Matiye 27 - Azumeina Bible 1999 (MPG)

A i ki Jesus mi Pilat

1 Kid’a yina fo dad’a, nglo suma ngat buzuna ki zlazi pet ki suma nglona hi Juif-fîna a ndjak vunazi yam Jesus á tchum mbeyo. 2 Azi djinim a im a hum abo Pilat ma te yamba.

Matna hi Judas-sâ

(Gol Sun SS 1.18-19)

3 Ata yima Judas ma hum abo sumina mi we d’ala sariyad’a ti ve wa Jesus d’a, mi mbut hurumu, mi hulong ki bege d’a hap pa dok hindid’a mi nglo suma ngat buzuna azi ki suma nglona. 4 Mi dazi ala: An le tchod’a, kayam an he sama d’ingêrâ á tchid’a.

Wani azi dum ala: Ndolomi d’ei? Ni zla manga.

5 Mi yagazi beged’a kä kur gong nga kud’ora hAlonid’a, mi ndabua, mi i tchuk ziyona kelemu.

6 Wani nglo suma ngat buzuna a yo bege ndata, a dala: Gat meid’a arei nga lovota á tchuk bege ndata kur zanduk ma nga kur gong nga kud’ora hAlonid’ina d’i, kayam me ni bege d’a buzuna. 7 A ndjak vunaziya, a gus asinena hi ma min duguyonina ki bege ndata, kayam a tos angoyogeina kua. 8 Kayam ndata, asine máma a nga yum ala Asine ma buzuna gak ini. 9 Ahle ndazina a le hina ná ndak vun zla d’a ma djok vun Alona Jeremi mi dat ala: A yo bege d’a hap pa dok hindid’a ni bege d’a Israel-lâ a ndjak vunazi á hat kamba d’a. 10 A he bege ndata yam asinena hi ma min duguyona d’igi Ma didina mi han vuna na.

Pilat mi djop Jesus

(Gol Mar 15.2-5Luc 23.3-5Jn 18.33-38)

11 Jesus mi nga tchola avok ma te yamba. Ma te yamba mi djobom ala: Angî amulâ hi Juif-fîna zu?

Jesus mi hulong dum ala: Ang de wa da’. 12 Wani ata yima nglo suma ngat buzuna azi ki suma nglona a nga tchugum zlad’a kama, mi hulong nga zla d’a ded’a d’i.

13 Ata yi máma, Pilat mi dum ala: Ang hum nga ahle suma a nga tchugungzi kang wana d’uo zu? 14 Jesus mi hulongôm nga zla d’a ded’a d’i. Kayam ndata, ma te yamba mi le atchap ngola.

A ka sariya d’a matna yam Jesus

(Gol Mar 15.6-15Luc 23.13-25Jn 18.39—19.16)

15 Kur bur ma vun til ma Pak ma lara pî, ma te yamba kur hat mamba nga mi gazi sama dangeina akulo tu ma ablau suma a minima. 16 Kur bur máma, azi nga ki sama dangei ma simiyêm nga yi heîna, simiyêm ala: Jesus Barabas. 17 Pilat mi djop ablau suma a nga tokina ala: Agi min an gagi ni nge akulo ge? Jesus Barabas, d’oze Jesus ma a yum ala Christ-sâ zu? 18 Kayam mi we tcha ala ni yam yungôra ba, a hum ki Jesus wana.

19 Kid’a Pilat mi nga kaka yam zlam mba ka sariyad’a tua d’a, amamba geï sunda atamu. Ti dum ala: Ang le va ki sama d’ingêr máma d’i, kayam adïd’a dan kama andjege ngola yam zla mamba.

20 Wani nglo suma ngat buzuna azi ki suma nglona, a tchol le hozugona mablau suma ala a tchenemî yam Barabas mi gum akulo, mi tchi Jesus woyo. 21 Ma te yamba mi hulong dazi ala: Suma mbà wana, agi min an gagi ni nge akulo ge?

Azi dum ala: Barabas.

22 Pilat mi hulong dazi ala: Na ni an le ni nana ki Jesus ma a yum ala Christ-sâ ge?

Azi pet a dala: B’alam akulo ata aguna.

23 Mi dazi ala: Ana, mi le ni tcho me ge?

Wani azi dok er ad’uzi akulo ad’enga ala: B’alam akulo ata aguna.

24 Ata yima Pilat wala mam ndak á le va d’uo na, wani yala nga mi i avogovogo, mi gul mbina, mi mbus abom avok ablau suma. Mi dazi ala: Buzuna hi sama d’ingêr mámina nga kan ndi, ni zla magid’a.

25 Ablau suma pet a hulong dum ala: Ar buzuwam kak kami ki gromina mi.

26 Ata yi máma, Pilat mi gazi Barabas akulo, wani mi to Jesus ki blafâ. Mi hazizi ala a b’alam akulo ata aguna.

Azigarâ a nga las Jesus

(Gol Mar 15.16-20Jn 19.2-3)

27 Azigarâ hi ma te yambina a i ki Jesus hur azina hi ma te yambina, a tok ndrozi azigarâ pet gevemu. 28 A fogom baru mamba woyo, a tchugum baru d’a hleud’a atamu. 29 A tchil avaval aweid’a, a kulubumzi kamu. A dengêm tchereuna abom ma ndjufâ, a grif kä avoromu, a nga lazam ala: Lafiya, amulâ hi Juif-fîna, ami gang depa. 30 A tuvom ayôna iramu, a ve heleu ndata, a wad’am ki yamu. 31 Kid’a azi luwum dad’a, a fogom barud’a woi atamu, a tchugum baru mama atamu, a im woi kel á b’alam akulo ata aguna.

A b’al Jesus akulo ata aguna

(Gol Mar 15.21-32Luc 23.26-43Jn 19.17-27)

32 Kid’a azi buzuk kei kela, a ngaf ki sama Siren-na simiyêm ala Simon. Azigarâ a vum kad’enga ala mi hlagu ma b’ala hi Jesus-na kamu. 33 A mbaza ata yima a yum ala Golgota na, nala, Yima asok yamba. 34 Azi hum süm guguzlud’a gizeîd’a ki mayaûna, wani kid’a mi djugumba, mi tchum mbuo.

35 Bugola, a b’alam akulo ata aguna, a b’rau baru mama aduk taziya, a tum gumara kad’u. 36 A kak kä á ngomomu. 37 Zla d’a a tchugumzi kamba a b’irit akulo ala: Wana ni Jesus amulâ hi Juif-fîna. 38 A b’al suma kula mbà ki sed’emu, tu ata bigam mba ndjufa, tu ata bigam mba gulad’a mi.

39 Suma a nga kalâ a nga ngulumu, a nga kidjik yaziya. 40 A dum ala: Ang ma ala ang to gong nga kud’ora hAlonid’a kä ang minit akulo kur bur ma hindina na, ang sut tangû. Le angî Alona Goroma ni, ang tchugï aseng kä woi ata agu ma b’ala.

41 Nglo suma ngat buzuna azi ki suma hat gata ki suma nglona a lazam hina mi, a dala: 42 Mi sut suma dingâ, wani mi ndak nga á sut tam mbi. Le mam namulâ hi Israel-lîna ni, mi tchugï asem kä tchetchem ata agu ma b’ala, ei mba hei gagazid’a kamu. 43 Mi tin hurum yam Alona; le mi le kamu ni, ar mi sud’um ka tchetchem, kayam mi dala: An nAlona Goroma. 44 Suma kul suma a b’alazi ki sed’ema, a ngulum hina mi.

Matna hi Jesus-na

(Gol Mar 15.33-41Luc 23.44-49Jn 19.28-30)

45 Kid’a afata tchol falei d’ad’ara, yina mbut nduvunda yam andaga ndata pet gak afata tchuk siyad’u. 46 Go kafat ta tchuk siyata, Jesus mi er ad’um akulo ki delem mba ngola ala: Eli, Eli, lama sabaktani? Nala: Alo mana, Alo mana, ni kayam me ba, ang aran ndei ge?

47 Suma ding suma a nga tchola ata yi mámina, a huma, a dala: Nga mi yi Elie.

48 Atogo hina zak, ma dingâ adigazi mi ringâ, mi hle eposâ oîd’a ki süm guguzlu ma azleîna. Mi nigim avun tchereuna, mi humzi ala mi tche. 49 Wani suma dingâ a dala: Ar djang, ei golei le Elie mi mba á sud’um kla ge. 50 Jesus mi er ad’um akulo ki delem mba ngola kua, mi duk vunamu.

51 Gola! Baru d’a ka ir ra kur gong nga kud’ora hAlonid’a ti haû woi aduk mbà tcholï akulo dei gak ti tchuk kä, andagad’a ti yira, ahuniyôna a wak kei mi. 52 Vun asud’a ti mal leyo, ablau suma hAlona suma a bo adjeuna a tchol akulo. 53 A buzuk kei kur zula bugol tchola hi Jesus-d’a, a i kur Jerusalem azì ma ngolâ hAlonina, a tak tazi mablau suma.

54 Ma ngol ma azigarâ abom kis ma Romê-na azi ki suma a nga ki sed’em á ngom Jesus-na, kid’a a we yira handagad’a kahle suma a lenid’a, a le mandarâ, a dala: Gagazi, sa máma nAlona Goroma.

55 Aropma ablaud’a a nga tchola sä woi hina dei á gola. Narop suma a tcholï yam ambas sa Galile-d’a suma a i ad’u Jesus á lum sundina. 56 Adigazi ni Marie d’a Makdala-d’a azi ki Marie d’a Jacques ki Josef asuzid’a ki Zebede groma asuzi mi.

Tosa hi Jesus-d’a

(Gol Mar 15.42-47Luc 23.50-56Jn 19.38-42)

57 Kid’a afata mbut fladeged’a, sama ndjondjoî ma Arimate ma simiyêm ala Josef-fâ, mi mba. Mam mi ma hata hi Jesus-na mi. 58 Mi i gen Pilat, mi djobom yam mad’a Jesus. Ata yi máma, Pilat mi he vuna ala a hum mad’a Jesus. 59 Josef mi hlum mad’amu, mi d’ud’um ki bakta ma awilina. 60 Mi gum kur zul mam mba awili d’a mi tchot aduk ahinad’id’a. Mi ligat ahina d’a ngola, mi dugut avun zula, mi ge tam mi iya. 61 Marie d’a Makdala-d’a azi ki Marie d’a dinga, a nga kaka kä yam asud’a d’ar.

Azigarâ a ngom asud’a ped’et

62 Tcha ndjivinda, nala, bugol bur ma a min ahlena yam bur ma sabatnina, nglo suma ngat buzuna azi ki Fariziyêna a tok avok Pilat, 63 a dum ala: Sama ngolâ, humami gami yam zla d’a sama ka zla máma, kid’a mam nga ki iram tua d’a, mi dala: Bugol bur ma hindina, an mba ni tchol akulo aduk suma matna. 64 Kayam ndata, ang he vuna á ngom asud’a ped’et gak burâ hindi, kayam mam suma hata a mba kulum mad’am kul ba, a de mi suma ala: Mi tchol wa akulo aduk suma matna d’a d’i. Le hina d’uo ni, zla d’a ka d’a bugola mba d’i kal la avoka.

65 Pilat mi dazi ala: Agi nga ki azigarâ. Agi igiya, agi ngomogi asu ndata ped’et ndak yam ad’eng magid’a. 66 Azi iya, a ngom asu ndata ped’et, a yirad’at vunad’u, a tin azigar suma ndjola kua mi.