Gat ta mbut ta d’a yed’et yam libinid’a
1 Ma didina mi de mi Moise kua ala: 2 Wana ni gat ta yam sama libinid’a:
Kur bur ma mi mbut tam yed’etna, a mbamï mi ma ngat buzuna. 3 Ma ngat buzu máma mi nde woi abu kur kangâ. Le mi wala ma libi máma mi tchil wa kur tugud’ei mam mba libina ni, 4 mi he vuna ala a yoï aluwei suma yed’etna ki irazi mbà, a hleï agu sedrena ki vama hleuna kagu hisopma mi sa máma á mbut ki tam yed’et.
5 Ma ngat buzu máma mi he vuna ala a ngat alei ma dingâ tu yam mbiyo ma lau ma a gulum kä kur dei ma lubunina. 6 Alei ma arâ ma ngat buzu máma mi vum zlapa kagu sedrena ki vama hleuna kagu hisopma, mi nigizi zlapa kalei ma ar máma aduk buzu alei ma a ngad’am yam mbiyo ma lau ma a gulumï kä kur deinina. 7 Mi yam mbiyo máma ata sama libi ma mi mbut tam yed’et máma yayam yam kid’iziya. Bugola, mi de woi kam ala: Sama wana ni sama yed’etna! Mi i mi galei ma ar ari máma woi akulo abageya.
8 Sama mbut tam yed’et máma, mi mbus baru mama woyo, mi wel tumuzum mbei pet, mi mbus tam aduk mbina; mba mi mbut yed’et. Bugola, mi ndak á kal kur kangâ, wani mba mi bur kur zlub’u mamba d’uo gak burâ kid’iziya. 9 Kur bur ma kid’iziya máma mi wel tumuzum mbei pet, yamu, dudumamu, ki ir gomomu, mi mbus baru mama woyo, mi mbus tam aduk mbina; mba mi mbut yed’et.
10 Kur bur ma klavandina, mi yo gro tumiyô suma bei dakina mbà, timi d’a bizat tu d’a bei dakid’a ki he d’a hawa d’a afut ta a tib’eget ki mbulîd’a kilona zlengâ, ki mbulâ nus lidirâ mi. 11 Ma ngat buzu ma mi mbut sana yed’etna, mi i ki sa máma ki he d’a hawa mamba avogon an Ma didina avun zlub’u d’a ngaf tad’a. 12 Mi ve gor timi ma ding tu, mi hum vama ngat buzu ma yam tchilad’ina zlapa ki mbul ma nus lidirîna, mi gazazi akulo avogon an Ma didina. 13 Mi ngat gor timina nata yima a ngat ahle suma a hazi vama ngat buzuna á zlup yam tchod’ina ki vama ngat buzu ma ngalina ata yima a tinim iram vama. Kayam vama ngat buzu ma yam tchilad’ina ni d’igi vama ngat buzu ma zlup yam tchod’ina na, a humî mi ma ngat buzuna. Ni vama a tinim iram vam ma kal teglesâ.
14 Ma ngat buzu máma mi gul buzuna hi vama a ngad’am yam tchilad’ina mi dom ata sama mbut tam yed’etna humam mba abom mba ndjufa vunat ma lelegema, ata tchitchid’am mba modo d’a abom mba ndjufid’a, ki tchitchid’am mba modo d’a asem ma ndjufîd’a mi. 15 Mi hle mbul ma nus lidirîna, mi vom hur abom ma gulana, 16 mi nik tchitchid’am mba ndjufa aduk mbul ma mi vom hur abom ma gulanina, mi yamam avogon an Ma didina yayam yam kid’iziya, 17 mi do mbulâ ad’um mba ar abomba ata sama mi mbut tam yed’et máma humam mba ndjufa vunat ma lelegema, ata tchitchid’am mba modo d’a abom mba ndjufid’a, ki tchitchid’am mba modo d’a asem ma ndjufîd’a yam buzuwa vama a ngad’am yam tchilad’ina. 18 Mi vo mbulâ ad’um mba ar abomba yam sama mi mbut tam yed’et máma, mi zlubum yam tcho mamba avogon an Ma didina.
19 Bugola, mi ndak vun vama ngat buzu ma yam tchod’ina, mi zlup yam ndjendjed’a hi sama mi mbut tam yed’etna. Bugola, mi ngat vama a hum vama ngat buzu ma ngalina, 20 mi he vama ngat buzu ma ngala ki he d’a hawa d’a afuta yam yima ngal ahle suma ngat buzuna, mi zlup yam tchod’a hi sa mamid’a. Hina wani, sa máma mba mi mbut yed’et.
Gat ta yam sama libi ma houd’ina
21 Ma didina mi de kua ala: Le sama libina mi houd’a, ahligiyem ndak nga d’uo ni, mi ve gor timina tu yam vama ngat buzu ma tchilad’a, a gazam akulo avogon an Ma didina á zlup yam tcho mamba. Mi nga afuta kilona hindi, mi tib’eget ki mbulâ á hat he d’a hawad’a zlapa ki mbulâ nus lidirâ. 22 Mi yo gugu bed’egera mbà, d’oze gugu d’a avo d’a gureid’a mbà, ngad’a yam fe mamba, tu yam vama ngat buzu ma zlup yam tchod’a, tu yam vama ngat buzu ma ngala mi. 23 Kur bur ma klavandina mi mba ki he d’a hawa mam mba mbut tam yed’eta pet mi ma ngat buzuna avun zlub’u d’a ngaf tad’a avogon an Ma didina. 24 Ma ngat buzu máma mi ve gor timi ma a hum vama ngat buzuna yam tchilad’ina zlapa ki mbul ma nus lidirîna mi, mi gazazi akulo avogon an Ma didina.
25 Mi ngat gor timi ma a hum vama ngat buzuna yam tchilad’ina, mi gom buzuwam mi dom ata sama mi mbut tam yed’etna humam mba ndjufa vunat ma lelegema, ata tchitchid’am mba modo d’a abom ma ndjufid’a, ata tchitchid’am mba modo d’a asem ma ndjufîd’a mi. 26 Mi go mbulâ hur abom ma gulana, 27 mi domu, mi yamam avogon an Ma didina yayam yam kid’iziya, 28 mi dom ata sama mi mbut tam yed’etna humam mba ndjufa vunat ma lelegema, ata tchitchid’am mba modo d’a abom ma ndjufid’a, ata tchitchid’am mba modo d’a asem ma ndjufîd’a, yam yima mi do adjï buzuna hi vama mi ngad’am yam tchilad’ina kuana. 29 Mi vo mbulâ ad’um mba ar abomba yam sama mbut tam yed’etna á zlup yam tcho mamba avogon an Ma didina.
30 Bugola, mi ve gugu bed’egera d’oze gugu d’a avo d’a gor ra sa máma mi humzi ngad’a yam fe mambid’a, 31 mi hat vama ngat buzu ma zlup yam tchod’a. Mi he d’a dinga yam vama ngat buzu ma ngala zlapa ki he d’a hawa d’a afuta, mi zlup yam tchod’a hi sama mi mbut tam yed’et avogon an Ma didinina.
32 Wana ni gat ta yam sama mi mbut tam yed’et yam tugud’ei libina ma ahligiyem ndak nga d’uo na.
Gat ta yam huruguk ka ata gongid’a
33 Ma didina mi de mi Moise azi ki Aron ala: 34 Fata agi mba mbagiza kur ambas sa Kanan nda an mba ni hagizid’a, le an tin wa huruguka kur gonga kur ambas sa an mba ni hagizid’a ni, 35 sala gonga mi i de mi ma ngat buzuna ala: An we vana d’igi tugud’eid’a na kur gong manda.
36 Ma ngat buzu máma mi he vuna a yo ahlena woi kur gong ndata avok tua ba, mi kal klavi á gol tugud’ei ndata. Hina wani, ahle suma kur gong ndatina pet a mba mbut ndjendjed’a d’i. Bugola, ma ngat buzu máma mi kal klavi á gol hur gong ndata, 37 mi gol tugud’ei ndata. Le mi we yima huruguk huyok gong ndatina, mi nga waka avovovovo, d’oze hleuhleu ba, iram mbi djugot kä ni, 38 mi nde woi kur gong ndata, mi dugut vunat akulo gak burâ kid’iziya.
39 Kur bur ma kid’iziya máma mi hulongîya. Le mi we tugud’ei ndata ring ngei huyok gonga ni, 40 mi he vuna a pat ahuniyô suma tugud’ei ndata nde kuana woyo, a tchuguzi woi kel huyok azì ma ngolâ ata yima ndjendjed’a. 41 A hurok hur gonga woi pepet, a tchuguttcha woi kel huyok azì ma ngolâ ata yima ndjendjed’a, 42 a yo ahuniyô suma dingâ, a kalazi balum ahuniyô suma a pad’azi woina, a tub’ok lubu ma dingâ á gulut ki ir gong ndata.
43 Le tugud’ei ndata ti huruguk hur gonga kua, bugol la a pat ahuniyôna woi a hurogot tei a gulud’uta ni, 44 ma ngat buzu máma mi hulongîya. Le mi we tugud’ei ndata ti ring ngei huyok gonga ni, ni huruguk ka hur gonga adjeu dedeid’a; ti mbut ni ndjendjed’a. 45 A to gong ndata kä woi pepet, a yo ahuniyô suma a tinit ki na kagu ma katna ki lubu ma a gulud’ut ki na, a yozi mumud’ok, a tchuguzi sä woi kel huyok azì ma ngolâ ata yima ndjendjed’a.
46 Sama mi kal klavi kur gong ndata kid’a a dugut vunat akulod’a mba mi mbut ndjendjed’a gak fladege. 47 Sama mi bur kur gong ndatina, mi mbus baru mama woyo; sama mi te tena kur gong ndatina, mi mbus baru mama woi mi.
48 Le ma ngat buzu ma hulong kur gong ndatina, mi we tugud’ei ndata ti i nga avok kuo bugol la a gulud’uta ni, mi de woi kat ala: Gong ndata ti ni yed’et, huruguk mata ti dap pei da.
49 Ma ngat buzu máma mi yo aluweina mbà kagu sedrena ki vama hleuna kagu hisopma á mbut gong ndata yed’et. 50 Mi ngat alei ma dingâ tu yam mbiyo ma lau ma a gulum nga kä kur dei ma lubunina. 51 Mi hlagu sedrena kagu hisopma ki vama hleuna kalei ma ar tuna, mi nigizi kä aduk buzuwa alei ma mi ngad’am adjï yam mbiyo ma kur deinina, mi yamam ata gonga yayam yam kid’iziya. 52 Mi mbut gonga yed’et ki buzuwa alei ma mi ngad’ama, zlapa ki mbiyo ma laud’a kalei ma arâ kagu sedrena kagu hisopma mi. 53 Mi galei ma ki irama akulo huyok azina abageya. Ni hina ba, mi mbut gonga yed’et; ndat mba d’i mbut yed’et mi.
54 Wana ni gat ta teteng nga yam tugud’ei libina ki d’ud’ub’od’id’a, 55 yam guvur ra ata barunid’a ki huruguk ka ata gongid’a, 56 yam mbrudjuka, yam bigriuna ki ndal la ndundub’uka. 57 Gat ndata mba d’i hat suma ata yima ndjendjed’a nga na, ata yima yed’eta nga na mi. Wana ni gat ta yam libinid’a.
© Azumeina Bible © Alliance Biblique du Tchad, 1999.
