2 Sunda Hamuleinid’a 24 - Azumeina Bible 1999 (MPG)

Jowas mi min gong nga kud’ora yat ma b’lak keina

1 Kid’a Jowas mi kak amulid’a, bizamî kid’iziya. Mi tamula avo Jerusalem bizad’a dok fid’i. Asum a yat ala Sibiya d’a Berseba-d’a. 2 Kid’a ma ngat buzuna Jehojada mi nga ki iram tua d’a, Jowas mi le sun nda d’ingêra avok Ma didina. 3 Jehojada mi vik aropma mi Jowas mbà; mi vut gro andjofâ ki gro aropma mi.

4 Bugol ahle ndazina, Jowas mi nga hurum á min gong nga kud’ora hi Ma didinid’a yat ma b’lak keina akulo. 5 Mi tok suma ngat buzuna ki suma hi Levi-na, mi dazi ala: Agi igi kur azì ma nglo ma Juda-na, agi taragi beged’a abo Israel-lâ pet bizad’a ki bizad’a á min ki gong nga kud’ora hi Ma didinid’a yat ma b’lak keina akulo. Agi i lagi ahle ndazina atogo! Wani suma hi Levi-na a le nga ahle ndazina atogo d’i. 6 Amulâ mi yi ma ngol ma ngat buzuna Jehojada, mi dum ala: Ni kayam me ba, ang nga de mi suma hi Levi-na á i ve beged’a abo suma Juda-na ki suma Jerusalem-ma d’uo ge? Ni bege d’a Moise azongâ hi Ma didinina mi ngat yam ablaud’a hi Israel-lîd’a á min ki zlub’u d’a zandu’â hi Ma didinina nga kuad’a d’uo zu? 7 Kayam Atali atcha d’a tchod’a ki grotna a b’lak ahle suma a tinizi irazi vazi suma kur gonga hi Ma didinid’ina, a le sunda ki sed’ezi malo ma a yum ala Bäl-lâ.

8 Ata yi máma amulâ mi he vuna ala a min zandu’â, a tinim kä avun gong nga kud’ora hi Ma didinid’a abua. 9 A tchi wala kur ambas sa Juda-d’a, kur azì ma Jerusalem-ma mi ala ar suma a mba ki bege d’a Moise azongâ hi Ma didinina mi ngat yam Israel-lâ kid’a a nga abagei hur fulîd’a mi Ma didina. 10 Suma avok suma kablaud’a pet a le furîd’a, a mba ki beged’a, a tchugut kur zandu’â gak mi oyâ. 11 Kid’a suma hi Levi-na a mba ki zandu’â mi suma hamulîna á golid’a, a gol beged’a nga ngola kur zandu’â. Ma b’ir mbaktumba hamulîna ki ma sunda hi ma ngol ma ngat buzuna a tchuk beged’a kä woi kur zandu’â, a hulong zandu’â tinda blangâma. A nga le hina burâ ki burâ, a tar beged’a ngola. 12 Amulâ ki Jehojada a he bege ndata mi suma a tinizi á le suna gonga hi Ma didinid’ina, á wurak ki suma tchet ahinad’a ki suma tchet aguna ki suma a le suna kawei ma wuranina ki suma a le suna kawei ma hleunina á min ki gonga hi Ma didinid’a yat ma b’lak keina akulo. 13 Suma a tinizi á le sundina a le sun mazid’a. Sun mazi d’a led’a nga d’i i djivid’a. A min gonga hAlonid’a yat ma mi b’lak keina akulo, ti tchol ad’enga ngingi.

14 Kid’a abozi mi dap mindid’a, a mba ki beged’a ad’ut ta ara mamulâ azi ki Jehojada. A min kahle suma sunda kur gong nga kud’ora kahle suma a kud’or ki na, kahle suma a ngal kahle suma ngat buzunina, ki kopma ki duguyo suma lora ki duguyo suma a lazi ki kawei ma hapmina mi.

Kid’a Jehojada mi nga ki iramba, a nga hahle suma ngat buzu suma ngala burâ ki burâ kur gonga hi Ma didinid’a.

Jowas mi mbut sama tchona

15 Jehojada mi mbut mamara kikra, mi le bizad’a ni kis kam dok hindi, mi mid’a. 16 A tozom kur Azì ma ngolâ hi David-na zlapa kamuleina, kayam mi le djivid’a ki Israel-lâ, mi le djivid’a avok Alona ki gong mam mba kud’ora mi.

17 Bugol matna hi Jehojada-na, suma nglo suma avok suma Juda-na a mba grif kä avok amulâ, a tchenemu; mam humuzi mi. 18 A ar gong nga kud’ora hi Ma didina Alona habuyozi ngolonid’a woyo, a i kud’or alo d’a a yat ala Asera-d’a ki fileina mi. Ata yi máma Ma didina hurum zal yam suma Juda-na ki suma Jerusalem-ma, kayam a mbut tazi tchod’a avoromu. 19 Ma didina mi sunuzi mam suma djok vuna á hulongôzi gevemu. Mam suma djok vuna a nga lazi glangâsâ, wani azi nga tin humazi yam zla mazid’a d’i.

20 Ata yi máma Muzu’â hAlonina mi mba yam Zakari ma ngat buzuna Jehojada goroma, mi tchol akulo avok suma, mi dazi ala: Alona mi dala: Ni kayam me ba, agi tchilagi yam vun ma hed’a hi an Ma didinina ge? Agi mba fagi djivid’a d’i. Kayam agi noyôn an Ma didina woyo, an mba ni noyôgi woi mi!

21 Ata yi máma a ndjak vunazi kamu, a durum kahinad’a yam vun ma hed’a hamulîna, a tchum kur gulumuna hi gong nga kud’ora hi Ma didinid’ina. 22 Amulâ Jowas mi djib’er nga yam djivi d’a Jehojada Zakari abum mi lat ki sed’emba d’i, mi tchi goroma Zakari. Ata yima Zakari nga mi lá matnina, mi dala: Ar Ma didina mi we, mi djop ad’u zla ndata ni mamu!

Amul la te d’a dabid’a hi Jowas-sa

(Gol 2 Amul 12.17-21)

23 Bugol bizad’a tu, azigar suma Siri-na a mba dur Jowas, a kal kur ambas sa Juda-d’a kazì ma Jerusalem-ma, a tchi suma nglo suma avok sumina woi pet, a sun ahle suma azi hurumuzina avo Damas. 24 Azigar suma Siri suma a mbana a ni hina yegre go, wani Ma didina mi hazi azigar suma ablawazi kal teglesâ aboziya, kayam azi noî Ma didina Alona habuyozi ngolona woyo. Ni hina ba, suma Siri-na a ka sariyad’a yam Jowas. 25 Kid’a azi lum ndaka ngola da d’a, a tchuk tazi a iya, azungeî mama a ndjak vunazi kam á tchum yam tchi d’a mi tchi ma ngat buzuna Jehojada goromid’a. A i tchum yam azang mama, mi mid’a. A tozom kur Azì ma ngolâ hi David-na, wani a tozom nga zlapa kamuleina d’i. 26 Suma a ndjak vunazi kama ba wana: Zabat ma asum mba Amon-ndina a yat ala Simat ki Jozabat ma asum mba Mowap-pina a yat ala Simrit.

27 Zlad’a hi gromid’a ki zla d’a suma djok vun Alona ablaud’a a dat kamba ki min nda mi min gong nga kud’ora hAlonid’a yat ma b’lak keina akulod’a, a b’ir nga ahle ndazina kä kur Mbaktum mba ge humba hAmuleinid’a. Goroma Amasiya mi vrak tamula blangâmu.