Job mi de kua ala: Alona mi min á de zlad’a ki sed’en ndi
1 Job mi dala:
2 Gak ini tchi mana mi mbut ni vama kak djangû mana.
An ndak nga á ve vun zam ta manda kä d’i.
3 Ladjï an we yima mam nga kuana ni,
an mba ni i gak ata yima mam nga kaka kuana,
4 an mba ni tin zla manda avorom kä,
vunan mba mi oî ki d’op zla d’a an mba ni data,
5 an mba ni we zla d’a mam mba mi hulongôndji ded’id’a,
an mba ni we vama mam mba mi dandjina mi.
6 Na ni mam mba mi durun ayîna kad’eng mamba pet tchu?
Hawa yak! Mam mba mi humun ni huma d’ö.
7 Sä hî ma d’ingêrâ mba mi de zlad’a ki sed’emu.
Ni hina ba, an mba ni prut tei abo man ma ka sariyad’a ki iran fafat.
*
8 Wani le an i nabo ma yorogona, mi nga kua d’i,
an i nabo ma fladegena, an nga ni fum mbuo mi.
9 Yam sä d’i ve nabo ma norâ kla, an wum nga d’i,
mi ngei sä nabo ma sutna kla, an wum nga d’uo mi.
10 Wani mam we lovot ta an nga ni tit kuad’a.
Fata mi kugunda, an mba ni nde woi yed’et d’igi lora na.
11 Asen ma tita mi nga tinda balum asemu,
an ngom lovot mamba, an d’es nga woi kur ri.
12 An noî nga vun mam ma hed’a woi d’i,
an ngom zla d’a mam han vuna kata kurun krovo.
*
13 Vama mam dala: Le ni hina na,
ni nge ba, mi ndak á d’elem ge?
Vama mam hurum vum á luma,
mi nga mi lumu.
14 Nga mi ndak vun vama mam ngandji kana
d’igi nga mi ngom hur mam ma nga ma ding ma tetengâ na mi.
15 Ni kayam ndata ba, vunadigan ndi pat avoromu;
ata yima an djib’er kama, an nga ni lum mandaramu.
16 NAlona ba, mi tchugun tan susub’ok,
Ni Ma ad’engêm kal petna ba, nga mi pad’an vunadiganu.
17 Nga ni yima wurana ba, an ba vunan abom mbi,
nga ni nduvun nda i’îlika ba, ti dugun kä d’uo mi.
© Azumeina Bible © Alliance Biblique du Tchad, 1999.
