Jakob mi mber i Ezipte ki groma
1 Israel mi nde glovot kahle mama pet. Kid’a mi mbaza Berseba-d’a, mi ngat buzuna mAlona habum Isa’â. 2 Kur andjege ndata Alona mi nde tam ir Israel, mi yum ala: Jakob! Jakob!
Jakob humum ala: An huma!
3 Alona mi dum ala: An ni Alona, Alona habungâ; ang le mandarâ á i Ezipte d’i, kayam an mba ni zulung andjavang ngola sä hî. 4 An tan mba ni tining Ezipte, an tan mba ni hulongôngî mi, wani kur mat mangâ, ni Josef ba, mba mi simed’eng irang kä.
5 Jakob mi tchol Berseba. Groma a hlum kur pus ma Faron sunumïna zlapa kamiyôzina ki grozina mi. 6 A yo d’uwar mazina kahle mazi suma djivi suma azi fazi kur ambas sa Kanan-ndina pet. Ni hina ba, Jakob mi i Ezipte ki sum mama pet, 7 grom suma andjofâ, grom suma aropma, grom ngolo suma andjofâ ki suma aropma mi.
Andjafâ hi Israel-lâ
8 Wana ni simiyê Israel suma a mba Ezipte-na, nala Jakob ki groma:
Gorom ma ngolâ ni Ruben. 9 Ruben groma ni Enok, Palu, Hesron ki Karmi.
10 Simeon groma ni Jemuwel, Jamin, Ohat, Jakin, Sohar ki Saul ma asum gor ra Kanan-ndina.
11 Levi groma ni Gerson, Kehat ki Merari.
12 Juda groma ni Er, Onan, Sela, Peres ki Zera. Wani Er ki Onan a bo woi kur ambas sa Kanan-nda. Peres groma ni Hesron ki Hamul.
13 Isakar groma ni Tola, Puva, Jasup ki Simron.
14 Zabulon groma ni Seret, Elon ki Jalel.
15 Azi pet ni Lea grot suma ti vud’uzi mi Jakob avo Padan-Aram-ma ki gorota Dina. Grozi suma andjofâ ki suma aropma pet ni dok hindi yam hindi.
16 Gad groma ni Sifiyon, Hagi, Suni, Esbon, Eri, Arodi ki Areli.
17 Aser groma ni Jimna, Jisva, Jisvi, Beriya ki wiyezid’a Sera. Beriya groma ni Heber ki Malkiyel.
18 Azi pet ni Zilpa d’a Laban hat mi goromba Lea-d’a grot suma ti vud’uzi mi Jakob-ma. Azi pet ni dogo yam karagaya.
19 Rachel atchad’a hi Jakob-pa grotna ni Josef ki Benjamin.
20 Manase ki Efraim ni Josef grom suma mi vud’uzi avo Ezipte ki Asenat Potifer ma ngat buzuna hi On-na gorombina.
21 Benjamin groma ni Bela, Beker, Asbel, Gera, Näman, Ehi, Ros, Mupim, Hupim ki Arde.
22 Wana ni Rachel grot suma ti vud’uzi mi Jakob-ma. Azi pet ni dogo yam fid’i.
23 Dan goroma ni Husim.
24 Neftali groma ni Jatsel, Guni, Jeser ki Silem.
25 Wana ni Bilha d’a Laban hat mi goromba Rachel-la grot suma ti vud’uzi mi Jakob-ma. Azi pet ni kid’iziya.
26 Jakob andjavam ma mba Ezipte-na pet ni dok karagaya yam karagaya bei ndum groma amiyôzina kua. 27 Josef grom suma vud’uzi Ezipte-na ni mbà. Jakob andjavam ma mba Ezipte-na pet ni dok kid’iziya.
Jakob mi mba avo Ezipte
28 Jakob mi ge Juda avorom gen Josef ala mi ngavamî Gosen. Kid’a azi mbaza yam andaga d’a Gosen-ndid’a, 29 Josef djin pusâ ad’u akulumeina, mi djak kur á i Gosen á d’ugol abum Israel. Ata yima mi wuma, mi bed’em kelem kok, mi nde tchina.
30 Israel mi de mi Josef ala: Ki tchetchem wanda, ar an mid’a, kayam an wang irang da’, ang nga ki irangû.
31 Josef mi de mi b’oziyoma ki suma avo habuma ala: An i ni de mi Faron ala: B’oziyona ki suma avo habun suma sä Kanan-na a mba wa gevenu. 32 Sum ndazina ni suma pola, azi ni suma ngom d’uwarâ; azi mba nga ki d’uwar ma gureina ki ma nglona kahle mazina pet mi.
33 Wani le Faron mi yagi mi djobogi ala: Sun magid’a ni suna me ge ni, 34 agi dum ala: Ami azungeî mangâ ni suma ngom d’uwarâ ki gugurei tami dei gak ini d’igi abuyomi ngolo hina.
Hina wani, mba mi hagi vuna á kagagi yam ambas sa Gosen-nda, kayam suma pol aho’â pet, Ezipte-na a golozi ni is.
© Azumeina Bible © Alliance Biblique du Tchad, 1999.
