Gat ta Alona mi hat á dik suma ndjendjed’id’a
1 Ma didina mi de mi Moise ala: 2 Ang he vuna mi Israel-lâ a dik sama lara ma libina nde atama d’oze sama hle mbilîna d’oze sama mbut tam ndjendjed’a ki vama matnina woi kur kangâ. 3 Le natchad’a d’oze mandjufâ, ang digim mbei kur kangâ kayambala mi mbut kang ma adigagi ma an nga kaka kuana ndjendjed’a d’uo d’a.
4 Israel-lâ a le hina mi, a digizi woi kur kangâ d’igi Ma didina mi he vuna mi Moise na mi.
Wurak ka yam tcho d’a sana mi lat mi ndramid’a
5 Ma didina mi de mi Moise ala: 6 Ang i de mi Israel-lâ ala: Ma didina mi dala: Le atchad’a d’oze mandjufâ mi le tchod’a mi sana mi mbud’um tchod’a avogon an Ma didina ni, zlad’a nga kamu. 7 Mi de yam tcho mam mba mi lat ndata woyo, mi wurak gusa hi va mámid’a yam tchod’a mi lata, mi hle bege d’a ding nga ndak ir gusa hi va mámid’a, mi walat kä ad’u vahl, mi hle tu, mi tinit yam bege ndata, mi hat mi sama mam b’lagam máma. 8 Le wiyem ma go ma ve wuraka yam tcho ndatina nga d’uo ni, mi hat mi an Ma didina, nala, mi hat mi ma ngat buzuna. Mi he gamlâna kam kua á zlup yam tcho mamba; ma ngat buzuna mi le ki vama ngat buzu máma d’igi mi le sun nda zlup tchod’a na tala sa máma mi fe hur ma vata yam tcho mamba d’a. 9 He d’a hawa d’a a tinit irat vat ta Israel-lâ a pad’at aduk he d’a hawa d’a a nga hata pet ni hi ma ngat buzunid’a. 10 Vama lara ma sana mi tinim iram vam mi Ma didinina ni hi ma ngat buzunina; vama sana mi hum mi ma ngat buzunina, mi arî mama mi.
Gat ta yam atcha d’a le bateid’a d’a
11 Ma didina mi de mi Moise kua ala: 12 Ang i de mi Israel-lâ ala: Ma didina mi dala: Le atchad’a ti le bateid’a nga d’i hum ndjuvut tuo, 13 le sama dingâ mi le mizeuna ki sed’et gumun bei ndjuvut mi we ti mbut tat ndjendjed’a bei sa wad’u, le sana mi vat nga kua d’uo, 14 le ndjuvut mi nga ki djib’er ra mbàmbàd’a yam amam mba ti mbut tat ndjendjed’id’a d’oze ti mbut nga tat ndjendjed’a d’uo pî ba, le mi nga ki djib’er ra mbàmbàd’a kad’u ni, 15 sa máma mi mba kamam ndata mi ma ngat buzuna zlapa ki he d’a hawa d’a afuta hawu orsînid’a. Mi vo mbulâ yam afut ndata d’i, mi vo dubang ma his djivid’ina kat tuo mi, kayam ni he d’a hawa d’a yam djib’er ra mbàmbàd’id’a, ni he d’a hawa d’a ge humba yam tchod’id’a.
16 Ma ngat buzuna mi mba ki sed’et avun zlub’u d’a ngaf tad’a, mi tcholot akulo avogon an Ma didina. 17 Mi go mbiyo ma a tinim iram vam ma nga kä kur deinina, mi yo andaga d’a gugud’up pa kä kur zlub’ud’id’a, mi tchugut aduk mbina. 18 Mi tchol atcha ndata akulo avogon an Ma didina, mi fogot baru ma katna woyo, mi hat he d’a hawa d’a ge humba abod’u, nala, he d’a hawa d’a yam djib’er ra mbàmbàd’id’a. Mi ve mbiyo ma aglar ma a gun ki tangâ abomu. 19 Mi gun katcha ndata, mi dat ala: Le sama ding mi bur nga ki sed’ek kuo, le ndak bur nga ki sa d’uo, le ndak nad’u ad’enga hi ndjuvuka hawa en, le ndak mbut nga tak ndjendjed’a d’uo ni, ar mbiyo ma aglar ma a gun ki sumina mi lak va d’i. 20 Wani le ndak nga ad’u ad’enga hi ndjuvuka hawa en nduo, le ndak mbut tak ndjendjed’a, le ndak bur ki mandjuf ma dingâ ni, 21 ar Ma didina mi ngobogu, mi b’alak gendreged’a, mi gizik keyo. Wani ndak mba d’i mbut ni vama taka mi sum ma’â á yi kahlena yam suma. 22 Ar mbiyo ma aglar ma a gun ki sumina, mi kal kurugu, mi gizik keyo, mi b’alak gendreged’a mi.
Atcha ndata ti hulong zla d’a ded’a ala: Amin! Ar le hina!
23 Ma ngat buzu máma mi b’ir zla d’a gun ta ndata kä kur mbaktumba, mi nigit kä aduk mbiyo ma aglarâ á mbuzut teyo, 24 mi he mbiyo ma aglar máma matcha ndata á tched’a. Mbiyo máma mba mi kal kurud’u, mi mba ki ndaka kad’u. 25 Ma ngat buzu máma mi ve he d’a hawa d’a yam djib’er ra mbàmbà ndata abod’u, mi gazat akulo avogon an Ma didina mi, mi mba ki sed’et yam yima ngal ahle suma ngat buzuna, 26 mi yo he d’a hawa d’a ge hum ndata hur abom tu, mi ngalat tei yam yima ngal ahle suma ngat buzu máma. Bugola, mi he mbina matcha ndata á tched’a.
27 Ata yima ti tche mbiyo máma da na, le d’i mbut tat ndjendjed’a ti bur ki sama dingâ ni, vama mba katna ba wana: Mbiyo ma aglar ma gun ki sumina mba mi kal kurud’u, mi mba ki ndaka kad’u, mba mi b’alat gendreged’a mi. Ti mba d’i mbut ni vama taka mi sum matna. 28 Wani le d’i b’lak nga tat tuo, ti ni yed’ed’u ni, va mba mi lat kur gun mata d’i, ti mba d’i vut grona hawa mi.
29 Wana ni gat ta yam djib’er ra mbàmbàd’id’a, ata yima atchad’a ti b’lak tat ti bur ki sama dingîna, 30 d’oze ata yima mandjufâ mi ki djib’er ra mbàmbàd’a yam amambina. Ma ngat buzuna mi tchol atcha ndata akulo avogon an Ma didina, mi ndumut gat ndata ki zla tat pet. 31 A mba we ndjuvut ala zla nga kam mbi. Wani atcha ndata mba d’i zi aneka hi tcho matid’a kad’u.
© Azumeina Bible © Alliance Biblique du Tchad, 1999.
