Tchenda hi sama kur ndakina
1 Ni sawal la David mi hlat mi hat mi ma ngolâ hi suma hle sawalina.
2 Sama nga mi le yam ma hohoud’ina
mi le furîd’a,
kayam Ma didina mba mi sud’um kur bur ma ndaka mba kama.
3 Ma didina nga mi ngomom á kak karid’a;
mi mbud’um sama le furîd’a yam andagad’ina,
mba mi hum abo mam suma djangûna á le min mazid’a ki sed’em mbuo mi.
4 Ma didina mba mi ndjunum kur tugud’ei mamba yam azang mama,
mba mi ngomom kur tugud’ei mamba mi.
5 Wani an nga ni dala: Ma didina, ang wan hohowonu!
Ang tcholon akulo, kayam an le tchod’a avorongû.
6 Man suma djangûna a nga de zla d’a tchod’a kan ala:
Mi mit ni mindja ge?
Ni mindja ba, zlam mba d’i sil lei ge?
7 Le sa mi mba á d’unu ni, mi de ni zla d’a aboina,
mi to’î zla d’a tchod’a kurumu,
mi ndabua, mi dat tei mi suma.
8 Suma a noyôna pet a tok tazi a nga kud’us tazi kanu,
a nga huruzi á lan tchod’a, a nga dala:
9 Mi dap wa ata zla d’a tchod’a!
Gola! Mi nga ged’a kä!
Mi dok tchol akulo d’uo d’a!
10 Banan ma kokodjo ma an tin hurun kama
ni ma nga mi te tena ki sed’ena,
mi mbut iram mi kak djangûna ki sed’enu.
11 Wani Ma didina, ang wan hohowon tcholon akulo,
an sä atchugulun ki sed’eziya.
12 Le man ma djangûna mi kus kan nduo ni,
an mba ni wala ang hurung vanu.
13 Wani ang djigin akulo ni yam d’ingêr manda,
ang nga ngomon kä avorong teteu.
14 Ar ei suburi Ma didina,
Alona hi Israel-lâ
ma nga adjeu dei gak didina!
Amin! Amin!
© Azumeina Bible © Alliance Biblique du Tchad, 1999.
