Amul la ted’a hi Jotam-mba
(Gol 2 Amul 15.32-38)1 Kid’a Jotam mi kak amulid’a, bizamî dok mbà yam mbà. Mi tamula avo Jerusalem bizad’a dogo yam karagaya. Asum a yat ala Jerusa ni Sadok goromba. 2 Mi le sun nda d’ingêra avok Ma didina pepet d’igi abum Oziyas na. Wani nga mi kal kur gong nga kud’ora hi Ma didinid’a d’i. Hina pet pî, suma a d’op nga lovot mazid’a avok Ma didina d’i.
3 Ni mam ba, mi min vun agrek ma akulo nding ma avun gong nga kud’ora hi Ma didinid’ina, mi le sunda ngola yam gulumun ma yam yima a yum ala Ofel-lâ. 4 Mi min azì ma nglona akulo yam yima nding ma Juda-na, mi min gong nga fiyak ka ndjola kazì ma ad’eng ma ngungu ma aduk agud’ina mi.
5 Mi dur ayîna kamul ma Amon-na, mi kus kamu. Suma Amon-na a hum tara kur biza ndata, kawei ma hapma tonna hindi, a hum gemena tonna 3000, kawu orsâ tonna 3000 mi. Kur biza d’a mbàd’a ki d’a hindid’a a humî hina dedege mi. 6 Jotam mi mbut ad’enga, kayam nga mi min lovot mamba avok Ma didina Alo mama.
7 Sunda hi Jotam mba ara kayî ma mi duruma ki sun nda mam lata pet, a b’irit nga kä kur Mbaktumba hamulei suma Israel-lâ kamulei suma Juda-nid’a. 8 Kid’a mi kak amulid’a, bizamî dok mbà yam vahl. Mi tamula avo Jerusalem bizad’a dogo yam karagaya. 9 Jotam mi mit mi i azulei kä ad’u abuyom ngolo. A tozom kur Azì ma ngolâ hi David-na. Goroma Ahas mi vrak tamula blangâmu.
© Azumeina Bible © Alliance Biblique du Tchad, 1999.
