Ma didina mi de mi Isai Amot goroma ala: 5 Ang i de mi Ezekiyas ala: Ma didina Alona habung ngolo David-na mi dala: An hum tchen manga, an we simi mangâ mi. Gola! An nga ni hang bizad’a kua dogo yam vahl! 6 An mba ni sud’ung ngei ki suma kur azì ma ngol ma Jerusalem-ma abo amul ma Asiri-na, an mba ni ngom azì ma ngol máma mi .
21 Isai mi dala a hleï mbuka hi vut tulumid’a, a tinim ir mbilâ hi Ezekiyas-sâ. Ar mi tchol akulo.
22 Ezekiyas mi djop wa ala: Ni simad’a me ba, an mba ni wala an mba ni kal kur gong nga kud’ora hi Ma didinid’a kua ge?
7 Isai mi dum ala: Ma didina mba mi hang vama simata á we ki ala mam nga mi oî vun vama mam hle vunam kama. 8 Gola! Angusa mi duk yam yima tin asema hi Ahas-sâ ni dogo. Ki tchetchemba, Ma didina mba mi hulong kafata bugol yam yima tin asem ma dogo máma. Afata ti hulong bugol, ti nde yam yima tin asem ma dogo ma angusa mi tchol kua avo’â mi.
Tchenda hi Ezekiyas-sa bugol sut mambid’a
9 Wana ni mbaktum mba Ezekiyas amul ma Juda-na mi b’irit yam tugud’ei d’a lumba ki tchol mam mba akulod’a:
10 An de kurun ala:
An ar go á matna, djivid’a an ni iya.
An nga ni i avun agrek ma azuleina,
an dok dap vun biza man nda ara d’uo d’a.
11 An de kurun kua ala:
An mba ni we Ma didina kua yam andagad’a
hi suma a nga kaka ki irazina d’uo,
an mba ni we sa tu aduk suma
a nga kaka kur duniyad’ina d’uo mi.
12 Yi man ma kaka ang hlum mbeyo.
Ang im mbei ki sed’en d’igi a djok zlub’ud’a hi ma polid’a woi na.
Ari manda ang nga d’ud’ut
ni d’ud’a d’igi baru d’a sama tchil barud’a mi d’ud’ut
bugol mi hat teid’a na.
Ma didina, ang mba hlan avok bei afata niga.
13 An ve tan gak yorogo,
wani Ma didina nga mi kuzun asogon ndei
d’igi azlona mi kus asoga ahlena woina.
Ma didina, ang mba hlan avok bei afata niga.
14 An nga ni tchi d’igi ababeina mi tchina,
an nga ni zam tan d’igi gugud’a na.
Iran ndi mbut hohoud’a abo so d’a ni so iran akulod’a.
Ma didina, an nga kur ndaka. Ang ndjununu.
15 An de nana dei ge? Ni mam ba, mi lahle ndazina.
An mba ni tit ni yan ged’a kä hina gak ni dap biza manda
abo hurun ma mi b’la’â.
16 Salad’a, ni yam djivi manga ba, sana mi kak karid’a.
Ni kat ndat ba, an nga tua wana.
Ang tcholon akulo, ang han arid’a mi.
17 Gola! Hur man ma b’laka mi mbut ni furî manda.
Ang tang lan djivid’a, ang prud’un ndei avun matna,
kayam ang tchuk tcho manda sä woi blogong dei.
18 Nga ni suma ata yima azuleinina ba,
a mba suburung ngi,
nga ni matna ba, mba mi gileng ngi;
nga ni suma a nga i kä azuleina ba,
a tin huruzi yam d’engzeng manga d’uo mi.
19 Wani ni suma a nga ki irazi ini
d’igi an na na ba, a mba gilengû.
Nabuyod’a ba, a mba tak d’engzeng manga woi mi grozina.
20 Ma didina mi sud’un wa.
Ei mba gilem kur gong mamba kahle suma bud’a
ata yima ei nga ki irei yam andagad’ina pet mi .
© Azumeina Bible © Alliance Biblique du Tchad, 1999.
